Itiruye 29 - Kutsingken Ira Rimam ti Saen Kyag

Ira risu Itiyerkob na Kukwen

¹ Yaweh ri te Musa baa, “Ayine si iken ti afu u nde u yerkob Aruna ti anyisu-wu, ti a u nde na m wande na kukwen. Ye imbae indag kinjo ti iwentam ifaen ti site-yi ajib be.

² Pu umung alikama ti fu nde buredi, ama pu yisiti si-fu atang be. Tsinn kose ti kindob olifi, ti pu yisiti si-fu atang be, ama nde biskiti ti fu wúnn yi te kindob.

³ Pu yi si uwae kutyika kinjo, ti fu ye yi ti indag wu ti iwentam ifaen yi ba.

⁴ Pu Aruna ti anyisu-wu ti arom ba ba ufu kufug itifen Yaweh, ti fu ba jwo ba ijwe ti ambyi.

⁵ Pu kutupwa ti kupyir ti a ndxob ama kukwen ku sa si fa kutupwa-wu ne, ti arun wu, ti efod wu, ti jifu ti kukog wu, ti fu kyae Aruna te yi, ama sa kutupwa ti fyarr yir sang wu imbyi.

⁶ Sa ukāen kaen wu risu, ti sa zinariya ti pwata wu ti sisaen fxeb ukāen wu.

⁷ Sa kindob si wu risu ikyaen ti fu yerkob wu.

⁸ “Isim ayine, pu anyisu-wu ti arom ba pu atupwa kukwen yi si ba ama.

⁹ Pu atupwa ti fyarr yir sang ba imbyi ti fu sa kubur bur ba risu ama. Wande kukwen si kunn pu yi ana-ba tiri. Nee fengo ti ani u yerkob Aruna ti anyisu-wu ti arom.

Ititwen Umbae Indag Ikyaen Ikentitibi Kukwen

¹⁰ “Isim ayine, tae indag wu ba kufug itifen Yaweh. Aruna ti anyisu-wu ti arom ā pu ajwo-ba cwutsa risu indag wu.

¹¹ Tiri, wen indag wu na Yaweh ti ufu kufug itifen Yaweh wu atang.

¹² Sa kukyikyin kujwo ti fu swae anying indag wu sī sī ishin yi ti ta kuta, ti fu ye ripye anying yi ti tsitsi yaen sang pakob imbyi kuta wu.

¹³ Ama ye ishab ti ta ishig-yi meme ifaen-yi ti kindeb ti meme iken ti uwae indag wu u twen mbub yi risu kuta wu.

¹⁴ Imum ibye indag wu ti kupwa-wu, ti abying-wu meme, pu yi ru yi kanjag ti ka twen mbub yi atang. Ayi si iken ti titwen ikyaen ikentitibi.

Ititwen Iwentam ti Tawe na Rimam

¹⁵ “Tiri, ye iwentam kinjo ba, ama Aruna ti anyisu-wu ti arom ā pu ajwo cwutsa risu-wu.

¹⁶ Isim ayine, yer wen iwentam wu, ti fu sa anying-wu yaen sang pakob kuta wu.

¹⁷ Yer ibye iwen wu pang pang, ti fu jwo meme iken ti uwae-wu ti agbir-wu, ti fu pu ibye yi ti risu-wu meme

¹⁸ cwutsa risu kuta wu, ama u twen mbub yi. Ayi si iken ti twen ti ku nung kuyang ti a ku twen yi ti urwa na Yaweh.

Ititwen Iwentam ti Ifaen

¹⁹ “Ye iwen ti ifaen na Aruna ti awu ā te anyisu-wu ti arom ā pu ajwo cwutsa-wu risu.

²⁰ Yer wen iwen wu ti fu nde anying wu tae kutong ti kujwo rici na Aruna, ti anyisu-wu ti arom ti kyiken kujwo-ba tirom ti kujwo rici, ti kyiken afxen-ba tirom ti kujwo rici meme. Tiri, ye ripye anying ti tsitsi yaen sang pakob kuta wu.

²¹ Nde anying yi ti ta kuta wu, ti kindob itiyerkob sam Aruna ti anyisu-wu ti atupwa-ba, ti awu ti anyisu-wu ti atupwa-ba meme ā tsi sisaen.

²² “Yer ruye ashab na iwen wu, ti ashab ti ta ikyen-wu, ti ashab ti takyi ishem ti uwae-wu, ti ashab ti indeb-wu, ti ti ishig-wu meme ifaen-yi, ti kusa-wu ti kujwo rici (ikyaen ti, awu si iwen itiyerkob).

²³ Pu tsoye buredi kinjo ti kose kinjo ti kindob ti biskiti kinjo uwae kutyika buredi ti a pu yisiti si-ba atang be.

²⁴ Pu yi meme si Aruna ti anyisu-wu ajwo ti ā pu yi tso uwe Yaweh, ti ayi ā si rinyangwae uwe Yaweh.

²⁵ Isim-yi, afu u mbe yi kujwo-ba, u twen yi ren fa ti rinyangwae na ititwen risu kuta wu. Ayi si iken ti titwen ti ku nung kuyang ti tinyang uwe Yaweh, ti a twen yi ti urwa na wu.

²⁶ “Sa kukog iwen tishir itiyerkob Aruna, ama ye yi tso uwe Yaweh, ti ayi ā si rinyangwae uwe Yaweh. Ama ayi a si kutunn-fu tiri.

Itiyerkob na Kukwen Kiye ti ku Ba Uwe

²⁷ “Pu kukog iwen na itiyerkob na akwen ti a pu tso uwe Yaweh né tsi ikyab, ikyaen ti, ayi ā si ana Aruna ti anyisu-wu ti arom.

²⁸ Ayine u si iken ti anyisu Isirela u tsikunn ti ku pu na Aruna ti anyisu-wu ti arom, ayi si kutunn ana akwen ti anyisu Isirela u ku pu ruye uwae rinyangwae ana kujimshwur ti si rinyangwae ti a pu na Yaweh.

²⁹ “Kiye ti Aruna a cwu-wu, aba ā pu atupwa ti ku cwucwe-wu na anyisu-wu ti arom, u yerkob ba te yi.

³⁰ Umbae Aruna ti urom ti a paembe kujwo wande kukwen itse-wu, awu u sī kutupwa ne ka usir itsongfaen kiye ti awu a ku sang yi kufug itifen Yaweh ti wu u nde wande uwog ti sisaen.

³¹ “Ye ibye iwen itiyerkob yine ka to uwog ti ku cwucwe.

³² Aruna ti anyisu-wu ti arom u kub tag ibye iwentam ti buredi yi ti ta uwae kutyika ufu kufug itifen Yaweh wu.

³³ Aba u ci kob iken yine ti si ikyaen itiyata ikentitibi-ba kiye ti a yerkob ba ti a na si akwen. Unde ti ukaen ā ci-wu ama be ikyaen ti ayi ku cwucwe.

³⁴ Asiti ibye ko buredi yi a tsitsi ba sang ucwefam kiskinn, ni kub-ni ayi be. Ni twen mbub yi ti urwa ikyaen ti, ayi ku cwucwe.

³⁵ “Nde meme iken ti ame ri te fu, ti fu yerkob Aruna ti anyisu-wu ti arom, ti ayi ā putsa meme ira ti ame ri te fu. Nde wande na itiyerkob-ba uwae usir itsongfaen.

³⁶ Ko usir ti tine uwae usir itsongfaen yine, afu u wen indag tishir, u twen ikentitwen ikyaen itiyata ikentitibi. Cwucwo, afu u sa ru ye rinyangwae na itityata ikentitibi ikyaen kuta wu, ama yaen kindob si atang ikyaen ti ti jwosaen-wu.

³⁷ Uwae usir itsongfaen, afu u sa rinyangwae itiyata ikentitibi ba, ikyaen kuta wu. Yerkob kuta wu ti awu a tsi sisaen ti ko iken ti a tekunn wu, awu u kafe ti sisaen.”

Ikentitwen na Usir Usir

³⁸ “Ayine si iken ti afu u ku twen risu kuta wu. Twen umbae mbawen ifaen ifaen, ti site kusang kinjo uwae usir usir.

³⁹ Twen iwentam kinjo kiskinn, ama u twen ti ifaen-wu ureb.

⁴⁰ Yi iwen titawe, myae umung alikama, tasa ti ngwa tikiyib kinjo, u tsinn ren yi te kindob olifi, tasa ti ngwa ambyi tikiyib kinjo. Ama u yaen ambyi anam tasa ambyi ti ngwa tikiyib kinjo si atang ikyaen rinyangwae iken ti ngwa.

⁴¹ Iwen ti ifaen ama afu u wen wu ureb, u twen wu renfa te wuci ti iken ti ngwa pangma ti afu nde kiskinn. Ayi si iken ti twen ti ku nung kuyang ti nyang uwae Yaweh, ti a twen yi ti urwa na wu.

⁴² Ani ti utso-ni ti ku ba isim u tsikunn ti ku twen ikentitwen yine ufu kufug itifen wu na Yaweh uwog ti ame u tu ni atang, u ri ira te ni.

⁴³ Atang ame u ba tu anyisu Isirela, riyinn-m u kukyi uwog wu, u nda wu kafe uwog ti cwucwe.

⁴⁴ Ame u yerkob ufu kufug itifen Yaweh wu ti kuta wu, ama u yerkob Aruna ti anyisu-wu ti arom, ti aba ā nde na m wande akwen.

⁴⁵ Ama ame u somsi kutampwa anyisu Isirela, u si Rimam-ba.

⁴⁶ Aba u nung baa, ame na si Yaweh, Rimam-ba ti pu ba ruye uwae uten Ejib ikyaen ti m na u somsi kutampwa-ba. Ame si Yaweh, Rimam-ba.