Itiruye 35 - Kutsingken Ira Rimam ti Saen Kyag

Icwe Usir Ikyinn

¹ Musa kunn funn patag anyisu Isirela u ri te ba baa, “Ira ti Yaweh nda unju ti ni na nde ta re:

² Uwae usir itsongnjo ni nde wande, amaa, usir ti itsong ifaen si usir ti saen kyag na Yaweh. Ni nde-ni wande uwae usir wu be. Unde ti a nde wande atang, ni wen wu.

³ Uwae usir wu, unde iki ā jwu urwa cwe-wu kununn-wu be.”

Rinyangwae Kufug Uwog ti Som Yaweh

⁴ Musa ri te meme anyisu Isirela baa, “Ira ti Yaweh nda unju baa ani na nde ta re:

⁵ Ni pu rinyangwae ba na Yaweh. Ko aye ti a site utob ana rinda ti nda, awu ā pu rinyangwae zinariya ti azurfa ti bronzi,

⁶ ti itub ti rikàen-yi ru irum titisub, ti itub ti ru itibyaen, ti itibyaen, ti itub lilin, ti asing iwenten,

⁷ ti apwa iwentam ti a fufwá, ti apwa ibye iki ti tutub, ti ituku akasiya,

⁸ ti kindob ti a sa si fitila ti umung iken ti ku nung kuyang ti a sa naafa kindob itiyerkob ti ayi ti a ku twen iken ti ku nung kuyang atang te yi,

⁹ ti atxom onis ti atxom ti tinyang ti tinyang ti a pu bae fa efod ti jifu efod ti kukog.

Isu Wande Uwog ti Som Yaweh

¹⁰ “Meme ande ti site itsab iken ti ti nde tu ajwo uwae-ni ā ba nde meme wande ti Yaweh nda unju risu-yi.

¹¹ A u kyae uwog ti som Yaweh, kufug-wu ti iken ti a u pu burkyi kufug wu, ti iken ti ukwab-wu, ti ituku-yi ti a baen ren tso baen ren tso, ti uwong-yi, ti kufwá-yi, ti iken ti a pu afxen afwá-yi tsi si atang,

¹² ti akpati unju ti yer ti ikum ti a su wu te yi, ti kubur wu ti si uwog ayibrisi Rimam, ti kutupwa ti a pu takyi wu,

¹³ ti tebur ti ikum-wu, ti meme isu-yi, ti buredi ti ku cwucwe ti ta kunn uwe Yaweh,

¹⁴ ti iken ti a pu fitila tsitsa atang, ti isu-yi, ti kindob fitila wu,

¹⁵ ti kuta ti a ku twen iken ti ku nung kuyang, ti ikum ti a u su wu te yi, ti kindob itiyerkob ti iken ti twen ti ku nung kuyang, ti kutupwa ti a pu sikyi ufu ti ku sang yi kufug Yaweh wu,

¹⁶ ti kuta rinyangwae na ibye ti twen, ti iken ti kuu riye kuu riye na bronzi ti ikum-yi, ti meme isu-yi, ti kusan tiyang ti uwog ti tsi-wu,

¹⁷ ti atupwa ti a pu fae pakob utab wu, ti atupwa ti a pu kyensi uwe utab wu ti afwá-wu, ti iken ti a pu afxen afwá yi tsisi atang, ti kutupwa ti a pu kyensi ufu utab-wu,

¹⁸ ti usúm ana kufug Yaweh wu, ti usúm afwá ti fae pakob utab wu, ti iji-yi,

¹⁹ ti atupwa ti a ndxob yi ti a nde wande te yi yi uwog ti sisaen, ti atupwa ti ku cwucwe ti Aruna ti anyisu-wu ā ku si kiye ti a ku nde wande kukwen.”

Anyisu Isirela Pu Rinyangwae Ba Na Yaweh

²⁰ Ama meme anyisu Isirela nwunn uwe Musa, u kafe ru.

²¹ Unde titini ti ira yi sùb wu utob u kunn nwunn kusung-wu, pu rinyangwae ba na Yaweh, ikyaen wande na uwog ti som Yaweh, ti isu ti a u nde wande te yi atang, ti atupwa ti ku cwucwe.

²² Ikyaen yine, meme arom ti anda ti site utob na rinda ti nda, pu iken kindab ti iken atóng ti itsi kujwo ti asuwa ti ukwae, ti itso iken zinariya ti txitxi ba. Unde titini pu rinyangwae zinariya ti tinyang ba na Yaweh.

²³ Unde titini ti site itub ti rikaen ti kang cwurr, ko itub ti ru tibyaen, ko itub tibyaen, ko atupwa lilin, ko asing iwenten ko apwa iwentam ti apwa ibye iki ti tutub, a pu yi ba.

²⁴ Unde titini ti ndetu ti wu u nda rinyangwae na azurfa ko bronzi, pu yi ba na Yaweh. Ama unde titini ti site ituku akasiya ti awu nung ti a na u ndetu wande te yi, pu ba ikyaen wande yi.

²⁵ Ama meme anda ti site itsab iken ti ndxob ajwo pu atupwa-ba ba. Ayi si atupwa ti a ndxob yi te itub ti rikàen-yi ru irum titisub, ti itub ti ru itibyaen, ti itub tibyaen, ti itub lilin.

²⁶ Meme anda ti ira yi sub ba utob, nwunn u nde wande ti ajwo-ba u txom asing iwenten.

²⁷ Ande ti uwe ba pu atxom onis ti atxom ti tinyang ti tinyang ikyaen ti a pu kob bae fa efod ti jifu efod ti kukog na kukwen.

²⁸ Aba ru ba te umung iken ti ku nung kuyang, ti kindob ti a sa si fitila, ti kindob itiyerkob, ti iken ti twen ti ku nung kuyang.

²⁹ Meme anyisu Isirela, arom ti anda ti utob-ba sub, pu rinyangwae ba ti utob-ba ikyaen wande yi ti Yaweh ri te Musa baa, a na nde.

³⁰ Ama Musa ri te anyisu Isirela baa, “Nung, Yaweh tsab pu wu Bezalel umbae Uri, ti si umbae Hur uwae rishi na Yawuda.

³¹ Yaweh kumunn pu wu awu ti kusung Rimam, ti itindetu ti ben-ayib, ti itinungye ana meme iken ti ti nde tu ajwo,

³² ikyaen ti awu u pu zinariya ti azurfa ti bronzi kyag iken ti tsotso ti tsotso te yi,

³³ ti awu u kwén atxom, u pab ituku. Awu site itsab meme wande iken ajwo ti tsotso.

³⁴ Yaweh ama nda pu wu Bezalel fa ti Oholiyab umbae Ahisamaki, uwae rishi na Dan ti a na kwén na ariki uwae-ba kujwo wande.

³⁵ Yaweh nda pu wu aba itsab wande itindetu iken ti tsotso ti tsotso, ana unde ti ku kyag iken, ana unde ti ku wae kusung iken, ana unde ti ku ndxob iken ti itub ti rikàen-yi ru irum titisub, ti itub ti ru itibyaen, ti itub tibyaen ti itub lilin. Aba site itindetu meme wande ajwo ti tsotso ti tsotso.