Ititatso 21 - Kutsingken Ira Rimam ti Saen Kyag

Apupwen ti Utense Tishe

¹ Isim ayine, ame sae apupwen tishe ti utense tishe, ikyaen ti, apupwen ti kucang ti utense ti kucang wur ru pu yi. Uyinn ama ta-wu cwucwo be.

² Ame sae Uka ti Sisaen, ti si Urushelima tishe, sī uwog Rimam apupwen ku ba. A kyae nyang tag wu pangma unda ishe ti som ku ji ubaen-wu.

³ Cwucwo ame fxen ujwin tiyang ru kutxomkwe ba, ku ri baa, “Nung! Uwog ti som na Rimam ti ande ta tetso. Awu u te ba som tetso. Aba u si ande-wu, awu ama u si Rimam-ba.

⁴ Awu u fen na ba aten ayib. Aba u cwu-ba cwu cwucwo be, ricwu ti ti ten ti ira ti jwub ama u ta-yi cwucwo be. Acaeb u ye-yi aba cwucwo be, ikyaen ti ayine si iken ti kute ti wur ru pu yi.”

⁵ Awu unde ti somtsa kutxom ukwe ri baa, “Nung, tine ame ku kyae meme iken, tishe.” Awu ri kyi baa, “Bae ira yine, ikyaen ti, ayi si ira ti kubenti, tikong ta-yi atang be.”

⁶ Awu ri kyi te m baa, “Ayi nde pu yi. Ame ti si ti kucang u si ti ricwunnkyi. Ande ti unwaen a ye ba, ame u txi ambyi isatsub na unyang, na ba uwae rinyangwae.

⁷ Unde ti a ci rika, awu u ci rifunn itse uwog-m, ame u si Rimam-wu, awu ama u si umbae-m.

⁸ Amaa, ande ti ku kyen ikyenricwu, ti ande ti ru ba uwae kinjo be, ti ande ti kambeb pu ba uwae ikentitibi, fa ti ande ti ku wen ande, ti ande ti ku nae iyag ti amae, ti ande ti kisi, ti ande ti ku fen apxin, ti meme ande ti ku wer rifen, uwog ti som-ba ta uwae uvum urwa ti ku ten ku jim-yi jim be! Ayine si iticwu ti fa ti apu-ifaen.”

⁹ Tiri ame nung kinjo uwae atom itsongfaen ti ye su kuseb ti munn te kujwūnn kicaeb titibi ti tsotso itsongfaen. Awu ru ba ri te m baa, “Ba, ti m tso fu unda ishe na Mbae Utam.”

¹⁰ Uwae Kusung, awu ye ra m tso fe kitaen rikwen ti kob timambe, u ka tatso m uka ti Urushelima ti Sisaen ti ru apupwen uwog Rimam si ku ba.

¹¹ Awu site riyinn Rimam, u ku jae kag kag kag pangma kutxom jaspa ti rab timambe, u saen pangma kutxom ti ti tsen ti unde u ndetu ti u sae uwe atang.

¹² Ukoh ti a mbye pakob wu, kyìnn u kob si-yi ti ti ri be, u site ufu rijwe asu ifaen. Ufu titini uwae ufu rijwe asu ifaen yine, site atom-wu ti ku nungkyi wu. A bae rinyi anyisu Isirela rijwe asu ifaen ti kinjo ti kinjo ijwe ufu yi.

¹³ Uwe usir ti kiskinn site ufu ita, usir ti ureb site ufu ita, isku site ufu ita, isi site ufu ita.

¹⁴ Atxom ti a tā imbyi kupwe wu te yi, ka rijwe asu ifaen, ama a bae rinyi atugbug Mbae Utam rijwe asu ifaen ijwe-yi.

¹⁵ Atom wu ti ri ira te m, ye su ukum kumyae na zinariya ti wu kaa myae uka wu, ti kupwe-wu, ti ufu-wu meme.

¹⁶ Uka wu nae ikub inje, rikob-wu ti riyaen-wu si iken kinjo. Awu myae uka wu te ikum kumyae-wu, ayi ka numba kumbub rijwe asu ifaen. Riwae-wu, ti rikob, ti riyaen-wu ama pang atso.

¹⁷ Isim ayine, awu myae ukoh wu, ama ayi ka kutun kujwo ukob kinjo ti mae ifaen ka mbe inje. Kutun kujwo wu ti awu sa myae atang ti ukum ti ku myae iken atang utense pang atso.

¹⁸ A mbye ukoh wu te atxom jaspa. Uwae uka ti kitaen-wu ama, a mbye wu te ayib zinariya ti tsen yag yag pangma kutxom ti ku jaen ku yênn yênn.

¹⁹ Atxom ti a ta imbyi ukoh te wu, a kyaenyang yi ti atxom ti tsotso ti tinyang. Kutxom ti kucang si jaspa, ti putsa, a mbye wu te atxom safaya, ti ita, a mbye te agate, ti inje, a mbye wu te emeral,

²⁰ ti itsong, a mbye wu te oniki, ti itsongnjo, a mbye wu ti karneliyann, ti itsongfaen, a mbye wu te kirisoli, ti itsongta, a mbye wu te beril, ti fa ti itsongnje, a mbye wu te topazi, ti rijwe, a mbye wu te kirsopiras, ti rijwe asu kinjo, a mbye wu te jasin, ti rijwe asu ifaen, a mbye wu te amatis.

²¹ A mbye ufu rijwe asu ifaen yine te atxom ti tsen ti tinyang. Ufu titini, a kyae wu te kukóng kutxom ti tsen ti tinyang kinjo. Fengo uka wu, a kyae wu te ayib zinariya ti tsen yag yag pangma kutxom ti ku jaen ku yenn yenn.

²² Ame nung-m kusog Rimam uwae uka wune be, ikyaen ti, Rimam Itsekuru-ti ti site kuko patag, ti Mbae Utam, aba ti si kusog wu ti risu-ba.

²³ Uka wu ku sha-wu uwog ti saen na usir ko ushaen be, ikyaen ti, riyinn na Rimam nda wu saen paenine. Mbae Utam wu ama ti si fitila uka wu.

²⁴ Uwae uwog ti saen-wu, ande ti utense u kyang ikyin atang. Akwe ti utense u ba ti kuko-ba, u ba sang atang.

²⁵ A u cwunn-ba ufu wu cwunn usir iki be, ikyaen ti, utitang u ta-wu atang be.

²⁶ Aba u su riyinn ti rifunn na utense meme, ba sang uwae uka atang.

²⁷ Amaa, iken iki ti ajib u sang-yi uwae uka atang be. Unde iki ti ku nde iken ti ku txi iyib, ko ti tikong, u sang ka-wu atang be. Nyáng ande ti a bae rinyi-ba uwae kutsingken na unyang na Mbae Utam, ti u sang ka uwae uka atang.