Itiruye 40 - Kutsingken Ira Rimam ti Saen Kyag

Itiyenwunn Kufug Uwog ti Som Yaweh

¹ Yaweh ri te Musa baa,

² “Uwae usir ti tawe na ishaen ti kinjo, ye nwunn kufug uwog ti som ti a ku fen m awu,

³ ti fu ye akpati unju ti yer wu ka tsi uwae kufug ti a ku fen m wu, ama sa kutupwa kagtsen uwog ti akpati wu u tsi atang.

⁴ Ye tebur ti meme isu-yi sang ka kyae yi tsi, ti kyae fitila yi tsitsa ikentitsi-yi.

⁵ Ye kuta zinariya ti a ku twen iken ti ku nung kuyang atang tsi uwe akpati unju ti yer wu, ti sa kutupwa kyensi ufu ti ku sang kufug uwog ti som Yaweh wu.

⁶ Kyae kuta rinyangwae na ibye ti twen tsi uwe kufug uwog ti som ti a ku fen Yaweh wu,

⁷ ti sa kusan tiyang tsi kutampwa kufug itifen Yaweh wu ti kuta wu, ama txi ambyi si atang.

⁸ Fae iken sang kob utab wu, ti sa kutupwa kyensi ufu-wu.

⁹ “Sa kindob itiyerkob yerkob kufug uwog ti som Yaweh wu ti meme isu ti ta uwae atang, ti ayi ā kafe isu ti ku cwucwe.

¹⁰ Yerkob kwer ti kuta rinyangwae na ibye ti twen ti meme isu-yi, ti ayi ā kafe kuta ti a ku twen iken ti sisaen atang na Yaweh.

¹¹ Yerkob kusan tiyang ti uwog ti tsi-wu, ti awu ā kafe iken ti cwe siskeb.

¹² “Pu Aruna ti anyisu-wu ti arom ba ufu kufug itifen Yaweh wu, ti jwo ba ijwe te ambyi.

¹³ Pu atupwa icwe si Aruna, ti sa kindob ca si wu risu, ti yerkob wu, ti awu ā nde na m wande kukwen.

¹⁴ Pu anyisu-wu ti arom ba, ti fu pu kutupwa ti kupyir ti kukwen ku sa si fa kutupwa-wu, sī ba,

¹⁵ ti yerkob ba pangma ti afu yerkob itse-ba, ti aba ā nde na m wande kukwen. Itiyerkob-ba u tso baa, wande kukwen na sikunn pu yi ana utso-ba.”

¹⁶ Ama Musa nde tag meme iken yi ti Yaweh nda wu unju ti wu na nde.

¹⁷ Uwae usir ti tawe ana ishaen ti kinjo ana kusang ti ifaen, a ye nwunn kufug uwog ti som Yaweh wu.

¹⁸ Musa ye nwunn kufug uwog ti som Yaweh wu. Awu pu ituku ti baen ren tso baen ren tso tsisi iken ti a pu afxen-yi tsisi atang, u pu ituku akasiya ba wong tsa, ama u ye nwunn afwá yi.

¹⁹ Ama pu apwa ibye ti a fufwá burkyi kufug uwog ti som Yaweh wu pangma ti Yaweh nda wu unju.

²⁰ Awu pu afae atxom ifaen ana unju ti yer yi cwu si uwae akpati wu, ama pu ikum ti a su akpati wu fae sang, u sa kubur akpati wu burkyi.

²¹ Awu ye akpati wu sang ka tsi uwae kufug uwog ti som Yaweh wu, ama pu atupwa kagtsen uwog ti akpati unju ti yer wu tsi atang pangma ti Yaweh nda wu Musa unju.

²² Ama awu ye tebur wu sang kufug itifen Yaweh wu, u sa ka tsi uwe kutupwa ti kagtsen uwog ti saen siskeb, yi kujwo isku.

²³ Awu kyae buredi ti ku cwucwe yi cwu nyinyang risu tebur wu pangma ti Yaweh nda wu Musa unju.

²⁴ Ama awu sa iken ti a pu fitila tsitsa atang tsi kujwo isi kufug itifen Yaweh wu, rukwer uwog ti tebur wu tsi atang.

²⁵ Awu bae fitila yi tsi uwe Yaweh, pangma ti Yaweh nda wu Musa unju.

²⁶ Ama awu sa kuta zinariya wu tsi uwae kufug itifen Yaweh wu, uwe kutupwa ti a sa kagtsen kufug itifen Yaweh wu,

²⁷ ama twen iken ti ku nung kuyang atang pangma ti Yaweh nda wu Musa unju.

²⁸ Awu pu kutupwa wu kyensi ufu ti ku sang kufug uwog ti som Yaweh wu.

²⁹ Awu ye kuta rinyangwae ibye ti twen tsi fer ufu ti ku sang uwog ti som Yaweh ti a ku fen wu atang, ama twen rinyangwae ikentitwen, ti ana wuci atang, pangma ti Yaweh nda wu Musa unju.

³⁰ Ama awu sa kusan tiyang tsi kutampwa kufug itifen Yaweh wu ti kuta, ama txi ambyi ti jwo ajwo si atang,

³¹ ikyaen ti Musa ti Aruna ti anyisu-wu ti arom ā jwo ajwo ti afxen-ba atang,

³² Kiye ti a ku sang yi kufug itifen Yaweh wu, ko aba a ba ku fer kuta ti a u twen ikentitwen na Yaweh, aba ku jwo ajwo ti afxen-ba pangma ti Yaweh nda wu Musa unju.

³³ Awu pu atupwa fae sangkob kufug uwog ti som Yaweh wu ti kuta wu, ama pu atupwa yi iki kyensi ufu utab wu. Ama Musa nde tag wande yi.

Kuko Rimam Si Ba Uwae Kutakujwujwu

³⁴ Tiri kutakujwujwu ba kukyi kufug itifen wu ama riyinn Yaweh ba munnkyi uwog ti som-wu meme.

³⁵ Ikyaen riyinn Yaweh ti ba munnkyi kufug ti a ku fen Yaweh wu, Musa sang tu-wu uwae kufug Uwog ti som Yaweh atang be.

³⁶ Uwae meme ikyin ti kyang anyisu Isirela, kiye ti kutakujwujwu a sikyi-wu kufug uwog ti som Yaweh wu be, aba u nwunn kyang ikyin-ba ku ru.

³⁷ Amaa, kiye ti kutakujwujwu a sikyi Uwog ti som Yaweh wu, aba u nwunn-ba ikyin be, se usir ti ayi a tan pu yi titawe aba u nwunn ikyin.

³⁸ Ikyaen yine, uwae meme ikyin ti kyang-ba riyinn Yaweh ku kukyi kufug uwog ti som Yaweh wu pangma kutakujwujwu usirtaen, ama utitang, urwa ku cwe uwae kutakujwujwu wu u ku nda uwog paenine ti meme ishikununn anyisu Isirela ku sae.