Ititatso 12 - Kutsingken Ira Rimam ti Saen Kyag

Unda ti ku Pwe Umbae

¹ Isim ayine, iken ti ku fur ayib gbug nwunn apupwen. Unda iki tsi atang. Kutupwa ti si-wu si usir, ama ushaen ta askab kufxen wu. Awu bur ubur ukwe ti site atitaen rijwe asu ifaen.

² Awu site rishwu, ku pwe umbae, ku tae, ku jwub, ikyaen cicaeb umbae ti mbae.

³ Iken ti ku fur ayib iki gbug nwunn kyi apupwen. Ti m nunung, Usang ti ricwu, ti byaen nwameme, u site risu itsongfaen ti ishin rijwe, u bur ubur ukwe, ba tsi.

⁴ Ukyén-wu shir pu atitaen kujwo kyab kinjo jwunnsi ba yi utense u yata kujwo kyab ita tsi ti atang. Usang ti ricwu titibi wu, tsi uwe unda wu ti ku pwe umbae wune ikyaen ti, kiye ti unda wu a mbae pu wu, awu na u kwerra umbae wu menn si.

⁵ Unda wu mbae umbae ti urom. Awu u nae ukwe risu utense u tae wu ti ukum ukwe-wu na kiser, ti wu u tae utense atang. Ti ti unda wu mbae ra umbae wu, a shir fwer ra umbae wu tso yi uwog Rimam, uwog kutxomkwe-wu.

⁶ Ama unda wu ter ka som kutur khika, uwog ti Rimam kyae tsika wu ti wu na som atang, uwog ti a u nung kyi wu ka usir kumbub kinjo ti ukob ifaen ti mae ita.

⁷ Isim ayine, rika pu apupwen! Mikayel te atom ti ta imbyi-wu, ta rika ti usang wune ti afaen ti imbyi-wu.

⁸ Aba ta rika ta ta ta, amaa usang wu ti ande-wu ci-ba rika be, ama uwog ti som ta-yi apupwen ikyaen-ba cwucwo be.

⁹ Awu usang ti ricwu titibi, ti si ikentibi wu ti kute, ti a ku kunn wu baa, ukwe kukyaefa, Shetann, awu ti ku kyaefa ande ti utense, a ye ra wu ti atom ti imbyi-wu meme jwunnsi ba utense.

¹⁰ Isim ayine ame fxen afxenjwin ti ribom apupwen ku ri baa, “Tine Rimam-ti tso pu wu kuko-wu, u nwangru pu wu ande-wu, u ye kujwokwe-wu tsi pu wu. Kristi mbe pu wu kuko-wu. Ikyaen ti, a fur ra ukwe kufxaen, ti tsikunn rikwén ti kunn risu ameinja-ti uwe Rimam, utitang ti usirtaen, jwunnsi pu ba yi riben.

¹¹ Ameinja-ti ci pu ba rika risu-wu ti anying Mbae Utam, ti ira ti kubenti ti a ri risu-wu, ikyaen ti, aba cwé iticwu, u sa unyang-ba tika ikyaen Yesu Kristi.

¹² Ikyaen yine, ni kam ashwu ti ipam ti pam, ani atom ti som apupwen, te iken ti ta uwae-yi meme! Amaa ayi u si iken ti ku nde risi uwog utense ti uyinn! Ikyaen ti, ricwu titibi wune si ba tu pu wu ani uwae rinae ti byagkwan wu, ikyaen ti, awu nung pu wu baa, usir-wu na ba pu wu kumae.”

¹³ Ti usang ti ricwu titibi wune nung baa, a na fur ra wu jwunnsi ba pu ba utense, awu nwunn u rwaetsa unda wu ti mbae umbae ti urom wune.

¹⁴ Ama a nda unda wu asae ifaen na isig tiyang, ti wu na pinn ru yi kutur, uwog ti usang wu u ka tu-wu atang be, asang ita ti ripye.

¹⁵ Tiri usang wune mbub unju ta, u yaen ambyi ru pangma uyinn, ti ambyi na pang ra unda wu na ru.

¹⁶ Amaa, riben ndeya unda wune, u taen ta, u ngwa wam ra ambyi ti ruye unju usang wune.

¹⁷ Ama tiri usang wu tso rinae te unda wu, u pur nwunn ti wu na kaa ta rika te anyisu unda wu ti tsitsi, ti aba ti ye su icwe Rimam, u tsikunn ti ku cwe ira Yesu.

¹⁸ Ama awu usang wu tsi unju uyinn.