Itiruye 5 - Kutsingken Ira Rimam ti Saen Kyag

Musa ti Aruna Ru Ka Uwog Ukwe

¹ Isim ayine, Musa ti Aruna ru ka uwog ukwe ti Ejib, u ka ri te wu baa, “Ayine si ira ti Yaweh, Rimam na Isirela ri. ‘Ya ande-m ta ti a ru ka nde ukwab na m uwae kutur kuka.’ ”

² Amaa Ukwe rang baa, “Aye ti si Yaweh ti ame u fxen wu, u ya Isirela ta ti a na ru? Ame nung-m Yaweh wu be. Ame u ya Isirela ta-m ti a na ru be.”

³ Musa ti Aruna ri baa, “Rimam na Mbaibrane tu pu wu ati. Ati ku jwam fu, ya ti ta ti ti ru ikyin na usir ita uwae kutur kuka, u kaa twen ikentitwen atang na Yaweh Rimam-ti, be awu u yaen acaeb si ti ko awu u wenji ti ti rika.”

⁴ Ama Ukwe ti Ejib ri te Musa ti Aruna baa, “Ikyaen imi ti ani u pu ra ande bane nwunn wande-ba. Ni kafe ru ti unju wande-ni!”

⁵ Ukwe ri baa, “Nung! Ande-ni jwunn timambe uwae uten ike, ani ku sha ti ni u byangkyi ba ti a na nde-ba wande be.”

⁶ Ti usir wu, Ukwe nda unju na ande ba ti ta risu Isirela baa,

⁷ “Ni nda-ni ande bane ishwunn cwucwo be. Aba ā sha ishwunn wande yi ti ajwo-ba,

⁸ amaa, ni kosi-ni ujwunn biriki ti aba u byinn be. Aba ku nde uyáng, nee iken ti nde aba tsikunn ku jwub baa, ‘Ya ti ta ti ti ru ka twen ikentitwen na Rimam-ti.’

⁹ Ni nda ba wande ti bom skeb ti kucang ti a nde, ti aba ā tu-ba riya ti a fxen ira ti tikong Musa cwucwo be.”

¹⁰ Tiri aba ande ti ta risu wande yi, ti aba ti ku nungkyi wande yi, ru ka ri te ande ira ti ukwe ri, baa, “Ukwe Ejib ri baa, awu na u nda-wu ani isu wande cwucwo be.

¹¹ Ani na ka sha isu yi te ajwo-ni ko aka ti ani a u tu yi atang. Amaa, ani u byinn kang ujwunn biriki ti ani ku byinn kob.”

¹² Ikyaen yine aba sang ko aka meme uwae Ejib ku sha irum ti namtur ikyaen ti a u nde ishwunn te yi.

¹³ Aba ande ti ta risu wande yi ku tsikunn ti ku taenshi ba baa, “Ani u byinn kang ujwunn biriki pangma ti ani ku byinn kob kucang, kiye ti a ku pu na ni isu wande.”

¹⁴ Aba ande ti ta risu wande yi ye ande Isirela ti ku nungkyi wande yi ku kum, u rang ba baa, “Imi ti nde ani byinn tag-ni ujwunn biriki-ni yaka ne pangma ti kucang be?”

¹⁵ Ama ande ti uwe Isirela jwub ira ka tu Ukwe baa, “Imi ti nde afu ku nde apyi-fu ahan?

¹⁶ A sha na-ba ati ishwunn be, amaa a ku ri te ti baa, ati na byinn biriki, u ku ye ti ku kum fa ti atang. Riraen ama si sí ana ande-fu.”

¹⁷ Ama Ukwe ri baa, “Ani si ande ti uyáng, ani ku sha-ni ti ni nde wande be, nee iken ti nde ani ku jwam m ti ani na u ru kaa twen ikentitwen na Yaweh.

¹⁸ Ni kafe ru ka nde wande, a u nda-ba ani isu wande iki be, amaa ani u byinn kang biriki ka ujwunn ti ani ku byinn kob kucang.”

¹⁹ Ande ti uwe na Isirela nungye baa, aba na ta uwae rikaen ti beb timambe kiye ti a ri te ba baa, “Ani u kosi-ni ujwunn biriki ti ani ku byinn kob usir usir be.”

²⁰ Ti aba nwunn uwe Ukwe ku ru, aba ka tu Musa ti Aruna ti som ku ji ba.

²¹ Ama aba ri te Musa ti Aruna baa, “Yaweh ā sae ni, ti awu ā pwen ni rikwen, ikyaen ti, ani sa ti kafe ande titibi uwe Ukwe ti afaen-wu. Ani sa kisum wen na pu ni aba kujwo ti a na wen ti.”

Musa Kafe Ka Byib Rimam Ira

²² Tiri Musa kafe ru ka byib Yaweh ira baa, “Yaweh, imi ti nde afu nde ande-fu ahan? Imi ti nde afu tom m atom?

²³ Ikyaen ti, ti kiye ti ame ka tu Ukwe u ri ira te wu yi rinyi-fu, awu tsikunn ti ku nde ba itibi beb kufufa. Ama afu nde-fu iken iki ti afu u nwangru ba be.”