Ititatso 11 - Kutsingken Ira Rimam ti Saen Kyag

Ande Ifaen ti ku Ri Unju Yesu Uwae Utense

¹ Isim ayine a nda m ukum kumyae, u ri te m baa, “Sunwunn ti myae kusog Rimam, ti kuta itifen Rimam, ti fu pwen ande ti ku fen Rimam atang.

² Amaa, myae rishen ti pakob kusog Rimam fa-fu atang be. Ikyaen ti, a sa wu na pu ba ande ti nung-ba ira Rimam be. Aba u ceb pu uka ti sisaen na Rimam fa afxen ka ishaen mae ifaen asu ifaen.

³ Ande ifaen ti ku ri ira-m, ame u nda ba ti a u sī arae atupwa, u ya iskin ira-m ka usir kumbub kinjo ti ukob ifaen ti mae ita.”

⁴ Ande bane si ituku zetunn ifaen yi, ti iken fitila ifaen yi, ti tsi uwe Itsekuru utense.

⁵ Asiti unde ti rika-ba iki a ku sha ti wu ta ba ikyàb, urwa u ruye unju-ba u twenji ba. Unde ti a ku sha ti wu ta ba ikyàb, awu u cwu kang.

⁶ Aba site kuko risu upwen, ti a u nda upwen u tsa-wu be uwae kiye ti aba a ku ya iskin ira Rimam. Aba site kuko risu ukab ti unyim ama, ti a u nda ambyi kafe anying, u shir kicaeb ti tsotso ba utense ko kiye titini ti aba a ku sha.

⁷ Isim ti ande-m ifaen bane a ya mam pu ba iskin ira-m, ibye titibi iki u tsoye uwae kukwae ti itikunntsi-yi ta-yi be. Awu u ta rika te ba, u ci ba rika, u wen ba.

⁸ Ama rukom-ba u shag kyife fengo uwae uka tiyang ti a sunn rinyi uten yi baa, Sodom, ti Ejib, uwog ti a kwer Itsekuru-ba atang.

⁹ Uwae usir ita ti ripye, ariki uwae utso ande, ti rishi ande meme, ti unju uten txi txi txi, ti ambukwen ande, u ba sae rukom-ba yine, ama u cwe-ba ti a u pu rukom yi ru ká nji uwae kuskab be.

¹⁰ Ande ti utense u kam ashwu ti ipam ti pam risu iticwu ande ifaen bane, u kan na atso rinyangwae, ikyaen ti, ande ti ku ya iskin ira Rimam ifaen bane nda ande ti utense rikaen ko pang-ba.

¹¹ Tiri isim usir ita ti ripye, Rimam jwu unyang sang ba ruwen. Aba fa sunwunn u tsi ritsen. Ama ande ti nung ba, ikyenricwu ye ba si-yi ti ti ri be.

¹² Aba fxen afxenjwin si apupwen ba baa, “Ni tso ba ike!” Ama aba nwunn tso yi apupwen uwae kubyi, ande ti rika-ba ama, ku sae ba.

¹³ Uwae kiye wu, utense kyi ijwe u taen punn. Kujwo kyab kinjo uwae rijwe na uka wu mbub si u yata kujwo ikyab itsongnje. Ande kumbub itsongfaen twenji, ikyaen utense ti kyi ijwe. Ikyenricwu ye ande ti tsitsi si-yi ti ti ri be. Ama aba teb rinyi Rimam ti apupwen amam.

¹⁴ Iken ti ayae ti ifaen yafe pu wu, tsi tsi ti ita ti ku ba ti uwe.

Kutumu ti Itsongfaen

¹⁵ Isim ti atom Rimam ti apupwen ti itsongfaen kunn kutumu-wu, a fxen afxenjwin ti ribom ku nghae ira apupwen u ku ri baa, “Kujwokwe utense kafe pu yi ana Itsekuru-ti Rimam ti ana Kristi, Unde ti awu Tsab Tsi. Awu u nae ukwe risu utense, ru fife yi uwe.”

¹⁶ Tiri ande ndufu rikom asu inje ba ti somtsa kutxomkwe-ba uwe Rimam, jwunn ikyig, u fen Rimam,

¹⁷ ku ri baa, “Ati ku nde na fu fxaefa, Itsekuru-ti Rimam, ti site kuko patag, Afu Rimam ti si ti tine, u si ti kute, Afu mbe pu fu kuko-fu, u bag pu fu itinae ukwe.

¹⁸ Ande ti utense tso rinae te fu, ama kiye pang pu yi ti rinae-fu u si ba risu-ba ti kubyagkwa. Kiye pang pu yi ti afu u pwen atikicwu rikwen. Afu u nda apyi-fu kujwojang-ba tiri. Aba ti ku ya iskin ira-fu, ti ande-fu ti sisaen, ti meme ande ti ku kyen ikyenricwu-fu, ande ti rurob ti ande ti rob-ba rob be. Kiye pang pu yi ti afu u twenji ande rika-fu ti ku ndembeb utense.”

¹⁹ Isim ayine, ufu kusog Rimam ti apupwen mbubta, ama a sae akpati unju ti yer na Rimam tsi uwae atang. Imam ku taen u ku jaen wur wur, utense kyikyá, ama upwen ku ta ibu.