Itiruye 32 - Kutsingken Ira Rimam ti Saen Kyag

Isirela Nyatsa Icwe Unju ti yer-ba

¹ Ti ande Isirela nung baa, Musa na som ci kiye utáen rikwèn, aba funn atso uwe Aruna u ri baa, “Nwunn! Kyae na ti iken iki ti ru Rimam, ti awu ā tae ti. Ana Musa unde ti pu ti ruye Ejib, ati nung-ti iken ti tu wu be.”

² Aruna ri te ba baa, “Ni nwaen iken atóng zinariya ti ta atóng awa-ni ti anyisu-ni ti arom ti ti anda ba na m.”

³ Ama meme-ba nwaen iken atóng zinariya yi ti ta atóng-ba, u pu yi ba na Aruna.

⁴ Awu pu iken atóng zinariya yine u yag yi, ama u kyae imbae indag te yi. Ti ande ba sae imbae indag wu ti Aruna kyae, aba ri baa, “Ani Isirela, awune ti si rimam-ni ti pu ni ruye uwae uten Ejib!”

⁵ Ti Aruna sae iken yine, awu mbye kuta tsi uwe imbae indag wu, u ri baa, “Ucwe, ati u nde ukwab na Yaweh.”

⁶ Ti ucwefam kiskinn fifae, ande ba nwunn u yerwen ibye, u twen rinyangwae ikentitwen, u pu rinyangwae risu ti ren ba. Isim-yi, ande ba som riben ku ci, ku ngwa, ama nwunn ku nde uru.

Yaweh Ndembeb Utob te Isirela

⁷ Yaweh ri te Musa baa, “Kafe si. Ande-fu aba ti afu pu ruye uwae uten Ejib sor ndembeb pu ba.

⁸ Ti ritsen, aba kafe isim ta pu ba icwe-m ti ame nda ba ti a na putsa. Aba kyae na ijwe-ba imbae indag, u ku fen wu, u ku yer wen iken na wu ku ri baa, ‘Awune ti pu Isirela ruye uwae uten Ejib!’

⁹ Ame nung ande bane, aba si ande ti kpag risu ku fxen-ba ira be.

¹⁰ Ikyaen yine, ya m ta, ti rinae-m ā si risu-ba, ti ame u twenji ba. Amaa afu, ame u sa fu kafe mbukwen ande yang-yi.”

Musa Jwam Ayib Risi Rimam Ikyaen Isirela

¹¹ Ama Musa jwam Yaweh Rimam-wu baa, “Aya Yaweh, afu u nde rimang u tso rinae ti byagkwan yine te ande-fu ti afu pu ruye uwae uten Ejib ti kuko-fu ti kpakang kujwo-fu?

¹² Ikyaen imi ti afu u nda ande ti Ejib riya ti a u rimbeb fu baa, ‘Awu pu ba ruye ti utob ti awu kaa wen ba yi rikwen uwae kutur, ama ti awu u twenji tag ba uwae utense.’ Kafe utob-fu, ti sae ayib risi-fu si ba risu ande-fu ti ira titibi ā tu-yi aba be.

¹³ Tangsom te apyi-fu Ibrahim ti Ishaku ti Yakubu ti afu ti risu-fu ben uben te ba baa, ‘Ame u nda anyisu-ni jwunn pangma atitaen ti apupwen, ama riben wune ti ame yer unju te ni, ame u sa wu meme na itso-ni, ti ayi ā si rifunn-ba ti tsi kukunn.’ ”

¹⁴ Ikyaen yine, Yaweh kafe utob-wu u ya ira titibi ti awu kab ti wu na u nde te ande-wu ta.

Musa Ye Afxae Atxom Icwe Rimam Byinn Mbub

¹⁵ Ama Musa nwunn utáen rikwèn u kafe si yi utab. Awu ye su afxae atxom ifaen ti a bae icwe si uwe ti isim-yi.

¹⁶ Afxae atxom yi si kujwo wande Rimam ti awu bae icwe yine si atang ti ajwo-wu.

¹⁷ Kiye ti Jeshuwa fxen ira ti ngháe ande ba, awu ri te Musa baa, “Ame ku fxen ukunn rika ti ku tso uwog ti ati nae atang.”

¹⁸ Musa ri baa, “Ayi si-yi ukunn rika ti ci ko ana ande ti a ci ba rika be. Ayi si akyáng ti ame fxen ti a ku yang!”

¹⁹ Ti Musa kyang ba ku fer uwog ti nae atang, awu sae imbae indag wu ti a kyae tsi, u ku se ise na wu, utob-wu ndembeb si-yi ti ti ri be. Afxae atxom yi ti awu ye su kujwo-wu, awu pu yi byinn mbub ubaen rikwen atang.

²⁰ Awu ye imbae indag wu ti aba kyae jwunnsi uwae urwa ama awu yagsur. Awu pwa wu nininam, ama pu umung-yi si ambyi na ba baa, a na ngwa kang.

²¹ Musa rang Aruna baa, “Ande bane nde fu ti imi nee ayi nda fu, afu shir ba sang uwae itso ikentitibi ti beb timambe ne?”

²² Aruna ri baa, “Unde ti uwe-m, ndembeb-fu utob be. Afu nung pu fu ira ande bane. Utob-ba tsi ira iken titibi ti ti nde timambe.

²³ Ikyaen ti, aba ti ri te m baa, ‘Kyae na ti iken ti ru Rimam ti awu ā tae ti, be, a si ana Musa, unde wu ti pu ti ruye uwae uten Ejib, ati nung-ti ira ti tu wu be.’

²⁴ Nee iken ti nde ame ri te ba baa, ‘Ko aye ti site zinariya, awu ā pu ba na m.’ Ama aba pu yi ba na m, ame pu yi jwunnsi urwa ama imbae indag wune gbug tsoye-wu atang.”

²⁵ Musa nung baa, Aruna na nda ande ba jwe byinn, u kafe pu ba iken akyaen ti skaen uwog ande rika-ba.

²⁶ Ikyaen yine, awu ka tsi fikyi u kunn ira ti kpakang baa, “Aye ti si ana Yaweh? Awu ā ba uwe-m ike!” Ama meme anyisu Lawi ba funn tag uwe-wu.

²⁷ Ama Musa ri te ba baa, “Ayine si ira ti Yaweh, Rimam Isirela ri, ‘Ni pu kisim rika-ni fa ajwo ti ni sang kyife uwog ti ati nae atang ne meme, ti ni wen ameinja-ni ti arwan-ni ti ande ice-ni.’ ”

²⁸ Anyisu Lawi nde putsa iken ti Musa ri te ba. Usir wu, aba wen ande kumbub ita.

²⁹ Ama Musa ri baa, “A yerkob pu ba ni yaka, ikyaen ti ni nde na Yaweh wande, ama ikyaen ti ni shanum anyisu-ni ti ameinja-ni. Yi fengo wune, Yaweh nde pu wu ani itinyang.”

Musa Jwam kyi Yaweh Risu Ande Isirela

³⁰ Ucwe fam-yi, Musa ri te ande ba baa, “Ani nde pu ni ikentitibi ti beb timambe. Tine, ame u kafe tso yi utáen rikwèn, uwe Yaweh kaa jwam wu ikibe awu u yata na ni ikentitibi-ni.”

³¹ Musa kafe ru yi uwe Yaweh u ka jwub ira baa, “Aya! Ande bane nde ikentitibi ti beb timambe. Aba pu zinariya kyae na ijwe-ba apxin.

³² Amaa, ame ku jwam fu, yata na ba ikentitibi-ba. Asiti afu a yata na-fu aba be, fen mbeb rinyi-m uwae kutsingken ti afu bae tsi.”

³³ Ama Yaweh ri te Musa baa, “Iyee unde ti a nde m ikentitibi, si awu ti ame u fen mbeb rinyi-wu uwae kutsingken-m.

³⁴ Ru tine, ka pu anyisu Isirela ru uwog ti ame ri te fu. Nung! Atom-m u ru uwe u tae ni. Kweme ayine, usir ti ame u ba, ame u pwen ba rikwén ikyaen ikentitibi-ba.”

³⁵ Ama Yaweh yaen kicaeb titibi iki si ande ba ikyaen ti, aba kú riben na imbae indag ti Aruna kwén na ba.