Itiruye 33 - Kutsingken Ira Rimam ti Saen Kyag

Yaweh Ri te Isirela ti A na Nwunn Sinai

¹ Yaweh ri te Musa baa, “Afu ti ande ba ti afu pu ruye uten Ejib, ni nwunn ti ni ya uwog wune ta, ti ni ru yi uten ti ame yer unju te Ibrahim ti Ishaku ti Yakubu baa, ame na u sa wu na utso-ba.

² Ame u tom atom-m ti wu tae ni ru, u rwae shag ande ti Kanana ti Amor ti Hiti ti Perizi ti Hivi ti ande ti Jebusi.

³ Ru-fu yi riben ti ku pang furr ti akang ibyaen ti kindob iwog. Amaa, ame u te ni ru-m tetso be, be ame u twenji ni fengo, ikyaen ti, ani si ande ti kpag risu ku fxen-ni ira be.”

⁴ Kiye ti ande ba fxen baa, Yaweh na u ru-wu te ba be, aba byir utob ama u pu iken indab tso-ba ijwe-ba be.

⁵ Ikyaen ti, Yaweh ri te pu wu Musa baa, “Ri te anyisu Isirela baa, ‘Ani si ande ti kpag risu ku fxen-ni ira be. Asiti ame a te ni ru, uwae kiye pang ame u twenji ni. Tine, ni nwaen iken kindab-ni yi ti m nung iken ti ame u nde te ni.’ ”

⁶ Bag ti kiye wu yi imbyi rikwen Horeb atang, anyisu Isirela pu iken kindab tso-ba ijwe-ba cwucwo be.

Kufug Uwog ti Som Yaweh

⁷ Uwae kiye wu, Musa ku sub kob kufug iki ti awu ku kunn wu baa, kufug uwog ti som Yaweh, ka sim kob iyen, rwen ri ra ti uwog ti anyisu Isirela ku sim afug-ba atang. Ama unde titini ti a ku sha ti wu kaa tong unju uwog Yaweh, awu u ru yi atang.

⁸ Ko kiye titini ti Musa a ku ru yi kufug itifen Rimam atang, meme anyisu Isirela u nwunn ritsen. Unde titini u tsi ufu kufug-wu, ku sae Musa se ti awu a ka sang pu wu uwae kufug itifen Yaweh atang.

⁹ Kiye ti Musa a ka sang pu wu uwae kufug itifen atang, kutakujwujwu u si ba kukyi ufu kufug wu, ama Yaweh u ri ira te Musa.

¹⁰ Ti ti ande ba a nung kutakujwujwu a si ba kukyi ufu kufug wu, meme-ba u ku riben u fen itifen ufu afug-ba.

¹¹ Yi uwae kufug wu, Yaweh u ri ira te Musa uwe ti uwe pangma ti unde ku tsag akaen te arwan-wu. Kiye ti Musa a kafe ka pu wu uwog ti anyisu Isirela nae atang, Jeshuwa umbae Nun, umbae utaen ti ku ndeya Musa, ku som kunn ti uwae kufug itifen Yaweh atang.

¹² Musa ri te Yaweh baa, “Afu ti ku ri te kob m baa, ame na tae ande bane, amaa, afu tatso-fu ame unde ti u ndeya m be. Afu tsikunn ku ri baa, afu na nung pu fu ame ti rinyi, ame na tu pu m kutxuwe ti tinyang uwe-fu.

¹³ Ikyaen yine, ame ku jwam fu, asiti ame a tu kutxuwe ti tinyang uwe-fu, tatso m fengo-fu ti m nung fu nyinyang, ama u tsikunn ti ku tu kutxuwe ti tinyang uwe-fu. Tangsom ama baa, kumbukwen ande bane na si ande-fu.”

¹⁴ Ama Yaweh cwe, u ri baa, “Ame ti risu-m, u te fu ru, u nda fu utob ti nae riben.”

¹⁵ Ama Musa ri baa, “Asiti afu a u ru-fu te m be, nda-fu ti ati u nwunn ike be.

¹⁶ Ande u nung ti imi ti ame ti ande-fu bane na tu kutxuwe ti tinyang uwe-fu? Iti som-fu kutampwa-ti ku tatso baa, ame na ti ande-fu na txi ra te ande ti tsitsi uwae utense.”

¹⁷ Ama Yaweh ri te Musa baa, “Ame u nde na fu iken ti afu jwam, ikyaen ti, afu tu kutxuwe ti tinyang uwe-m. Ame nung fu ti rinyi.”

¹⁸ Musa ri baa, “Ame ku jwam fu, tso m riyinn-fu!”

¹⁹ Ama Yaweh ri baa, “Ame u nyatsa uwe-fu, afu u sae ti tinyang-m. Ame u kunn rinyi-m Yaweh te fu ti afu u fxen, ikyaen ti, ame u tatso kutxuwe ti tinyang-m ba uwog unde ti ame tsab tsitsi, u tso ayib risi-m ba uwog unde ti ame tsab tsitsi.

²⁰ Amaa, afu u nung-fu kutxuwe-m be, ikyaen ti, unde ti a sae m, awu u cwucwu.”

²¹ Yaweh ri kyi baa, “Nung! Tsitsa kutxú ti ta fer m ne.

²² Ama kiye ti riyinn-m a yafe ku ru, ame u sa fu tam uwae fifae kutxú, u sa kujwo-m burkyi fu, se ti ame a nyatsa pu m.

²³ Ama ame u ye ra kujwo-m, afu u sae isim-m, amaa afu u sae-fu uwe-m be.”