Itiruye 38 - Kutsingken Ira Rimam ti Saen Kyag

Kuta Rinyangwae Ibye ti Twen

¹ Awu kwer kuta rinyangwae ibye ti twen te ituku akasiya. Rikob-wu si afxen itsongfaen ti ripye, riyaen-wu si afxen itsongfaen ti ripye, rikob-wu ti ritsen si kutun kujwo ita. Riyaen kuta wu ti rikob kuta wu pang atso.

² Awu kyae ishin tso renfa te meme ukub inje na kuta wu, ama shi wu te bronzi.

³ Ama awu kyae meme isu ti a ku nde wuci atang te bronzi. Isu yi ta ti awu kyae ta re: kututong ti a ku kwae itong atang, ti shebur, ti atu tiyaen, ti kufur ti site khika ti a ku ter ibye atang, ti kuseb ti a ku sa urwa atang.

⁴ Awu kwen bronzi ti riyaen wu, ama mbog kiye mbog kiye atang, u ye wu naesi uwae kuta wu,

⁵ ama u kwen kunyang inje sang ikub inje na bronzi ti riyaen wu ikyaen ikum ti a u ye wu atang.

⁶ Awu pab ikum ituku akasiya ama shi yi te bronzi.

⁷ Awu pu ikum yi sang kunyang yi ikyaen ti a u ku ye kuta wu te yi. A kyae kuta wu rung kum ama si-wu te kubur be.

Kusan Ajwo ti Jwo

⁸ Awu kyae kusan tiyang ana ajwo ti jwo ti iken ti a u ye wu tsitsa atang. Awu kyae wu te bronzi ana glasi ti a ku sae ijwe atang ti anda ti ku nde wande ufu kufug itifen pu ba na wu.

A Kyae Utab Uwog ti Som Yaweh

⁹ Ama awu pu atupwa lilin fae pakob utab uwog ti som wu. Awu myae rikob utab wu iyen ti kujwo isi ka afxen ukob kinjo ti mae ifaen mbe rijwe.

¹⁰ Awu pu bronzi kyae iken ti a pu ikum bronzi tsisi atang ka rikom, ama pu ikum yi rikom tsisi atang. Awu kyae ukwàb te azurfa risu ituku yi.

¹¹ Ama iyen ti isku, rikob utab wu ka afxen ukob kinjo ti mae ifaen mbe rijwe. Awu pu bronzi kyae iken ti a pu ikum bronzi tsisi atang ka rikom, ama pu ikum bronzi rikom tsisi atang, amaa, awu kyae ukwàb te azurfa risu ikum yi.

¹² Awu myae kuta wu uwe usir ti kujwo ureb ka afxen mae ita mbe rijwe asu itsong, ama kyae ikum bronzi rijwe tsisi atang. Awu kyae ukwàb te azurfa risu ikum yi ama pu atupwa lilin fae pakob wu.

¹³ Yi uwe usir ti kiskinn, awu myae riyaen-wu afxen mae ita mbe rijwe asu itsong.

¹⁴ Riyaen kutupwa ti awu pu kyensi iyen kinjo ana ufu ti ku sang uwae utab wu si yadi itsongfaen ti ripye. Awu kyae iken ti a pu ikum tsisi atang ita ama pu ikum ita tsisi atang.

¹⁵ Yi iyen ufu wu ti ifaen, awu nde ti mbwe-yi. Yi iyen ufu utab wu, awu pu kutupwa yadi itsongfaen ti ripye kyensi atang ama nde ti mbwe-yi yi iyen ti ifaen. Awu kyae iken ti a u pu ikum tsisi atang ita ita ama pu ikum yi ita ita tsisi atang.

¹⁶ Meme atupwa ti a pu kyensi sangkob utab wu, awu ndxob yi te kutub lilin.

¹⁷ Ama iken ti a pu ikum yi tsisi atang, a kyae yi te bronzi, amaa, ukwàb-yi, a kyae yi te azurfa. Risu ikum yi, awu shi yi te azurfa, ama meme afwá utab wu, a kyae yi te azurfa.

¹⁸ Awu ndxob kutupwa ti kyensi ufu utab wu te kutub ti rikàen-yi ru irum titisub ti ti ru itibyaen ti itibyaen ti lilin. Rikob-wu si yadi rijweta, riyaen-wu si yadi ifaen ti ripye pangma kutupwa ti kyen sangkob utab wu.

¹⁹ Afwá-yi si inje, iken ti a pu yi tsisi atang ama si inje ti a kyae yi te bronzi. A kyae ukwàb-yi te azurfa, u shi risu afwá-yi ti kunyang-yi te azurfa.

²⁰ Patag usúm kufug uwog ti som Yaweh ti ana utab wu ti sangkob wu, a kyae yi te bronzi.

²¹ Meme iken ti a nde wande te yi yi kufug uwog ti som Yaweh wu ti si uwog ti a ye akpati unju ti yer tsi atang ta re. Musa nda anyisu Lawi unju ti a na bae yi ti kinjo ti kinjo. Ama unde ti uwe-ba si Itamar, umbae Aruna ti si kukwen.

²² Bezalel umbae Uri ti si umbae Huri, uwae rishi Yawuda, awu kyae meme iken yi ti Yaweh nda Musa unju risu yi.

²³ Ama unde ti ndeya wu si Oholiyab, umbae Ahisamaki ti ruye rishi na Dan, ama si unde ti ndetu iken ajwo, ku kyag iken, ku ndxob iken ti kutub ti rikaen ti kang cwurr ti ti ru itibyaen ti itibyaen ti lilin. Awu si unde ti ku sur awaen rutsa ijwe iken.

²⁴ Meme rinyangwae zinariya ti a pu nde wande na itikyae uwog ti sisaen wu, a myae rurob-yi si kilo kumbub kinjo (1,000).

²⁵ Ama rurob ayaen azurfa ti ande ba pu ba si kilo kumbub ita ti ukob inje ti rijweta (3, 430) yi iken ti a ku myae iken atang uwae uwog ti sisaen wu.

²⁶ Unde titini ti asang-wu si rikom tsutso sa beka azurfa kinjo ba. Ayine si kapam riyaen azurfa ana uwog ti sisaen wu uwae ande ti asang-ba si rikom tsutso. Meme ujwunn ande ba ti asang-ba ka rikom si ande kumbub ukob itsongnjo ti ita mbe ukob itsong ti mae ifaen mbe rijwe (603, 550).

²⁷ A pu azurfa ti rurob-yi ka kilo kumbub ita kwen iken ti a u pu afwá uwog ti sisaen wu tsisi atang, ti iken ti a u pu ituku ti a pu kutupwa ti kagtsen uwog ti sisaen wu tsisi. Ayine tso baa, awu na pu azurfa ti rurob-yi ka kilo kumbub ita kwen iken ti a pu afwá tsisi atang ka ukob kinjo, ama kilo rijwe mbe itsong kwen iken yine kinjo.

²⁸ Awu pu azurfa mae ifaen mbe itsong ti tsitsi kwen ukwàb afwá-yi, ama shi risu-yi.

²⁹ Ama bronzi ti a pu ba rinyangwae si kilo kumbub ifaen ti ukob inje (2,400).

³⁰ Ti bronzi yine awu kwen iken ti a pu afwá ufu kufug itifen Yaweh wu tsi si atang, ti kuta na iken ti twen, ti iken ti a kyae naesi uwae kuta wu ti kuu riye kuu riye, ti meme isu na kuta wu,

³¹ ti meme iken ti a pu ituku tsisi atang sangkob utab wu, ti ana ufu utab wu, ti meme usúm kufug uwog ti som Yaweh wu, ti meme usúm ti a pu sim pakob utab wu.