Itiruye 8 - Kutsingken Ira Rimam ti Saen Kyag

¹ Tiri Yaweh ri te Musa baa, “Ru ka ri te ukwe ti awu ā ya ande-m ta ti a ka fen m.

² Asiti afu a pyir-fu, ame u tom arukum yaen kyi uwae uten-fu meme.

³ Uyinn Nel u munnkyi ti arukum, u tso ba yaen kyife asog ti iwaen-fu ti asog afaen-fu ti ana ande-fu meme, kaa sang fife yi asog ti a ku nde wuci atang. Ayi u ka munnkyi kuseb ti a ku fxab buredi ti uwog ti a ku fxab yi.

⁴ Arukum yi u mbyae tso fu ti ande-fu ti afaen-fu ijwe meme.”

⁵ Ama Yaweh ri te kyi Musa baa, “Ri te Aruna ti awu ā sa ukum yang risu uyinn ti akya-ukab ti rimang ti arukum ā yaen kyife uwae uten Ejib meme.”

⁶ Ama Aruna sa ukum-wu yang risu ambyi ti ta Ejib, ama arukum yaen shag kyife uwae uten Ejib.

⁷ Amaa, ande ba ti ku caen upwen nde ti mbwe-yi yi fengo kumbog-ba, ama u nda arukum yaen shag kyife uwog meme uwae uten Ejib.

⁸ Tiri Ukwe kunn Musa ti Aruna u ri baa, “Ni jwam Yaweh ti awu ā pu ru arukum yine uwog-m ti ande-m. Ame u ya anyisu Isirela ta ti a ru ka twen ikentitwen na Yaweh.”

⁹ Musa ri te Ukwe baa, “Afu a cwe, nda m kiye ti ame u jwam Rimam na fu, ti afaen-fu, ti ande-fu, ikyaen ti arukum yi ā ya ni ta, ti ayi ā ta nyang uwae uyinn Nel amam.”

¹⁰ Ukwe ri te Musa baa, “Nde yi ucwe.” Musa ri baa, “Ame u nde pangma ti afu ri ikyaen ti fu nung baa, apxin iki na ta-wu ti pangma Yaweh Rimam-ti be.

¹¹ Arukum yi u ya asog-fu ti ana afaen-fu ti ana ande-fu ta, u ta nyáng uwae Nel amam.”

¹² Ikyaen yine, Musa ti Aruna nwunn uwe Ukwe. Ama Musa ka jwub ira tu Yaweh risu arukum yi ti awu tom sang uten Ejib.

¹³ Yaweh fxen ira ti jwub Musa u nda arukum yi ti ta uwae asog, ti ayi ti ta fenkyi ukwe, ti ayi ti ta tabmae meme, cwu tag.

¹⁴ Ama aba pu funn yi kucwug kucwug. Ayi nda uwae uten atang ku nung kurwá si-yi ti ti ri be.

¹⁵ Amaa ti Ukwe nung baa, ufunn na ter sang pu wu ijwe, awu yirkyi utob-wu u fxen-wu Musa ti Aruna cwucwo be, pangma ti Yaweh ri.

Sasó Sikyi Uten Ejib

¹⁶ Ama Yaweh ri te Musa baa, “Ri te Aruna ti awu ā sa ukum-wu byinn riben ti sasó ā yaen shag kyife uten Ejib meme.”

¹⁷ Ama aba nde yi. Aruna ndabta kujwo-wu, u sa ukum-wu byinn riben, ama sasó yaenkyi ande ti asinn meme. Meme uten Ejib yaenkyi ti sasó.

¹⁸ Ande ti ici ti ta Ejib kwáb uwae fengo kumbog-ba ti a na u pu ru ye sasó yi, u ndenum. Sasó yi yaen kyi ande ti asinn meme.

¹⁹ Ama ande ti ici ba ri te Ukwe baa, “Ayine si kujwo wande Rimam.” Amaa Ukwe yirkyi utob-wu u fxen-wu aba be, pangma ti Yaweh ri.

Akying Yaenkyi Ejib

²⁰ Tiri Yaweh ri te Musa baa, “Nwunn ti kiskinn fifae ka tu Ukwe kiye ti awu ku si yi unju ambyi, ti fu ri te wu baa, ‘Ira ti Yaweh ri ta re. Ya ande-m ta ti a ru ka fen m.

²¹ Asiti afu a ya ande-m ta-fu ti a na ru be, ame u yaen akying si fu ti afaen-fu ti ande imbyi-fu, ti asog-ni meme. Ayi u shag kyife asog ande ti Ejib fa ti riben uwog ti aba ta atang meme.

²² Amaa, yi usir wu, ame u kag ra Goshen, uwog ti som ande-m, tsi iyen, ti akying yi ā ka-yi atang be, ti fu nung baa, ame Yaweh na site kuko uwae uten wune.

²³ Ame u sa ice si kutampwa-fu ti ande-m. Ucwe, iken ti ku fur ayib yine u nde.’ ”

²⁴ Ama Yaweh nde pangma ti awu ri. Awu yaen akying si kununn Ukwe ti ana ande-wu meme. Uwae uten Ejib munnkyi ti akying.

²⁵ Tiri Ukwe kunn Musa ti Aruna u ri te ba baa, “Ni ru ti ni ka twen ikentitwen yi na Yaweh Rimam-ni ti uwae uten ike.”

²⁶ Amaa, Musa ri baa, “Ayi u nyang-yi ti ati u nde ahan be. Ikyaen ti, iken ti twen ti ati u twen na Yaweh Rimam-ti u si iken ti ku txiyib uwog ande ti Ejib. Asiti ati a twen ikentitwen ti ku txiyib ti ayib ande ti Ejib ba, aba u jwunn-ba ati atxom be a.

²⁷ Ati u kyang ikyin usir ita sang yi kutur kaa twen ikentitwen na Yaweh, Rimam-ti pangma ti awu ri te ti.”

²⁸ Ama Ukwe ri baa, “Ame u ya ni ta ti ani u ru kaa twen ikentitwen na Yaweh Rimam-ni, amaa, ani ru-ni rurwen be. Ni jwam na m itijwam.”

²⁹ Tiri Musa ri baa, “Nung, ame u ru ye ike kaa jwam Yaweh ti akying yi ā ya Ukwe ti afaen-wu ti ande-wu ta ucwe. Ama Ukwe, kyaefa-fu ati cwucwo be, ti afu u ba pyir ti ande ba na ka twen-ba iken ti twen na Yaweh be.”

³⁰ Musa nwunn uwe Ukwe, u ka jwam Yaweh ti wu na pu ru ye akying yi.

³¹ Ama Yaweh nde iken ti Musa jwam, u pu ru ye akying yi uwog Ukwe ti afaen-wu ti ande-wu uwae Ejib. Ko ikying kinjo tsitsi-wu uwae uten atang be.

³² Amaa Ukwe yirkyi utob-wu, u nda-wu ande ba ti a na ru be.