Jona 1 - Kutsingken Ira Rimam ti Saen Kyag

Jona Kwab ti Wu Ter Nwunn Kutxuwe Rimam

¹ Ira na Yaweh ba uwog Jona, umbae Amitayi baa,

² “Nwunn! Ru yi Nineve, uten tiyang wune, ti ka mbub ukunn si ba risu, ikyaen ti, ame nung ikentitibi-ba ko sha-yi.”

³ Amaa Jona nwunn u ter ku ru yi Tarshish ikyaen ti wu na ter nwunn kutxuwe Yaweh. Awu si yi unju uyinn ti Yopa, u ka tu kuyae, u pae aser, ama u sang ku ru yi Tarshish, uwog ti awu u ta fengo ti rwen te Yaweh.

⁴ Ama Yaweh nda ufunn nwunn ti ribom uwae uyinn atang. Ufunn wu kpag timambe, ku sha ti wu byinmbub kiyae wu.

⁵ Ikyenricwu ye meme ande ti ta uwae kuyae wu. Unde titini ku jwub ku kunn apxin-wu baa, “Nwangru ti! Nwangru ti!” Ama aba pu isu ti rurob ti ta uwae kuyae wu jwunn si uwae uyinn, ikyaen ti kuyae wu na tomfu. Kiye wune, Jona si fife yi imbyi kuyae, u ka nae atang, ku cwag kicwag.

⁶ Unde ti uwe kuyae wu si yi imbyi kuyae, u ka rang wu baa, “Ukwe kicwag, ayine si imi ti afu ku nde? Nwunn ti jwam apxin-fu! Iki be awu u nung ti ti ayib risi, u nwangru ti.”

⁷ Ande ti ku ter kuyae ri te atso baa, “Ni ba ti ti caen unde wu ti ira titibi putsa kufxen-wu ba tu ti.” Ama aba caen ye Jona.

⁸ Tiri, aba rang wu baa, “Aye ti shir ira titibi ne ba tu ti? Afu ku nde wande imi? Afu ru aka ba? Afu si urae arimi? Arimi ti si ande-fu?”

⁹ Jona ri te ba baa, “Ame si Mbaibrane. Ame ku fen Yaweh, Rimam ti apupwen, ti kyae uyinn ti riben.”

¹⁰ Ikyenricwu ye ande ba timambe, aba rang wu baa, “Ayine si imi ti afu nde?” Ikyaen ti, aba fxen, awu ri tso ti unju-wu baa, awu na ku ter kutxuwe na Yaweh.

¹¹ Kutikyib wu tso beb ku fufa, aba rang wu baa, “Ati u nde fu rimang titawe uyinn wune u nae skirr?”

¹² Jona ri te ba baa, “Ni ye m jwunnsi uwae uyinn. Uyinn wu u si tab. Ame nung baa ayi na si ikyaen-m ti ufunn titibi ne tu ni.”

¹³ Ko ti ayi si ahan, ande ba kwab ti a u tae kuyae kafe ru kukunn itab, a kwab num. Ikyaen ti, kutikyib wu bom skeb risu.

¹⁴ Aba jwub tu Yaweh baa, “Ati ku jwam fu, Yaweh, twenji-fu ati ikyaen unyang unde wune be. Byib-fu anying unde wune risu-ti be, ikyaen ti, afu nde pu fu iken ti afu ku sha.”

¹⁵ Ama aba ye Jona tso jwunn si uwae uyinn, ama kutikyib wu sijim skirr.

¹⁶ Ikyaen ayine, ande ba kyen ikyenricwu Yaweh, u twen ikentitwen na wu, ama u yer unju ti uben ti ben baa, aba na u fen Yaweh.

¹⁷ Tiri Yaweh nda ukam iwag iki tso ba ye ra Jona mennsi. Jona nae uwae iwag wune usir ita, ti utitang ita.