Itiruye 39 - Kutsingken Ira Rimam ti Saen Kyag

Itikob Atupwa Kukwen

¹ Awu pu itub ti rikàen-yi ru irum titisub ti ti ru itibyaen ti itibyaen, u ndxob atupwa tinyang tinyang na ande ti ku nde wande uwae uwog ti sisaen. Awu ndxob atupwa icwe na Aruna. Ayine meme, a nde pangma ti Yaweh nda Musa unju.

² Awu kob efod wu te itub zinariya ti itub ti rikàen-yi ru irum titisub ti ti ru itibyaen ti itibyaen ti kutupwa lilin.

³ Awu ama pu zinariya kwen ruye yi pangma riyaen kutsing iken, ama taen yi pangma itub ti ndxob ren yi te itub ti rikàen-yi ru irum titisub, ti itub ti ru itibyaen ti itub tibyaen ti kutupwa lilin.

⁴ Aba kob akyab atupwa ti fyarr fxae kajwo efod wu ama pu yi ren tetso,

⁵ ama ndxob kutupwa ti a yir ipyé te itub zinariya, ti itub ti rikàen-yi ru irum titisub, ti itub ti ru itibyaen, ti itub tibyaen, ti kutupwa lilin pangma ti Yaweh nda Musa unju.

⁶ Awu pu atxom onis u kwen zinariya ti pwata ama kyag rinyi anyisu Isirela rutsa atang pangma ti unde ti ku kyag iken ku pab atxom ti tinyang, u ku sur awaen rutsa ijwe-yi.

⁷ Awu pu atxom yi sang unju atupwa ti fyarr yi ti ta fxae kajwo efod wu, ti atxom yi ā tsi kutunn unju anyisu Isirela ikyaen ititangsom. Aba nde ayine meme pangma ti Yaweh nda Musa unju.

Itikob Jifu ti Kukog na Kukwen Tiyang

⁸ Awu kob jifu ti kukog wu ti itso isu ti a nde efod te yi. Awu nde yi ti itub zinariya ti itub ti rikàen-yi ru irum titisub ti ti ru itibyaen ti itibyaen ti itub lilin.

⁹ Awu kob wu pang atso, rikob ti riyaen-wu meme si inci itsongnje itsongnje, ama pxib ren wu ifaen.

¹⁰ Ama nwu atxom ishing inje ru ijwe-wu. Ishing ti tawe si sardiyu ti topazi ti karbunko.

¹¹ Ishing ti ifaen si ishing emeral ti safire ti ana daimon.

¹² Ishing ti ita si ishing Jasinti ti agate ti ametis.

¹³ Ishing ti inje ama si ana beril ti onis ti jaspa. Aba pu yi fxebfa zinariya ti pwata wu.

¹⁴ Ama a bae rinyi utso Isirela rijwe asu ifaen rutsa atxom rijwe asu ifaen yi ti tsi kutunn unju-ba. A kyag rinyi itso Isirela rijwe asu ifaen ba rutsa ijwe atxom yi pangma iken ti a kyag ama sur awaen rutsa ijwe-yi.

¹⁵ Aba shà riyib zinariya pangma iji kya fa jifu ti kukog wu.

¹⁶ Ama a kwen zinariya ti yaen pwata ifaen, ti kunyang ifaen ana zinariya ama pu sang ukub ifaen ti ta risu jifu ti kukog wu.

¹⁷ Aba pu iji zinariya ifaen yi kya fa kunyang yi ti ta ikub jifu ti kukog wu.

¹⁸ Unju iji ifaen yine, aba yir ren yi te zinariya ti yaen pwata ifaen yi te ayi ti ta fxae kajwo ana efod uwe-wu.

¹⁹ Aba kwen kyi kunyang zinariya ifaen, ama pu sang unju jifu ti kukog wu ti ta fer efod.

²⁰ Aba kwen kyi kunyang ifaen ana zinariya, ama pu yi sorfa uwe efod ti ta ikyab ti kujwo isi ana atupwa yi ti fyarr ti ta fxae kajwo.

²¹ Ama a yir ren jifu ti kukog wu ti kunyang ti a pu kyae fa efod te iji ti rikàen-yi ru irum titisub ikyaen ti ayi ā yirbom jifu ti kukog wu ting ting. A nde yine meme pangma ti Yaweh nda Musa unju.

Itikob Arun Akwen ti Tsitsi

²² Awu ndxob arun ti itub ti rikàen-yi ru irum titisub,

²³ ama ndxob ukwae-wu nyinyang ti awu ā shir yaen-wu ti kufe be.

²⁴ Yi kutong kutupwa wu, awu ndxob iken iki pangma awaen ituku pomegranas kyensi atang, ti itub ti rikàen yi ru irum titisub, ti itub ti ru itibyaen, ti itub ti itibyaen, ti kutupwa lilin ti a pu sang pakob kutong kutupwa wu.

²⁵ Aba kwen abubwong te riyib zinariya, ama pu kyensi kutampwa pomegranas yi, ama kob yi skogfa atso skogfa atso pakob kutung kutupwa wu ikyaen ti a ku si kiye ti a ku nde wande uwog ti sisaen uwe Yaweh pangma ti Yaweh nda Musa unju.

²⁶ Aba sa kububwong kinjo tsi, u sa uwaen pomegranas kinjo ama tsi, aba nde ahan pakob unju kutupwa wu ti riben. Awune ti si arun ti kukwen u pu si kiye ti awu a ku nde wande uwe Yaweh. A nde yi pangma ti Yaweh nda Musa unju.

Atupwa iki Ikyaen Aruna ti Anyisu Arom-Wu

²⁷ Cwucwo, aba ndxob kutupwa ti kupyir ti kukwen ku sa si fa kutupwa-wu te itub lilin ikyaen Aruna ti anyisu-wu,

²⁸ ama kob ukāen ti risu, ti kubur, ti benti ti a ndxob yi te itub lilin,

²⁹ ti atupwa ti yir imbyi ti a ndxob yi te itub lilin, ti itub ti rikaen-yi ru irum titisub, ti itub ti ru itibyaen, ti itibyaen, ama kyae kindab rimenn-wu. A nde yine pangma ti Yaweh nda Musa unju.

³⁰ Ama aba kwen riyib zinariya ti pwata, u sa baefa ukàen risu wu, ama bae ru atang baa, “A PU NA YAWEH.”

³¹ Aba sa wu yir uwe ukāen ti risu te itub ti rikaen-yi ru irum titisub pangma ti Yaweh nda Musa unju.

Bezalel ti Ande-wu Nde Tag Wande yi

³² Yi fengo wune, anyisu Isirela nde tag wande kufug uwog ti som ti a ku fen Yaweh wu pangma ti Yaweh nda Musa unju baa, a na nde.

³³ Aba pu isu ti a kyae kufug uwog ti som Yaweh wu te yi ba na Musa. Isu yi si atupwa ti a kyae kufug wu ti meme isu wande ti a ku nde uwae kufug wu, ti ukwàb-wu, ti ituku ti a baen yi rentso rentso, ti uwong-yi, ti afwá-yi, ti iken ti a pu afwá yi tsisi atang,

³⁴ ti apwa iwentam ti a fufwá, ti apwa ibye iki ti tutub, ti a ku pu burkyi wu, ti atupwa ti a pu kagtsen wu,

³⁵ ti akpati unju ti yer ti ikum ti a ye wu, ti kubur-wu,

³⁶ ti tebur ti meme isu-wu, ti buredi ti ku tatso baa a na ta uwe Yaweh,

³⁷ ti iken ti a pu fitila tsitsa atang ti a kyae yi te riyib zinariya, ti fitila-yi ti a pu tsitsa atang, ti meme isu-yi, ti kindob-yi,

³⁸ ti kuta zinariya, ti kindob itiyerkob, ti iken ti twen ti ku nung kuyang, ti kutupwa ti a pu sikyi ufu kufug wu,

³⁹ ti kuta ti a kyae wu te bronzi ti iken ti kuu riye kuu riye na bronzi ti ikum ti a u ye kuta wu te yi, ti meme isu-yi, ti kusan tiyang ti iken ti a ye wu tsitsa atang,

⁴⁰ ti atupwa ti a pu kyensi sangkob utab kufug uwog ti som Yaweh wu, ti iji-yi, ti usúm-yi, ti meme isu ti a u nde wande kufug itifen Yaweh uwog ti som Yaweh wu,

⁴¹ ti atupwa ti a ndxob yi nyinyang ti a u nde wande te yi yi uwog ti sisaen, ti atupwa Aruna ti ana anyisu-wu ti a u si kiye ti a ku nde wande kukwen.

⁴² Pangma ti Yaweh nda Musa unju, anyisu Isirela nde patag wande yi ti mbwe-yi.

⁴³ Ti Musa sae meme wande yi, ama nung baa, aba na nde pu ba wande yi pangma ti Yaweh nda unju baa a na nde, awu wae na ba itinyang.