Ititatso 7 - Kutsingken Ira Rimam ti Saen Kyag

A Yerkob Apyi Rimam

¹ Isim ayine ame sae atom Rimam ka inje, tsi ukub inje na utense, u ye ufunn ti ruye ukub inje na utense yine tsi ting, ti ayi ā kae fa-yi utense ko uyinn ko ituku be.

² Ama ame sae kyi atom Rimam ti apupwen iki tsoye kujwo usir ti kiskinn ku ba, u ye su sitami Rimam awu ti tsi yiyer, kujwo-wu. Awu kunn atom inje bane, ti a nda ba kuko ti a na ndembeb utense, ti uyinn,

³ u ri te ba baa, “Ni ndembeb-ni utense ti uyinn ti ituku khika be, se ti ati a kum pu ti sitami kutxuwe apyi Rimam-ti titawe.”

⁴ A pwen tatso m ujwunn apyi Rimam ti a kum ba sitami kutxuwe, ti ruye yi kumyaem na Isirela, aba ka ande kumbub rijwe asu ifaen atsepu rijwe asu ifaen (144,000).

⁵ A tu ande kumbub rijwe asu ifaen ruye rishi Yawuda, u tu ande kumbub rijwe asu ifaen ruye rishi Roben, u tu ande kumbub rijwe asu ifaen ruye rishi Gad.

⁶ Ande kumbub rijwe asu ifaen ruye rishi Asher, ande kumbub rijwe asu ifaen ruye rishi Nafitali, ande kumbub rijwe asu ifaen ruye rishi Manase.

⁷ Ande kumbub rijwe asu ifaen ruye rishi Simeyon, ande kumbub rijwe asu ifaen ruye rishi Lawi, ande kumbub rijwe asu ifaen ruye rishi Isakar.

⁸ Ande kumbub rijwe asu ifaen ruye rishi Zebulun, ande kumbub rijwe asu ifaen ruye rishi Yusufu, ande kumbub rijwe asu ifaen ama ruye rishi Benjamin.

Itifunn ti Unde u Pwen Tu-wu Be

⁹ Isim ayine ame sae ujwunn ande ti funn, ti unde u pwen tu-wu aba be, ti ruye uwae utso ande meme, ti uwae rishi ande meme, ti uten ti ta uwae utense patag ti unju-ba txi txi. Aba tsi uwe kutxomkwe ti uwe Mbae utam wu. Aba si arun titsen u ye su asaen itu ajwo-ba.

¹⁰ Aba ku taen ira baa, “Itinwangru ru uwog Rimam ba, awu ti somtsa kutxomkwe, ti uwog Mbae utam.”

¹¹ Meme atom Rimam ti apupwen tsi pakob kutxomkwe wu, ti ande ndufu ti iken inje ti ku nyang unyang. Aba jwunn ikyig u bur uwe-ba riben, u fen Rimam,

¹² u ku ri baa, “Ayi ā si ahan! Itinyang ti riyinn ti ben-ayib ti fxaefa ti rurob ti kuko ti kpakang ā si ana-fu Rimam-ti. A teb rinyi-fu ru fife yi uwe! Ayi ā si ahan.”

¹³ Kinjo uwae andufu ba rang m baa, “Arikam ti sī arun ti tsen ne? A ru aka ba?”

¹⁴ Ame ri te wu baa, “Itsekuru, afu ti nung.” Awu ri te m baa, “Abane si ande ti ruye uwae rikaen tiyang wu. Aba jwo saen pu ba arun-ba, u sa yi kafe titsen uwae anying Mbae utam.

¹⁵ Nee iken ti nde, aba ba tsi uwe kutxomkwe Rimam, ku fen wu usirtaen ti utitang, uwae kusog-wu. Ama Awu ti somtsa kutxomkwe ne u nungkyi ba, u si uwog awùm-ba.

¹⁶ Rimenn ti unwaen u ye-yi aba cwucwo be. Ayam usir u fxáb-yi aba be.

¹⁷ Ikyaen ti, Mbae utam wu ti tsi konje kutxomkwe, ti u shi ba. Awu ti tae ba ru yi isatsub ambyi unyang ti tsi kukunn, ama Rimam u fen ba aten ayib.”