Itiruye 6 - Kutsingken Ira Rimam ti Saen Kyag

Rimam Yer Unju ti Awu u Nwangru Isirela

¹ Ama Yaweh ri te Musa baa, “Tine afu u sae iken ti ame u nde te Ukwe. Ame u tatso wu kujwo wande-m ti ribom, ama awu u tē ba ru ye uten-wu. Een, ame u tatso wu kujwo wande-m ti ribom ama awu u rwae ba ru ye uwae uten-wu.”

² Rimam ri te Musa baa, “Ame ti si Yaweh.

³ Ame tso risu-m uwog Ibrahim ti Ishaku ti Yakubu baa, ame na si Rimam ti site kuko patag, amaa ame tso-m aba rinyi-m ti si Yaweh be.

⁴ Ame yer kyi unju te ba ti ame na u nda ba riben Kanana, uwog ti aba som rikyen atang ne.

⁵ Cwucwo, ame fxen pu m ira ti jwub anyisu Isirela ti nee ande ti Ejib ye ba apyi, ama u tangsom pu m te unju ti yer-m.

⁶ Ikyaen yine, ri te anyisu Isirela baa, ‘Ame ti si Yaweh. Ame u pu ni ruye uwae rikaen kujwo ande ti Ejib ama u saen ni ta uwae usom apyi kujwo-ba. Ame u nwangru ni ti kujwo wande-m ti ribom ama u pwen ande ti Ejib rikwén beb beb beb.

⁷ Ame u paembe ni ti ni si ande-m, ame ama u si Rimam-ni. Ama ani u nung baa, ame ti na si Yaweh Rimam-ni ti nwangru ni uwae rikaen apyi kujwo ande ti Ejib.

⁸ Ame u pu ni ba sang riben wu ti ame ben uben baa, ame na u nda Ibrahim ti Ishaku ti Yakubu. Ame u sa riben wu na ni ti wu kafe rifunn-ni. Ame ti si Yaweh.’ ”

⁹ Musa tsag ira yine meme te anyisu Isirela. Amaa, aba fxen-ba awu be, ikyaen ti, aba num ijwe ti rikaen wande apyi.

¹⁰ Ama Yaweh ri te Musa baa,

¹¹ “Sang ka ri te Ukwe ti Ejib ti wu na ya anyisu Isirela ta ti a ana ruye uwae uten-wu.”

¹² Ama Musa ri te Yaweh baa, “Afu nung, anyisu Isirela fxen-ba ame be, m ba tsitsi ukwe ti u fxen m, ti ame ku ri saen-m ira be ne a.”

¹³ Amaa, Yaweh ri ira te Musa ti Aruna, u nda ba unju baa, “Ni ru ka ri ira te anyisu Isirela, fa ti Ukwe ti Ejib meme, baa ati na u pu ru ye anyisu Isirela uwae uten Ejib.”

Rinyi Ande ti Ishikununn Musa ti Aruna

¹⁴ Ande ti ta risu ishikununn abitse-ba ta re: anyisu ti arom Roben ti si umbae kucang Isirela si Hanoki ti Palu ti Heziron ti Karimi. Aba ti si rishintang Roben.

¹⁵ Anyisu ti arom Simeyon si Jemuwel ti Jamin ti Ohadi ti Jakin ti Zohar ti Shawul, umbae unda Kanana. Aba ti si rishentang Simeyon.

¹⁶ Rinyi anyisu ti arom Lawi ti rishi-ba ta re: Gershon ti Kohati ti Merari. Lawi nde asang ukob kinjo ti rijweta asu itsongfaen ama u sa cwu.

¹⁷ Anyisu ti arom Gershon si Libini ti Shimeyi, unde titini uwae-ba ti rishentang-wu.

¹⁸ Anyisu ti arom Kohati si Amram ti Izhar ti Hebiron ti Uziyel. Kohati nde asang ukob kinjo ti rijweta asu ita ama u sa cwu.

¹⁹ Anyisu ti arom Merari si Mahili ti Mushi. Abane ti si rishentang Lawi ti rishi-ba meme.

²⁰ Amram mbe Jokebed, mbiya itse-wu. Jokebed ama mbae na wu Aruna ti Musa. Amram nde asang ukob kinjo ti rijweta asu itsongfaen ama u sa cwu.

²¹ Anyisu Izhar si Kora ti Nefegi ti Zikiri.

²² Anyisu Uziyel si Mishayel ti Elizafan ti Sitiri.

²³ Aruna mbe Elisheba, umbae Aminadab. Awu mbiya Nashon. Awu mbae Nadab ti Abihu ti Eleyazar ti Itamar.

²⁴ Anyisu Kora si Asir ti Elikana ti Abiyasaf. Abane ti si rishintang anyisu Kora.

²⁵ Eleyazar, umbae Aruna, mbe unda kinjo uwae anyisu Putiyel, awu mbae na wu Finehas. Abane ti ta risu ishikununn abitse anyisu Lawi ti rishentang-ba.

²⁶ Ayi si sí Musa ti Aruna bane ti Yaweh ri te ba baa, “Ani pu Isirela ruye uten Ejib ti kumbub-kumbub-ba.”

²⁷ Ayi si sí Musa ti Aruna bane ti ri ira te ukwe ti Ejib ti awu na ya anyisu Isirela ta ti a na ruye uwae Ejib.

²⁸ Uwae usir wu ti Yaweh ri ira ti Musa yi uten Ejib,

²⁹ Yaweh ri baa, “Ame ti si Yaweh. Ri te Ukwe Ejib meme ira ti ame ri te fu.”

³⁰ Amaa, Musa ri te Yaweh baa, “Afu nung ti ame ku ri tu-m ira sisaen be. Ukwe u nde rimang u fxen m?”