Ititatso 15 - Kutsingken Ira Rimam ti Saen Kyag

Atom Itsongfaen Ye Su Kicaeb Titibi

¹ Tiri, ame sae iken iki ti ku fur ayib, ti ku wub ijwe, nde apupwen. Atom Rimam ti apupwen itsongfaen, ye su kujwūnn titibi itsongfaen ti si ti ricwunnkyi. Ayine ti u mam tag rinae na Rimam.

² Isim ayine ame nung iken iki ti pangma ambyi uyinn ti ku jae wur wur pangma iken ti ku sae uwe, naafa te urwa. Ama meme ande ti ci pu ba rika risu usang ti ricwu wu, ti apxin ti awu kyae, ti numba-wu, tsi unju uyinn wu ti ku jae ma iken ti ku sae uwe ne, u ye su afwá Rimam kujwo-ba.

³ Aba yang akyang Musa, upyi Rimam, ti akyang Mbae Utam wu. Aba ku yang baa, “Itsekuru-ti Rimam ti skeb titag, wande ajwo-fu si iken ti kuko ti ku fur ayib, ku wub ijwe! Ukwe ambukwen ande meme, fengo-fu si ti kubenti u pang ti ande u putsa atang.

⁴ Itsekuru, Aye wu ti u kyen-wu afu be? Aye wu ti u pyir, u teb-wu riyinn-fu be? Afu amam ti si ti saenkyag. Meme ambukwen ande utense u ba fen fu. Kujwo wande-fu ti kubenti, tso pu yi ijwe-yi paenine.”

⁵ Isim ayine, ame sae kufug úfunn ti apupwen mbub tita,

⁶ ama atom itsongfaen, aba ti ye su kujwūnn titibi itsongfaen, ruye uwae kufug wu. Aba si arun ti tsen porr porr, u yir atupwa zinariya ti fyar, kikog-ba.

⁷ Tiri kinjo uwae iken inje ti ku nyang unyang yine, nda atom itsongfaen bane, kitu itsongfaen, ti munn te rinae Rimam, awu ti tsi yiyer.

⁸ Kusog Rimam wu munn kyi ti akyang urwa, ti ruye uwae riyinn ti kuko na Rimam. Unde iki sang tu-wu kusog wu be, se isim ti rikaen ti tsotso itsongfaen ana atom Rimam yine a mam pu yi.