Itiruye 37 - Kutsingken Ira Rimam ti Saen Kyag

Itikyae Akpati Unju ti yer

¹ Bezalel kyae akpati unju ti yer wu ti ituku akasiya. Rikob-wu si afxen ita ti ripye pang, riyaen-wu si afxen ifaen ti ripye pang, rikob-wu ti ritsen ama si kutun kujwo kinjo ti ripye.

² Awu fxebkyi uwae ti ise akpati wu meme te riyib zinariya, ama fxeb ufuyen-wu meme te zinariya pakob.

³ Ama awu kwen kunyang zinariya inje u pu sang ikub na afxen akpati wu. Kunyang ifaen ta iyen kyab ne, ifaen ama ta iyen ti ifaen.

⁴ Ama awu pab ikum kutuku akasiya ti rikob-yi, u shi yi te zinariya.

⁵ Awu pu ikum yine tur sang kunyang yi ti ta ufuyen akpati wu ikyaen ti a u ku su wu atang.

⁶ Awu kyae kubur akpati wu ti si uwog itiyata ikentitibi te riyib zinariya. Rikob-wu si afxen ita ti ripye, riyaen-wu si afxen ifaen ti ripye.

⁷ Awu kwén kerubi ifaen ti site asae pangma inung te zinariya. Awu kwen yi tsi tso iyen iyen kubur akpati wu ti si uwog itiyata ikentitibi.

⁸ Awu kwén kerub kinjo tsi tso iyen ne, u kwen ti ifaen tsi tso iyen ti ifaen ama. Awu kwen ren yi fa ti ijwe kubur akpati wu.

⁹ Kerubi yi pu asae-yi tso ritsen kukyi kubur akpati wu, ama pu uwe-yi tag atso ku sae akpati wu.

Itikyae Tebur

¹⁰ Awu kyae tebur ti ituku akasiya. Rikob-wu si afxen ita, riyaen-wu si kufxen kinjo ti ripye, rikob-wu ti ritsen ama si kutun kujwo kinjo ti ripye.

¹¹ Awu shin wu te riyib zinariya, u kyae ukub ukub sangkob fuyen-wu te zinariya.

¹² Awu pab kutuku ti riyaen-wu pangma kuskab kujwo, u nde batin sangkob tebur wu, ama sa zinariya kyae indab-wu atang pakob.

¹³ Awu kwen kunyang inje ana zinariya yirfa ukub inje ana afxen tebur wu.

¹⁴ Kunyang yi yirfa fer ti ikum batin ikyaen ti a u pu ikum yi faesang u su tebur wu.

¹⁵ Awu pab ikum kutuku akasiya, u shi yi te zinariya, ikyaen ti a u ye tebur wu te yi.

¹⁶ Awu pu riyib zinariya kyae isu yine ti a pu tsitsa risu tebur wu. Ayi si ikyig ti atutong ti si ikyaen iken ti twen, kitu ti kiten si ikyaen ti a yaen rinyangwae iken ti ngwa si atang.

Itikyae ana Afxen Fitila

¹⁷ Awu sa riyib zinariya kinjo kwen ren umbyi ti rimenn iken ti a pu fitila tsitsa atang fa ti ikum-yi ti ajwug-yi meme. Uwog ti tsi ti indab ti a kyae uwog ti tsi fitila wu meme si zinariya ti a kwén yi kwén.

¹⁸ Iken wu ti a pu Fitila yi tsitsa atang site ajwo itsongnjo, ita iyen ne, ita iyen ne.

¹⁹ Awu kwen iticwae ita ita ti pangma ajwug alimon ta ko kujwo titini uwae ajwo itsongnjo yi,

²⁰ ama kwen iticwae inje ti pangma ajwug alimon ta rimenn-wu ti tso kutampwa.

²¹ Awu kyae ajwug-yi ita u pu tā imbyi iken ti ku ye su fitila wu uwog ti ajwo itsongnjo yine ren ifaen ifaen atang.

²² Meme ajwug-yi ti ajwo-yi ren tag te rimenn iken wu ti a kwen ti riyib zinariya.

²³ Awu kyae fitila itsongfaen tsitsa ajwo itsongfaen yi, ti iken ti ku jim fitila yi, ti tire-wu te zinariya.

²⁴ Awu myae riyib zinariya ka kilo rijweta mbe itsong u kyae meme iken yi te yi.

Kuta Iken ti ku Nung Kuyang

²⁵ Awu pu ituku akasiya kwer kuta ti rikob-wu si kufxen kinjo ti ripye, riyaen-wu si kufxen kinjo ti ripye. Rikob-wu ti riyaen-wu pang atso. Rikob-wu ti ritsen ama si kutun kujwo ifaen. Awu kyae ishin inje tsisi ikub inje na kuta wu.

²⁶ Awu shi risu kuta wu ti iyenkyab iyenkyab-wu sangkob te riyib zinariya fa ti ishin-wu meme. Ama awu pu zinariya kyae kindab sangkob iyenkyab wu.

²⁷ Awu kwen kunyang zinariya ita sang ikub yi iyenkyab ne ti iyenkyab ne, ikyaen ti a pu ikum sang atang ku ye kuta wu te yi.

²⁸ Awu pab ikum yi te ituku akasiya, ama shin kyi yi te zinariya.

²⁹ Awu kyae kindob ti ku cwucwe na itiyerkob, fa ti iken ti ku nung kuyang pangma ti unde ti ku kyae iken ti ku nung kuyang ku kyae.