Itiruye 9 - Kutsingken Ira Rimam ti Saen Kyag

Afùm na Asinn

¹ Ama Yaweh ri te Musa baa, “Ru ka ri te Ukwe baa, ‘Ayine si ira ti Yaweh Rimam na Mbaibrane ri. “Ya ande-m ta ti aba ā ka fen m.

² Afu a pyir-fu ti a na ru ama u ye su kunn ba,

³ Yaweh u ndabta kujwo-wu u tom ujwunn acaeb sang uwae asinn-ni yi risaen ufang. Kakum-ni ti ikyinnsu-ni, ti ikyinnsu-ni ti kumunn isim, ti indag-ni, ti iwen-ni meme u cwu kufum.

⁴ Amaa, Yaweh u sa ice si kutampwa asinn Isirela ti ana ande ti Ejib, ikyaen ti ko kinjo uwae asinn Isirela ā cwu-yi kufum ama be.” ’ ”

⁵ Ama Yaweh sa kiye tsi baa, ucwe, awu na u nde iken yine yi uwae uten wune.

⁶ Ucwe fam-yi, Yaweh nde iken yi ti awu ri. Meme asinn ande ti Ejib cwu kufum. Amaa, uwae asinn anyisu Isirela, ujwunn yi wen-yi asinn-ba kinjo iki be.

⁷ Ama Ukwe tom ande ka sae u nungye baa, asinn anyisu Isirela iki na cwu-wu be. Amaa utob Ukwe yirkyi, awu nda-wu ande ba ti a na ru be.

A Yaen Rimbwe si Ande ti Ejib

⁸ Ama Yaweh ri te Musa ti Aruna baa, “Ni pu itong uwae uwog ti a ku fxab atutong atang munn ajwo-ni, ti Musa ā pu yi yaen tso apupwen yi uwe Ukwe.

⁹ Ufunn u kae itong yi shag kyife uwae Ejib meme, ama ayi u kafe rimbwe, u mbub ribang kyife ande ti ibye meme uwae uten wu.”

¹⁰ Ama aba pu itong yi fa ajwo, u ba tsi uwe Ukwe. Tiri Musa pu itong yi yaen tso yi apupwen, ama acaeb rimbwe mbub shag kyife ijwe ande ti Ejib ti asinn-ba meme.

¹¹ Ande ti kumbog ba tsi tu-ba uwe Musa be, ikyaen ti, rimbwe yi ye ande ti Ejib kwer ti ande ti ici ba meme.

¹² Amaa, Yaweh yirkyi utob Ukwe, ama awu fxen-wu Musa ti Aruna be, pangma ti Yaweh ri te Musa.

Musa Fwa Ukwe Kusen Risu Akóng-upwen

¹³ Ama Yaweh ri te Musa baa, “Nwunn ti kiskinn ru ka tu Ukwe. Ri te wu baa, ayine ti si ira ti Yaweh Rimam Mbaibrane ri. ‘Ya ande-m ta ti aba ā ka fen m.

¹⁴ Ikyaen imi kiye wune, ame u tom rikaen ti beb timambe si fu, ti risu afaen-fu, ti ande-fu ti Ejib meme, ti afu u nung baa, unde na ta-wu utense ti u nde tu te m be.

¹⁵ Á baa, ame na ndabta kujwo-m na byinn fu ti ande-fu ti acaeb kufum, afu ú ta-fu utense cwucwo be.

¹⁶ Amaa, ame ya fu ta ikyaen ti ame na u tso fu kuko-m ti rinyi-m ā kunn ko aka uwae utense.

¹⁷ Afu ku ndub ijwe ti atang, u pyir ti fu nda ande-m ti a na ru.

¹⁸ Nung, ucwe pangma kiye wune, ame u sa upwen tsa ti akóng ti jwunn, ti itso-yi ndeji-yi uwae Ejib khika be, sa ti usir ti Ejib tsi ba sang tine.

¹⁹ Ama tine, Ukwe, nda unju ti a pu meme indag-fu ti meme iken ti afu site ti ta uwae risaen ufang ba sang uwae rukug, ikyaen ti, upwen u tsa u jwunn akóng ti u wen ande ti asinn ti a ta ti ise ko uwae risaen ufang meme.’ ”

²⁰ Tiri afaen Ukwe ti kyen ikyenricwu ira Yaweh, nda apyi-ba fē iken ti shi-ba sang rukug, ama u sang yi kusog.

²¹ Amaa, aba ti saesi ira Yaweh ya apyi-ba ti asinn-ba ta ti risaen ufang.

²² Ama Yaweh ri te Musa baa, “Pu ajwo-fu tso yi apupwen ti upwen ā tsa ti awu ā jwunn akóng si ande ti asinn ti afub ti ta uwae Ejib meme.”

²³ Tiri Musa sa ukum-wu tso yi apupwen. Yaweh nda imam taen ku jae urwa wur wur si ba fe yi riben, ama akong ku jwunn kyife uwae uten Ejib.

²⁴ Akóng yi ku jwunn, imam ku taen ku jae wur wur uwae akóng yi. A jwunn akóng ti a jwunn ji-ba ayi uwae uten Ejib khika be.

²⁵ Akóng yi ndembeb tag iken ti ta uwae utabmae na Ejib wu. Ande meme fa ti asinn, cwu tag. Akóng yi mber tag afub ti ituku ti ta kyife uwae Ejib meme si riben.

²⁶ Si nyang Goshen, uwog ti anyisu Isirela som atang amam ti akóng yi jwunn-yi atang be.

²⁷ Tiri Ukwe tsa kutsa ka kunn Musa ti Aruna u ri te ba baa, “Kiye wune ame raen pu m ira. Yaweh nde iken ti pang atang. Ame te ande-m meme ti raen ira.

²⁸ Jwam Yaweh ti imam yi ti ku taen, ti akóng yi ti ku jwunn ne ā yer tsen. Ame u ya ni ta ti ni ru. Ani u som-ni ike cwucwo be.”

²⁹ Musa ri te wu baa, “Ame a ru ye pu m uwae uten ike, ame u pu ajwo-m tso yi apupwen u jwam Yaweh ti imam yi ti ku taen, ti upwen ti ku jwunn akóng yi ne ā yer tsen tiri. Ama afu u nungye baa, utense wune na si ana Yaweh.

³⁰ Amaa, ame nungye baa, afu na ti ande-fu na ku kyen-ni ikyenricwu Yaweh be.”

³¹ Akóng yi ndembeb atsing filazi ti bali. Kiye wu filazi ku mbub ajwug, bali ama ku waen awaen.

³² Amaa, alikama ti ikyàg ndembeb-yi be, ikyaen ti, ayi ku waen ana yi isim.

³³ Tiri Musa nwunn uwe Ukwe ama u ruye uwae uten wu, u ka pu ajwo-wu tso yi apupwen uwog Yaweh. Ama imam ti ku taen yi, ti upwen ti ku tsa ku jwunn akóng yi yer tsen.

³⁴ Ti Ukwe nung ti imam ti ku táen ti upwen ti ku tsa akóng yer tsen pu yi, awu nde kyi Yaweh ikentitibi. Awu ti afaen-wu yirkyi utob-ba, u kpag risu ku fufa.

³⁵ Ti utob Ukwe kwenkyi ku fufa, awu cwe-wu ti anyisu Isirela na ruye be, putsa ira ti Yaweh ri te Musa.