Jona 3 - Kutsingken Ira Rimam ti Saen Kyag

Jona Nae Risu Riben te Ira Rimam

¹ Kiye wune, ira Yaweh ba kyi uwog Jona ti apu-ifaen baa,

² “Nwunn ru yi Nineve, uten tiyang wune, ka tsa na ba kutsa ti ame nda fu ti fu na ka tsa na ba.”

³ Jona nae risu riben ti ira na Yaweh, u nwunn u ru Nineve. Kiye wu, Nineve si uten tiyang, ti ko timambe. Ayi u sa ikyin na usir ita titawe ti unde u kyang kae ricwunnkyi wu.

⁴ Usir ti tawe ti Jona bag itisang uwae uten atang, awu ya iskin baa, “Isim usir mae ifaen, Nineve u mbub si riben!”

⁵ Ande ti Nineve ru kubenti uwog Yaweh. Aba ya iskin, u sa usir ita tsi, u cwe unju meme ba. Aba pu atupwa tibyir si, ti ku tso utob tibyir-ba. Patag-ba, ko andefu ko umbae ti kitinying.

⁶ Ti ukwe Nineve fxen iten ira ayine, awu nwunn tagbug-wu, u tunn arun-wu, u pu atupwa tibyir si ijwe-wu, u som si uwae atong.

⁷ Ukwe nda ba ya iskin, u bae ira yine ko aka meme uwae Nineve baa, “Ni fxen icwe yine ti ru uwog ukwe ti andufu-wu ba: Ni nda-ni unde iki ti awu ā ci iken iki ko ti awu ā ngwa iken iki be. Asinn-ni ama ā ci-yi iken be, u ngwa-yi iken be, ko iwen ko indag.

⁸ Ko aye, ande ko asinn meme, ā sī kang atupwa tibyir, unde titini ā kafe isim ta ikentitibi-wu, u jwub ira ti kpakang-wu meme uwog Yaweh.

⁹ Aye ti nung, iki be, Yaweh u kafe, u nung risi ti, u sa ruye rinae-wu, ama u twenji-wu ati be.”

¹⁰ Ti Yaweh nung iken ti aba nde, u kafe isim ta ira titibi-ba yine, awu sae ba ti ayibrisi, u nde-wu iken ti awu sa tsi ti wu na u nde te ba cwucwo be.