Itiruye 4 - Kutsingken Ira Rimam ti Saen Kyag

Rimam Nda Musa Ribom ti Wu Nde Iken ti ku Fur Ayib

¹ Musa rang Yaweh baa, “Asiti ande ba a pyir, u ru-ba kubenti baa, afu na tso risu-fu uwog-m be re?”

² Yaweh rang wu baa, “Imi ti ta kujwo-fu?” Awu ri baa, “Ukum.”

³ Ama Yaweh ri baa, “Sa wu jwunnsi riben.” Musa sa wu jwunnsi riben, ama ukum wu kafe ikentibi. Musa ter nwunn atang.

⁴ Yaweh ri te Musa baa, “Sa kujwo-fu ye wu ti ikyen.” Ama Musa sa kujwo ye wu ti ikyen, awu kafe ukum ti atang kujwo-wu.

⁵ Yaweh ri baa, “Ikyaen iken yine, aba u ru kubenti baa, Yaweh, Rimam na abitse-ba, Ibrahim ti Ishaku ti Yakubu, na tso pu wu risu-wu uwog-fu.”

⁶ Cwucwo, Yaweh ri te Musa baa, “Sa kujwo-fu sang uwae kutupwa-fu.” Ama Musa sa kujwo-wu sang kutupwa-wu. Kiye ti awu sa kujwo-wu ru ye, kicaeb ikum ci tag kujwo-wu u nda kujwo-wu kafe ititsen porr.

⁷ Ama Yaweh ri te wu baa, “Sa kujwo-fu kafe sang ti kutupwa-fu.” Musa sa kujwo-wu kafe sang ti uwae kutupwa-wu. Ti awu sa kujwo-wu ru ye, kujwo-wu kafe ba tsi ti mbwe-yi.

⁸ Yaweh ri baa, “Asiti aba a ru-ba kubenti uwog-fu, ko uwog iken ti ku fur ayib ti tawe be, aba u ru kang kubenti iti ifaen.

⁹ Asiti aba a ru-ba kubenti uwog-fu, ko ti iken ti ku fur ayib ifaen yine be, txi ra ambyi uwae uyinn Nel ti sa yaen mbub riben, ama ambyi yi u kafe anying.”

¹⁰ Ama Musa ri te Yaweh baa, “Itsekuru-m, ame si unde ti rib unju, ku ri tu-m ira nyinyang be. Ti kiye ti afu ku ri ira te m ba ku sang tine, ame ku ri tu-m ira nyinyang be.”

¹¹ Yaweh rang wu baa, “Aye ti nda unde unju? Aye ti ku nda unde tsi atong ko unju? Aye ti ku nda unde sae uwog ko mbub ayib? Ayi si-yi ame Yaweh be a.

¹² Ikyaen yine, ru tine, ame u tso fu ira ti ri, u kwen na fu ira ti afu u kaa ri.”

¹³ Amaa Musa ri baa, “Ame ku jwam fu, Itsekuru-m, tom-fu unde iki atang.”

¹⁴ Uwog wune, Yaweh ndembeb utob te Musa u rang wu baa, “Aruna, inja-fu, urae Lawi ama re? Ame nung, awu ku ri tu ira sisaen. Awu ta fengo ku ba ti wu ba tu fu. Awu a nung fu, utob-wu u saen.

¹⁵ Afu u ri te wu ira ti awu u ri. Ame u ndeya meme-ni ti ira ti ri, u kwen na ni iken ti ani u nde.

¹⁶ Awu u si unde ti ku ri ira kutunn unju-fu te ande ba. Afu u si pangma ame Rimam uwe Aruna.

¹⁷ Ka sa ukum wune ye su kujwo-fu ti fu nde iken ti ku fur ayib te wu atang.”

Musa Kafe Ru Ejib

¹⁸ Musa kafe ru ka tu uyeb-wu Jetro u ri te wu baa, “Ame ku jwam fu, nda m riyae ti m ru kaa nung ande-m yi Ejib, ko aba ta ti unyang.” Jetro cwe, u ri baa, “Ru-fu uwae kujim.”

¹⁹ Ti uwe-yi, Yaweh ri te pu wu Musa uwae uten ti Midiyan baa, “Kafe ru Ejib, ikyaen ti, meme ande ba ti ku sha unyang-fu cwu tag pu ba.”

²⁰ Ama Musa pu uwa-wu ti anyisu-wu somtsa ikyinnsu, u nwunn kafe si Ejib. Awu ye su ukum na Rimam kujwo-wu.

²¹ Yaweh ri te Musa baa, “Kiye ti afu a kafe ka sang pu fu Ejib, nung ti fu nde patag iken ti ku fur ayib ti ame nda fu kpakang ti fu na nde uwe Ukwe. Amaa, ame u yirkyi utob ukwe ti awu u cwe-wu ti ande ba na nwunn be.

²² Ama afu u ri te Ukwe baa, ‘Yaweh ri baa, Isirela si umbae kucang-m,

²³ ama ame ku ri te fu! Nda umbae-m ti awu ā ru ka fen m. Asiti afu a cwe-fu be, ame u wen umbae kucang-fu ti urom.’ ”

²⁴ Ti Musa ti ande-wu ye ikyin ku ru yi Ejib, aba ka si tsi uwog iki ti a nae atang utitang wu. Ama Yaweh myae ti wu u wen Musa.

²⁵ Ama Zipora sa kisim, u tsen kutxin umbae-wu, ama u sa kupwa kutxin wu tekunn kufxen Musa u ri baa, “Anying yine ku tatso baa, afu na si ubaen-m ti kubenti.”

²⁶ Ikyaen yine, Yaweh wen-wu Musa cwucwo be. Ikyaen yine, Zipora ri baa, “Anying kutxin umbae-m ti ame sa tekunn fu ne ku tso baa, afu na si ubaen-m ti kubenti.”

²⁷ Yaweh ri te Aruna baa, “Ru ka tu Musa uwae kutur kuka akwen.” Ikyaen yine, awu ru u ka tu Musa yi rikwen Rimam, ama u ye wu bur utob.

²⁸ Musa tsag te Aruna meme ira ti Yaweh ri te wu ti wu na ka ri, ti meme iken ti ku fur ayib ti Yaweh ri te wu ti wu na ka nde.

²⁹ Ama Musa ti Aruna nwunn ru, u ka kunn funn tag andufu Isirela meme.

³⁰ Aruna tsag te ba meme ira ti Yaweh ri te Musa, ama Musa nde meme iken ti ku fur ayib yi uwe andufu ba.

³¹ Aba ru kubenti, u ku riben u fen itifen, ikyaen ti, aba fxen baa, Yaweh na nung pu wu rikaen-ba.