Kucangtsi 11 - Kutsingken Ira Rimam ti Saen Kyag

Uten Babila

¹ Ti kucang, ande ti utense meme ku ri unju kinjo amam.

² Ande nwunn usir ti kiskinn, u ba tu utab iki yi Babila, u som atang.

³ Ama aba ri te atso baa, “Ni ba ti ti byi ariben, u fxab yi nyinyang.” Aba ku mbye asog ti biriki kutunn unju atxom, ama mbye yi nyinyang ti kindob koltai kutunn unju ariben.

⁴ Ama aba ri baa, “Ni ba ti ti mbye na ijwe-ti uten, ti kitaen kujwín, ikyaen ti rinyi-ti ā pu iten, ama ikyaen ti, ati ā yaen shag-ti uwae utense be.”

⁵ Ama Yaweh si ba ti wu u ba sae uten wu ti ande ku mbye ti rikob-wu ku tso ne.

⁶ Yaweh ri baa, “Nung! Ti ande bane site risu ti ren, u ku ri unju kinjo ne, ayine si nyáng ti kucangtsi iken ti aba a myae tsi ti a u nde, iken iki ta-yi ti u byangkyi ba be.

⁷ Ba, ti ti ka ye unju-ba kyikab, ti aba ā fxen-ba atso cwucwo be.”

⁸ Yi fengo yine, Yaweh byinn shag ba kyife utense meme, ama aba mbye-ba uten wu cwucwo be.

⁹ Nee iken ti nde, aba kunn rinyi uten wu baa, “Babila.” Ikyaen ti, ayi si uwog wune ti Yaweh ye unju ande utense kata. Ayi si uwog wune ti Yaweh nda ande yaen shag kyife utense meme.

Rishi Shem

¹⁰ Ayine si kuci anyisu Shem. Asang ifaen isim ti ambyi munnkyi utense, kiye ti Shem site asang ukob kinjo (100), awu mbae Arpakisha.

¹¹ Isim ti awu mbae Arpakisha, Shem nde asang ukob itsong (500), u mbae kyi anyisu ti arom tí tī anda.

¹² Arpakisha nde asang rijweta mbe itsong (35), awu mbae Shela.

¹³ Isim ti Arpakisha mbae Shela, awu som asang ukob inje mbe ita (403), ama u mbae kyi anyisu ti arom tí tī anda.

¹⁴ Ti Shela nde asang rijweta (30), awu mbae Eber.

¹⁵ Isim ti awu mbae Eber, Shela nde asang ukob inje mbe ita (403), u mbae anyisu tī arom tí tī anda.

¹⁶ Ti Eber nde asang rijweta asu inje (34), awu mbae Peleg.

¹⁷ Isim ti awu mbae Peleg, Eber som asang ukob inje ti rijweta (430), u mbae kyi anyisu ti arom tí tī anda.

¹⁸ Ti Peleg nde asang rijweta (30), awu mbae Rewu.

¹⁹ Isim ti awu mbae Rewu, Peleg som asang ukob ifaen ti itsongnje (209), u mbae kyi anyisu tī arom tí tī anda.

²⁰ Ti Rewu nde asang rijweta mbe ifaen (32), awu mbae Serug.

²¹ Isim ti awu mbae Serug, Rewu nde asang ukob ifaen ti itsongfaen (207), u mbae kyi anyisu ti arom tí tī anda.

²² Ti Serug nde asang rijweta (30), awu mbae Nahor.

²³ Isim itimbae Nahor, Serug som asang ukob ifaen (200), u mbae kyi anyisu ti arom tí tī anda.

²⁴ Ti Nahor nde asang rikom asu itsongnje (29), awu mbae Tera,

²⁵ Isim itimbae Tera, Nahor som asang ukob kinjo ti rijwe asu itsongnje (119), u mbae kyi anyisu ti arom tí tī anda.

²⁶ Ti Tera nde asang mae ita mbe rijwe (70), awu mbae Ibram ti Nahor ti Haran.

Rishi na Tera

²⁷ Abane ti si rishi Tera. Tera mbae Ibram ti Nahor, ti Haran. Haran ama mbae Loti.

²⁸ Haran cwu uwe itse-wu Tera uwae uten Ur ti ta Kaldeya, uten itimbae-wu.

²⁹ Ibram ti Nahor mbe anda. Rinyi uwa Ibram si Saraya, rinyi uwa Nahor ama si Milika, umbae Haran. Awu si mbiya Isika ti Loti.

³⁰ Ama Saraya kunn utsob, awu mbae-wu mbae be.

³¹ Tera pu uyin-wu Ibram, ti Loti umbae unyin-wu Haran, ti uwabyib-wu Saraya, uwa Ibram, meme-ba nwunn ku ru yi Ur ti ta uten ti Kaldeya, ti aba u ru yi uten Kanana. Ama ti aba ka sang uten ti Haran, aba som atang.

³² Tera nde asang ukob ifaen mbe itsong (205), ama u cwu uwae Haran.