Ititatso 18 - Kutsingken Ira Rimam ti Saen Kyag

Itimbubsi na Babila

¹ Isim ayine, ame nung atom iki si apupwen ku ba. Awu si ku ba ti kuko ti siskeb, ama riyinn-wu nda utense meme saen par par par.

² Awu ri ira tso ti ribom baa, “Awu mbubsi! Uten Babila tiyang mbubsi pu wu! Babila kafe pu wu uwog ti asung titibi ti mbacwú ku som atang. Meme itso iken ti ku txi iyib, ti akako inung titibi, ti ibye ti rimang, ku som atang.

³ Ikyaen ti, meme ambukwen ande ngwa pu ba ambyi na amae ti nae-wu ayi. Abikwe ti utense nae pu ba amae te wu. Ande kijab ti utense patag nde rifunn ikyaen ti, awu ku kwae rifunn na iyag-wu shag ba.”

⁴ Ama ame fxen afxenjwin iki si apupwen ba ku ri baa: “Ande-m, ni ruye runwan-wu! Ni sa kujwo fa-ni uwae ikentitibi-wu ti awu ku nde be, be, ani u fa uwae rikaen ti u tu wu.

⁵ Ikyaen ti, ikentitibi-wu txir atso ka sang ti apupwen, Rimam ama tangsom pu wu ikentitibi-wu.

⁶ Ni pae na wu pangma ti awu pae na ariki. Ni pae na wu atsepu ifaen, kujwo wande-wu. Iken ti ngwa ti awu fxaen na ni, ni fxaen na wu atsepu ifaen.

⁷ Ti awu yetso risu-wu uwae usom ti som na amae ti nae-wu ayi, ti mbwe-yi ama, myae na wu kitu kumyae na rikaen ti ricwu ti jwub, ikyaen ti, awu myae tsi uwae utob-wu baa, ‘Nee ame ti som pangma uwa ukwe. Ame si-m uwa icwu be. Ame u jwub-m ricwu ama be.’

⁸ Ikyaen yine, Rimam u yaen rikaen ti tsotso si wu uwae usir kinjo, iticwu, ricwu ti jwub, rimenn. A u twen mbub wu te urwa. Ikyaen ti, Itsekuru-ti Rimam ti pwen wu rikwen yine si Rimam ti kuko.”

⁹ Abikwe ti utense ti nae amae, u ci rifunn amae yi te wu, aba u pù nae ukunn ricwu kiye ti aba a sae akyang urwa ti ku tso uwog ti a ku twen wu atang.

¹⁰ Ikyaen ikyenricwu, aba u tsi ti fengo ti rwen ku ri baa, “Kukuuwu, kukuuwu! Afu uka tiyang, afu uka ti kpakang, Babila! Uwae kiye kpang, a twenji-fu!”

¹¹ Ande ti kijaeb ti utense jwub ricwu-wu ama, ikyaen ti, kijaeb ta-yi cwucwo be.

¹² Isu zinariya, ti azurfa, ti atxom ti ku jaen wur wur, ti asuwa, ti itso atupwa ti tsen ti tub ter ter, ti itso atupwa tibyir, ti itibyaen ti tinyang, ti itso atupwa ti ku yenn, yenn, yenn, ti ayi ti bae skì skì skìr. Meme itso ituku ti ku nung kuyang ti rimang, ti isu ti a kyae yi te anyi inji, ti ituku ti site kiser, ti isu ti a kwen yi te akyabser tibyaen ti itibyir ti isu ti a kyae yi te atxom titsen.

¹³ Cwucwo ti ayi isu ti ku nung kuyang, ayi umung sinamunn ti kardamon, ti kindob murr, ti umung frankisi, ti isu wuci, ayi ambyi anam, ti kindob, ti umung wiit, ti indag, ti iwentam, ti kakum, ti kuskus ti kya fa kakum, ti rimenn ijwe ande ti si apyi. Ayine tatso baa, a na ku jabci te unyang ande.

¹⁴ “Meme iken tinyang ti utob-fu tsi atang, ta-yi cwucwo be, rifunn-fu ti iken kindab-fu, a pu yi ru pu ba, ti afu u tu-fu ayi cwucwo be!”

¹⁵ Ande kijab ti utense patag, ti nde rifunn ikyaen ti awu ku kwae rifunn na iyag-wu shag ba, aba u kyen ikyenricwu. Aba u tsi ti fengo ti rwen ku nyí ukwae ku jwub ku tae, ku ri baa,

¹⁶ “Kukuuwu, kukuuwu, uka tiyang, ti a kyae wu te kutupwa ti aser ti rikaen-yi txi txi txi, u pu isu zinariya, ti atxom ti ku jaen wur wur, ti akyabser u kyae wu kindab atang!

¹⁷ Uwae kiye kpang, meme rifunn yi twenji.” Meme ande ti uwe na ayae tiyang ti ta uwae uyinn, ti ande ti ta uwae-yi, fa ti ande ti ku jwo ayae, ti ande ti tsitsi ti ku tu itici ti itingwa-ba uwae uyinn, aba tsi rurwen.

¹⁸ Kiye ti a sae akyang urwa ti ku tso uwog ti a ku twen wu atang, aba taen ira u ri baa, “Uka iki ta atang ti pangma uka wune a!”

¹⁹ Aba mbub ibung risu-ba, u jwub ira u ten ri ten, u ku ri baa, “Kukuuwu, kukuuwu, awu uka tiyang ti meme ande ti site ayae, u ku kyang uwae uyinn, kafe ande ti rifunn ikyaen-wu. Uwae kiye pang, meme rifunn-wu ayine twenji tag.”

²⁰ Ni kam ashwu ti ni pam ipam, ani ti ta apupwen, risu ititwenji na uka wune, fa ti ani ande Rimam, ti atom, ti ande ti ku ya iskin ira Rimam. Nung! Rimam yir pu wu rikwen ikyaen iken ti awu nde te ni.

²¹ Ama atom ti rurob iki ye ra kutxom ti si pangma ricwo tiyang, u sa jwunnsi uwae uyinn, u ri baa, “Ayine si iken ti aba u nde te uka Babila tiyang. Aba u ye ra wu jwunnsi ti ribom, ama ande u nung kyi-ba awu cwucwo be.

²² Babila! Ande u yang-ba akyang ti ikob ti guge ti kufwa ti kutumu uwae-fu cwucwo be. A u tu-ba unde iki ti ku kyae iken uwae-fu cwucwo be. Unde iki u fxen-wu ikya ricwo uwog-fu cwucwo be.

²³ Aba u nung-ba urwa fitila uwog-fu cwucwo be. Aba u fxen-ba afxenjwin unda ishe ti ubaen-wu uwog-fu cwucwo be. Ti kute ande ti kijab-fu si ande ti site kuko siskeb uwae utense. Uwae iken ti kimbag ti ku fur ayib, afu kyaefa meme ande ti ta utense patag.”

²⁴ A yaen mbub anying na ande ti ku ya iskin ira Rimam ti ande na Rimam ti tsitsi uwae uka atang. Meme ande ti a wen ba uwae utense ike, anying-ba ta risu-fu, afu uka ti Babila.