Ititatso 14 - Kutsingken Ira Rimam ti Saen Kyag

Mbawentam ti Ande ti Putsa wu

¹ Ama ame sae ti m nunung, Mbae Utam wu tsi tsa risu Rikwèn Siyon, uka ti Urushelima. Ande ti funn atang te wu ka ande kumbub rijwe asu ifaen atsepu rijwe asu ifaen (144,000). Aba si ande ti a bae pu ba rinyi Mbae Utam wu ti rinyi Itse-wu kutxuwe ba.

² Ame fxen afxenjwin si apupwen ba ti ritum pangma ambyi ti ku si utae, ti imam ti ku taen. Ayi ru ritum ana ujwunn ande ti ku byinn kufwa.

³ Aba ku yang kukyang tishe uwe kutxomkwe wu, uwe iken ti ku nyang unyang inje ti uwe ande ndufu ba ti ta atang. Unde iki u kwen tu-wu kukyang wu be, se aba ande kumbub rijwe asu ifaen atsepu rijwe asu ifaen ba ti a jaeb mbe ba uwae utense amam.

⁴ Aba si ande ti kam ndembeb-ba ijwe-ba yi anda ti nae be, ti som cwucwe. Ayi si abane ti ku putsa Mbae Utam ko aka ti wu a ku ru meme. A jaeb mbe pu ba ande bane uwae ande ti utense. Aba pangma usen wuci ti a pu na Rimam, u pu na Mbae Utam wu.

⁵ A tu ji-ba ira ti rifen unju-ba be, aba site-ba ti riraen be.

Atom Rimam ti Ya Iskin Ira Rikwen ti Pwen

⁶ Ama ame sae atom iki ku pinn apupwen akwen u ku ru te Ira Tinyang ti tsi kukunn ti wu kaa tsag te ande ti utense. Awu sa ira yi ku ba ikyaen utso ande meme ti kumbub ande meme ti rishi ande meme ti ande ti unju-ba txi txi txi uwae utense.

⁷ Awu ri ira ti ribom baa, “Ni kyen ikyenricwu Rimam, ti ni nda wu kuko, ikyaen ti, kiye rikwen-wu ta ajwo. Ni fen Rimam, awu ti mam apupwen ti riben ti uyinn ti ukab meme.”

⁸ Atom iki ti fa ti ifaen putsa awu ti kucang, u ku ri baa, “Babila jwunnsi pu wu! Babila uka tiyang mbub si pu wu! Awu unda wu ti kyaefa meme ande utense u nda ba ngwa ambyi itu na amae ti nae-wu ti byag kukwan.”

⁹ Atom iki ti fa ti ita rwae rifab ayi ifaen ti kucang. Awu ku taen ira baa, “Unde ti a fen ibye titibi wune, ti apxin wu ti awu kyae, u yer iwaen-wu kujwo-wu ko kutxuwe-wu,

¹⁰ awu ama u ngwa kang ambyi itu rinae Rimam ayib-yi, ti a fu-ba yi fu be. Awu u ngwa yi uwae kitu na utob ti ndembeb na Rimam. Meme ande ti a nde iken yine, a u nde ba rikaen uwae kumung urwa ti ku twen uwe atom Rimam ti sisaen, ti uwe Mbae Utam wu.

¹¹ Urwa ti akyang u fxab ba, u tso tsig tsig tsig yi apupwen, ititsikunn-yi ta-yi be. Unyang ti pu u ta-yi ikyaen na ande bane be. Utitang ti usirtaen aba u tsikunn rikaen ti ngwa, ikyaen ti, aba fen ibye titibi wune, ti apxin ti awu kyae tsi, u yer iwaen na ibye titibi wu rimenn-ba.”

¹² Ayine si itikunn uwog ande Rimam ti sisaen, aba ti ku ye su icwe Rimam u tsi kukunn ti ku ru uwae kinjo uwog Yesu.

¹³ Tiri ame fxen afxenjwin si apupwen ba, ku ri baa, “Bae iken yine: Ti tinyang ā si ana ande ti cwu fengo Itsekuru-ti Rimam.” Kusung ti Saen Kyag cwe baa, “Een, kubenti! Ayi si ahan ara! Aba u pu unyang uwae wande-ba ti ribom, ikyaen ti, kujwo wande-ba u putsa ba.”

¹⁴ Ama ame sae, ti m nunung, kubyi ti ti tsen ba tsi. Unde iki somtsa kubyi wu pangma umbae unde, u bur ubur ukwe na zinariya, u ye su kisim ti wuwob kujwo-wu.

¹⁵ Tiri atom iki ruye kusog Rimam, u ri ira ti ribom te unde wu ti som tsa kubyi wune baa, “Sa kisim ti wuwob-fu ka bunn wuci, ikyaen ti, kiye wuci ti bunn nde pu yi. Utense ben tag pu wu ti ti bunn.”

¹⁶ Tiri awu ti somtsa kubyi, sa kisim-wu yang ru uwae utense, ama wuci ti utense bunn tag.

¹⁷ Cwucwo ame nung kyi atom iki ruye kusog Rimam ti apupwen. Awu ama ye su kisim ti wuwob, ti cin timambe.

¹⁸ Atom iki ti ta te kuko risu urwa, ruye uwog kuta ti fen Rimam ba, u ri ira ti ribom te atom ti ye su kisim ti wuwob, u cin fenfen baa, “Ndabta kujwo ti yer awaen ituku anam ti utense, ikyaen ti, ayi ben pu yi.”

¹⁹ Ikyaen ayine, awu atom wu ndab ta kujwo-wu ba utense, u bunn pu awaen ituku anam, u pu jwunnsi uwog ti a ku kam ambyi-yi atang, ti si kukwae rinae Rimam.

²⁰ A ka ceb awaen anam yi, yi isim uka. Rijang anying ti ruye atang si afxen itsong, rurwen uwog ti anying yi pang ka tsikunn atang ama ka numba ukob kinjo ti mae inje mbe inje (184).