Jona 2 - Kutsingken Ira Rimam ti Saen Kyag

Itijwam Jona

¹ Ama ti Jona ta uwae rishwu iwag atang, awu jwam Yaweh, Rimam ti ana-wu

² u ri baa, “Uwae rikaen-m, ame kunn ira na Yaweh, awu fxen itikunn-me. Uwae kukwae iticwu, ame jwub ira u sha itindeya, afu fxen itijwub ti ana me.

³ Afu ye m jwunnsi uwae uyinn ti rurong, si fife yi riben imbyi uyinn, ame ngwa byinn uwae ambyi, ambyi tekyi tag m sisisaen.

⁴ Ame ri baa, ‘Ko ti a rwae sha m kutxuwe-fu, ame u nde rimang u sae kyi kusog-fu ti saen kyag?’

⁵ Ambyi kyebkyi pu yi ame, ambyi uyinn munnkyi m. Irum uwae ambyi cwenkyi pu yi risu-m.

⁶ Kiye ti ame si fife yi ipab rikwen riben, ame ku tang baa, ame na u ru ye-m pursuna wune cwucwo be. Ama afu Yaweh, Rimam ti ana-m, afu nwangru unyang-m uwae kukwae iticwu.

⁷ Ti unyang-m jim ku si, ame tangsom te fu Yaweh, ama u sa itijwam-m ru ba uwog fu. Ama uwae kusog-fu ti sisaen, afu fxen.

⁸ Ariki sa utob-ba na apxin ti si iken ti ukaen, u kafe isim ta Rimam ti si Rimam na ure ti ayibrisi.

⁹ Amaa, ame u teb fu u nda fu fxaefa. Ame u twen ikentitwen na fu. Ame u ye su unju ti yer ti ame yer te fu. Itinwangru ku kyangji uwog Yaweh.”

¹⁰ Ama Yaweh ri ira te iwag wu, ama iwag wu ba cwo ra Jona tso nae tsa ukunn uyinn.