Ititatso 16 - Kutsingken Ira Rimam ti Saen Kyag

Atom Itsongfaen Yaen Kicaeb Si Utense

¹ Isim ayine, ame fxen afxenjwin ku ri ira ti ribom uwae kusog Rimam. A ri te atom itsongfaen bane baa, “Ni ru ti ni ka yaen rinae Rimam ti ta uwae kuseb itsongfaen yine si utense.”

² Atom ti kucang ru ka yaen ana-wu ti ta uwae kuseb-wu si utense, ama ribang mbyìr tso kyife rimenn ande bane meme ti site iwaen ibye titibi wune, ti ande ti ku fen apxin ti awu mbye tsi.

³ Atom ti ifaen yaen ana-wu si risu uyinn. Ambyi kafe pangma anying rukom ti cwurr. Meme iken ti ku nyang unyang uwae uyinn atang cwu tag meme.

⁴ Atom ti ita yaen ana-wu si uwae unyim, ti uyáng, ti ukab, ti isatsub, ama meme-yi kafe anying.

⁵ Ame fxen atom ti ta risu ambyi ri baa, “Itsekuru-m ti Saen Kyag, afu ti si tine, u si ti kute. Afu nde kubenti uwae rikwén yi ti afu pwen risu ande bane.

⁶ Aba yaenmbub anying ande Rimam, ti ana ande ti ku ya iskin ira-fu Rimam, ikyaen ayine, afu ye anying na ba ti a na ngwa. Ayi si kujwojang ti pang atang.”

⁷ Ame fxen kyi kuta cwe baa, “Itsekuru-m Rimam ti kuko, rikwen-fu, si rikwen ti kubenti.”

⁸ Isim ayine, atom ti inje yaen ana-wu ti ta uwae kuseb-wu si risu usir, ama ayi nda ayam usir fxab ande.

⁹ Ayam usir fxab ande bane, ama ijwe-ba ku wuwaen. Aba txun mbeb rinyi Rimam ti site kuko risu rikaen titibi ti tsotso yine. Aba kafe isim ta-ba ikentitibi-ba, u nda Rimam kuko be.

¹⁰ Ama atom ti itsong yaen ana-wu si risu kutxom ukwe ibye titibi wu. Kufub sikyi tag kujwokwe-wu. Ande ba ti ta atang kub kujwo anyi ikyaen na rikaen ti aba ku ngwa.

¹¹ Aba txunmbeb Rimam ti ta apupwen ikyaen rikaen, ti ribang mbyìr ti tso kyife ba rimenn. Ko ti iken yine tu ba, aba kafe isim ta-ba kujwo wande titibi-ba be.

¹² Isim ayine, atom ti itsongnjo yaen ana-wu si uwae uyinn Yufiretis. Ambyi uyinn wune fenwam, u ya fengo ta ti abikwe ti ta uwe usir ti kiskinn, u ba putsa atang.

¹³ Ama ame sae asung titibi ita ti pangma arukum. Aba ruye unju usang ti ricwu wu, ti unju ibye titibi wu, ti unju unde ti ku ya iskin ira tikong.

¹⁴ Ayi si asung titibi ti ku nde iken ti kimbag u ku ru yi uwog abikwe meme ti ta utense, ti a ka kunn byir ba ikyaen ti a na ka ta rika usir tiyang na Rimam ti site kuko patag.

¹⁵ “Nung, ame ru ku ba pangma unde ti riyib! Itinyang ā si ana unde ti som ti ujwin u sī arun-wu ti atang, ikyaen ti wu kyang-wu ribam u wae-wu rukwae uwe ande be!”

¹⁶ Tiri, asung ita yine kunn byir akwe bane uwog iki ti a ku kunn wu ti unju Mbaibrane baa, Armagedon.

¹⁷ Isim ayine, atom ti itsongfaen yaen ikenti ta uwae kuseb-wu si ufunn, ama afxenjwin ti ribom iki ruye uwog kutxom ukwe uwae kusog Rimam baa, “Ayi nde mam pu yi!”

¹⁸ Ti ritsen imam ku jaen wur wur, ritum ku tum, imam ku taen, utense ama ku kyi ijwe. Ti ti Rimam kyae unde, utense kyi ji-wu ijwe pangma ti awu kyi kiye wune be.

¹⁹ Uka tiyang wu kata ambub ita. A twenji tag uka tiyang tiyang ti ta utense patag. Rimam tangsom te uka Babila ti kuko, u nda wu ngwa tag ambyi itu na rinae-wu ikyaen ikentitibi ti awu nde.

²⁰ Meme riben ti nae fa kutampwa uyinn sī yib uwae ambyi, rikwen ama yagta.

²¹ Akóng upwen ti rikem ti rikem jwunnsi ba risu ande, ama aba txunmbeb Rimam ikyaen kubyagkwa rikaen ti aba ta uwae-yi, ikyaen ti, rikaen yi beb, si-yi ti ti ri be.