Itiruye 7 - Kutsingken Ira Rimam ti Saen Kyag

Ira ti Tibi Tu Ande ti Ejib

¹ Ama Yaweh ri te Musa baa, “Sae! Ame nda pu m afu ti fu si pangma Rimam uwog Ukwe. Aruna, inja-fu ama u si atom-fu.

² Afu u ri te Aruna meme ira ti ame ri te fu. Awu ama u ri yi te Ukwe ti Ejib ti awu ā ya anyisu Isirela ta ti a na ruye uwae uten-wu.

³ Amaa, ame u yirkyi utob Ukwe, awu u fxen-wu ani be. Ko ti ame u tatso wu iken ti ku fur ayib ti itsotso uwae uten Ejib,

⁴ awu u fxen-wu ani be. Ama rinae-m u si ba risu Ejib beb beb. Ame u pwen ba rikwen ti ribom. Ame u pu ande-m anyisu Isirela ru ye ti kumbub kumbub-ba.

⁵ Ama ande ti Ejib u nung baa, ame na si Yaweh kiye ti ame a ndabta kujwo-m, u tsi ukub te ba, u pu ruye anyisu Isirela kutampwa-ba.”

⁶ Ama Musa ti Aruna nde ti mbwe-yi iken ti Yaweh ri te ba.

⁷ Musa site asang mae inje, Aruna ama site asang mae-inje mbe ita kiye ti aba ri ira te Ukwe.

Ukum Aruna Kafe Ikentibi

⁸ Ama Yaweh ri te Musa ti Aruna baa,

⁹ “Kiye ti Ukwe a ri te ni baa, ‘Ni tso m iken ti ku fur ayib ti u tso kuko Yaweh-ni awu,’ ri te Aruna ti awu ā sa ukum-wu jwunnsi riben uwe Ukwe. Ukum wu u kafe ikentibi.”

¹⁰ Ikyaen yine, Musa ti Aruna nwunn u ru uwog ukwe, u ka nde pangma ti Yaweh ri te ba. Aruna sa ukum-wu jwunnsi riben uwe Ukwe ti afaen-wu, ama ukum wu kafe ikentibi.

¹¹ Ukwe ama kunn byir ande-wu ti ben-ayib, ti aba ti ku caen upwen ti ta uwae Ejib. Aba nde ti mbwe-yi uwae kumbog-ba.

¹² Unde titini sa ukum-wu jwunnsi riben, ama meme ikum-ba yi kafe ikentibi. Amaa ukum Aruna ye pu ana-ba yi meme mennsi tag.

¹³ Ko ti ayi nde ahan, Ukwe yirkyi utob-wu, u fxen-wu aba be, pangma ti Yaweh ri.

Uyinn ti Nel Kafe Anying

¹⁴ Ama Yaweh ri te Musa baa, “Utob Ukwe yirkyi pu wu, awu cwé-wu ti ande ba na ru be.

¹⁵ Kiskinn fifae, ukwe u si unju uyinn. Sa ukum wu ti kafe ikentibi ne, ka tsi ji wu unju uyinn Nel atang.

¹⁶ Ama ti fu ri te wu baa, ‘Yaweh, Rimam na Mbaibrane, tom m atom ba uwog-fu baa, “Ya ande-m ta ti aba ā ru ka fen m uwae kutur kuka. Ba ku kwer ne, afu nae-fu risu riben be.”

¹⁷ Yaweh ri kyi baa, “Ame u tso fu baa, ame na si Yaweh. Nung! Ame u sa ukum ti ta kujwo-m ne byinn risu ambyi ti Nel wune, ama ayi u kafe anying.

¹⁸ Iwag ti ta uwae uyinn Nel wu u cwu. Ama ambyi Nel wu u nùng itso kurwá ti ande ti Ejib u ngwa tu-ba yi be.” ’ ”

¹⁹ Yaweh ri te Musa baa, “Ri te Aruna ti awu ā sa ukum-wu ndab naetsa risu ambyi ti ta Ejib. Ayi ti ta uyinn-ba, ti ukab-ba ti aba taen, ti ukwae ambyi ti aba mum, ti uwog ti ambyi nae atang, ti ayi ā kafe anying, ti anying ā shag kyife uten Ejib meme fa ti ayi ti ta kupám, ti kúm ricwo meme.”

²⁰ Musa ti Aruna nde pangma ti Yaweh ri te ba yi uwe Ukwe ti afaen-wu. Awu sa ukum byinn ambyi ti ta uyinn Nel ama meme ambyi yi kafe anying.

²¹ Ama iwag ti ta uwae uyinn Nel cwu tag. Ambyi wu ama nùng kurwá gbunng ti ande ti Ejib ngwa tu-ba yi be. Anying ama takyi fe uwog meme uwae uten Ejib.

²² Amaa, ande ti kumbog na Ejib nde ti mbwe-yi uwae kumbog-ba, ama Ukwe yirkyi utob-wu u fxen-wu Musa ti Aruna be, pangma ti Yaweh ri.

²³ Ukwe kafe ru yi kununn-wu u sa-wu uwae iki atang be.

²⁴ Ama meme ande ti Ejib mum ukwae kyife unju uyinn Nel ku sha ambyi ti ngwa, ikyaen ti, aba ngwa tu-ba ambyi Nel wu be.

Arukum Munn Kyife Uwog Meme

²⁵ Usir itsongfaen wur ru, isim ti Yaweh nda uyinn Nel kafe anying.