Ititatso 22 - Kutsingken Ira Rimam ti Saen Kyag

Uyinn ana Unyang

¹ Isim ayine, awu atom wu tatso m uyinn ti site ambyi na unyang. Ambyi wu saen kyakyag, u pang ruye uwog kutxomkwe na Rimam, ti ana Mbae Utam.

² Awu pang putsa kutampwa fengo ukum na uka wu. Ituku na unyang tsi meme iyenkyab na uyinn wu. Ushaen titini ayi ku waen itso awaen txi txi, ka ishaen rijwe asu ifaen. Atsing-yi ku jim kicaeb ande.

³ Meme iken ti Rimam faen yi kufaen u ta-yi uwae uka atang be. Kutxomkwe Rimam ti ana Mbae Utam, u ta uwae atang. Ama apyi na Rimam u fen wu atang.

⁴ Aba u nung uwe-wu. Rinyi-wu ama u bae kutxuwe-ba.

⁵ Utitang u ta-wu atang cwucwo be. Aba u sha-ba urwa fitila ko ana usir cwucwo be, ikyaen ti, Itsekuru-ti Rimam ti u si urwa-ba. Aba u som usom ukwe ti ititsikunn-yi ta-yi be.

⁶ Cwucwo, atom wu ri te m baa, “Ira yine si ira ti kubenti, u pang atang ti unde ā sa utob tsi risu-yi. Itsekuru-ti Rimam, awu ti ku sa Kusung-wu jwu sang ande ti ku ya iskin ira-wu, awu ti tom atom-wu ba uwog apyi-wu ti wu tatso ba iken ti u tsi-yi tsi be, u nde.”

⁷ “Nung! Ame u tsi-m tsi be u ru ba. Itinyang ā si ana unde ti ye su iskin ti ya ira Rimam ti a bae uwae kutsingken wune.”

⁸ Ame Yohana ti risu-m, ame fxen ira yine te atong-m, u nung meme iken yine te ayib-m. Kiye ti ame fxen u nung yi, ame jwunn ikyig riben ti m na fen atom wu ti tatso m iken yine.

⁹ Amaa, atom awu byang kyi m, baa, “Ya ta! Fen-fu ame be, ame ama si sí upyi pangma afu, u si kinjo uwae ameinja-fu meme ti ku putsa ira ti kubenti ti a bae uwae kutsingken wune. Fen Rimam.”

¹⁰ Awu ri te kyi m baa, “Fxebkyi-fu ira iskin ti ya ti a bae uwae kutsingken wune be, ikyaen ti, kiye ko ku fer pu wu.

¹¹ Ni ya unde ti ku nde ikentitibi ta ti wu ā ru yi uwe te iken titibi ti nde. Ni ya unde ti ku nde iken ti isor ta, ti awu ā nde iken ti isor-wu ayi. Ni ya unde ti ku nde iken tinyang ta, ti awu ā nde iken ti tinyang-wu. Ni ya unde ti som usom ti sisaen ta, ti awu ā som usom-wu ti sisaen.”

¹² “Nung, ame u tsi-m tsi be u ba, u pu kujwojang kyangsu ti m kan na unde titini, pang te iken-wu ti awu nde.

¹³ Ame ti si itikucang u si itiricwunnkyi, ame si iti uwe u si iti isim.”

¹⁴ Itinyang ā si ana ande ti jwo arun-ba sisaen. Aba u tu kuko ti a u putsa ufu sang ka uwae uka, u ci awaen kutuku na unyang.

¹⁵ Amaa, mbapxu, ti ande ti kisi, ti ande ti ku caen upwen, ti ande ti ku nae iyag, ti ande ti ku wen ande, ti ande ti ku fen apxin, ti ande meme ti sa uwae tsi risu iken tikong ti ti nde, abane meme u som ana-ba kanjag.

¹⁶ “Ame Yesu ti tom atom-m ba ti awu na ri tan ira yine te ni ande na Rimam. Ame ti si ipab, u si umbae ti fikyi kutxom Dawuda. Ame ti si kititaen ti tsen yag yag ti utencwe.”

¹⁷ Kusung ti Saen kyag, ti Unda ishe, ri baa, “Ba.” Unde ti a ku fxen ira yine, awu ā cwe baa, “Ba.” Unde ti a ku fxen te unwaen, awu ā ba. Awu a ku sha, awu ā ba mbe ambyi unyang ti a ku jab-ba wu jab be.

Ira ti Ricwunnkyi

¹⁸ Unde titini ti ku fxen ira iskin ti ya ti ta uwae kutsingken wune, ame Yohana ku fwa wu kusen baa, unde ti a ri kyi ira iki fa ira ti a bae si uwae kutsingken wune, Rimam u sa ujwunn ira titibi ti a bae uwae kutsingken wune si wu risu.

¹⁹ Cwucwo unde ti a ko si ira ti a bae uwae kutsingken wune, Rimam u jwaeru kutunn-wu uwae awaen ituku na unyang uwae uka ti sisaen, ti a bae ira risu-yi uwae kutsingken wune be.

²⁰ Unde ti ku ri ira risu meme iken yine ri baa, “Kubenti, ame u tsi-m tsi be u ba.” Ayi ā si ahan. Ba-fu, Itsekuru-ti Yesu!

²¹ Itinyang na Itsekuru-ti Yesu Kristi ā te ni som tetso, meme-ni. Ayi ā si ahan.