Jona 4 - Kutsingken Ira Rimam ti Saen Kyag

Jona Ndembeb Utob Ikyaen Ayibrisi Rimam

¹ Jona ndembeb utob timambe ikyaen ayibrisi Rimam yine, ama u tso rinae.

² Ikyaen yine, awu jwam Yaweh, u ri baa, “Yaweh, ayine si-yi ira ti ame ri kiye ti ame ta ti uten-m be a. Ame nung baa, afu na si Rimam na ayibrisi, ure-fu ko timambe. Afu ku tso-fu rinae ti kufe be, ku yata na ande riraen-ba ti kufe. Nee iken ti nde ame kwab ti m na u ter ru yi Tarshish.

³ Tine, Yaweh, ame ku jwam fu, ye ra-fu unyang-m. Ame a cwu, ayi u nyang m skeb pu yi ti m u som ti unyang.”

⁴ Yaweh rang Jona baa, “Ayi nyang ti afu ku tso rinae ikyaen iken yine a.”

⁵ Ama Jona nwunn u ya uwae uten atang ta, u ru yi uwe usir ti kiskinn, u ka kyae kufug u som atang ti wu u nung iken ti u nde uwae uten atang.

⁶ Ama Yaweh Rimam nda kimbae kutuku iki shab tsoye, u nda awum-wu nda Jona utob ti jim. Uwae Jona nyang si-yi ti ti ri be.

⁷ Ti ucwe fam kiskinn, Yaweh nda acwucwug tsoye, u kub wen ra kutuku wu, ama awu wom cwu.

⁸ Ti usir pur ku tso, Yaweh nda ufunn ti byagkwan ru usir ti kiskinn ba. Ayam usir byinn Jona ti risu. Awu kunn ku cwu, ama u ri baa, “Iticwu nyang m skeb pu yi ti ame u som user.”

⁹ Yaweh rang Jona baa, “Ayi nyang ti afu ku tso rinae risu kutuku wune a.” Awu cwe baa, “Een. Rinae-m pang atang. Ayi pang pu yi ti m u cwu ikyaen-yi.”

¹⁰ Yaweh ri baa, “Afu ku nung risi kutuku wune, ti ayi si-yi afu ti tso, u shi ser wu be. Ayi si kutuku ti shab ru ye uwae utitang kinjo, ama u wom cwu uwae utitang kinjo.

¹¹ Ama ame u nung-m risi Nineve be a? Nung! Awu si uten tiyang ti site ande skeb kumbub mae itsongnjo (120,000) atang ti nung-ba itikanta kubenti ti itikong be, fa ti asinn yang-yi ne.”