Itiruye 28 - Kutsingken Ira Rimam ti Saen Kyag

Atupwa Kukwen

¹ “Kunn inja-fu Aruna ti anyisu-wu ti arom, Nadab ti Abihu ti Eleyazar ti Itamar, ama yerkob ba uwae ande Isirela ti a nde na m wande na kukwen.

² Kob na inja-fu Aruna atupwa ti ku cwucwe, ti ayi ā nda wu yīyīnn u nyinyang.

³ Ri te meme ande ti ku kob tu atupwa, ande ti ame nda ba itsab atupwa ti kob, ti aba ā kob atupwa Aruna ikyaen itiyerkob-wu, ti awu ā nde na m wande kukwen.

⁴ Itso atupwa ti ku cwucwe yi ti a u kob ta re. Jifu ti kukog, ti ves ti a ku pu si uwae, ti arun, ti kutupwa ti kupyir ti a ndxob ama kukwen ku sa si fa kutupwa-wu, ti ukāen, ti kutupwa ti yir sang apye. Aba u kob atupwa icwe yine na inja-fu Aruna ti anyisu-wu ti a na nde na m wande kukwen.

⁵ Pu na ande ti ku kob atupwa yi itub zinariya ti itub ti rikàen-yi ru irum titisub ti ti ru itibyaen ti itibyaen ti kutupwa lilin.

Efod

⁶ “Nda itaen ti ku kob atupwa yi ti a kob efod wu ti itub zinariya, ti itub ti rikàen-yi ru irum titisub, ti ti ru itibyaen ti itibyaen, ti kutupwa lilin.

⁷ Efod wu ā site akyab atupwa ti fyarr fxae kajwo-wu ti ā kob ren yi tetso.

⁸ Kutupwa ti a sa yir ipyé, a ndxob wu ti itub zinariya ti itub ti rikàen-yi ru irum titisub ti itub ti ru itibyen ti itub tibyaen ti kutupwa ti tinyang.

⁹ Pu atxom ti tsen ti tinyang ifaen ama bae rinyi anyisu Isirela rutsa atang.

¹⁰ Bae rinyi itsongnjo yi kutxom ne, ti fu bae itsongnjo ti tsitsi yi kutxom ti ifaen. Bae rinyi yi putsa ndufu itimbae-ba.

¹¹ Pangma ti unde ti ku kyag iken ku pab atxom ti tinyang, u ku sur awaen rutsa ijwe-yi, afu u kyag rinyi anyisu Isirela rutsa atxom yi, ama pu yi fxeb fa zinariya ti pwata.

¹² Pu atxom ifaen yi sang unju kutupwa ti fyarr yi ti ta fxae kajwo kutupwa wu. Ayi tsi kutunn unju anyisu Isirela rijwe asu ifaen. Aruna ā ku su rinyi yine, ikyaen ititangsom.

¹³ Kwen zinariya ti pwata ifaen,

¹⁴ ama sha zinariya yi pangma iji, u pu yi bae fa ijwe zinariya ti pwata.

Jifu ti Kukog na Kukwen Tiyang

¹⁵ “Kob jifu ti kukog na kukwen wu nyinyang, uwog ti awu ā ku caen nung utob Rimam atang. Nde wu pangma ti afu nde efod, ti itub zinariya ti itub ti rikàen-yi ru irum titisub ti ti ru itibyaen ti itibyaen. Ndxob wu ti itub lilin.

¹⁶ Kob wu, ti rikob-wu ti riyaen-wu ā pang atso, inci itsongnje-itsongnje. Pyib ren wu ifaen ikyaen imi awu si jifu ti kukog.

¹⁷ Nwu atxom ishing inje ru ijwe-wu. Ishing ti tawe u si na atom sardiyu ti topazi ti karbunko.

¹⁸ Ishing ti ifaen u si na atxom emeral ti safire ti ana daimon.

¹⁹ Ishing ti ita u si na atxom jasin ti agate ti ametis.

²⁰ Ishing ti inje ama u si na atom beril ti onis ti jaspa. Pu yi fxeb fa zinariya.”

²¹ Atxom yi si kutunn unju anyisu Isirela rijwe asu ifaen. Rinyi utso-ba u bae rutsa ijwe kutxom wu.

²² Shà iji zinariya ti tinyang ti fu sa kyaefa jifu ti a u sa ta ukwae.

²³ Kwen kunyang ana zinariya ifaen ti fu pu sang ukub ifaen ti risu na jifu ti kukog wu.

²⁴ Pu iji zinariya ifaen yi kyaefa kunyang yi ti ta ukub jifu ti kukog wu.

²⁵ Unju iji ifaen yine, afu u ren yi te ayi ti ta fxae kajwo na efod uwe-wu.

²⁶ Ama kwen kyi kunyang zinariya ifaen pu sang unju jifu wu ti riben ti fer ti efod.

²⁷ Kwen kyi kunyang ifaen ana zinariya, ama pu yi sorfa uwe efod ti ta ikya ti kujwo isi na atupwa yi ti fyarr ti ta fxae kajwo.

²⁸ Yir ren jifu ti kukog ti kunyang ti a pu kyaefa efod ti iji ti rikàen-yi ru irum titisub, ikyaen ti ayi ā yir bom jifu ti kukog wu ting ting.

²⁹ Ikyaen yine, ko kiye ti tine ti Aruna a ku sang uwog ti sisaen, awu u yab jifu ti kukog wune ti rinyi anyisu Isirela ikyaen ti ame Yaweh u tangsom ti ande-m.

³⁰ Pu Urim ti Tumim, iken ti ku caen nung utob Yaweh ne, si uwae jifu efod wu ti ayi ā ta kunn utob Aruna ko kiye ti tine ti awu a sang ba uwe Yaweh. Yi fengo wune, Aruna ā ku tsikunn ti ku ta jifu efod wune kiye ti awu a pu anyisu Isirela ku ba uwog Yaweh.

Arun Kukwen Tiyang

³¹ Kob arun wu te itub ti rikàen-yi ru irum titisub, ayi arun ti kukwen ku pu kutupwa ti kupyir ti a ndundxob si fa atang ne.

³² Ndxob ukwae-wu nyinyang ti wu ā shiryaen-wu ti kufe be.

³³ Ndxob iken iki ti pangma awaen ituku pomegranas ti itub ti rikàen-yi ru irum titisub ti ti ru itibyaen ti itibyaen pakob kutong kutupwa wu. Pu zinariya ti kwen abubwong kyensi kutampwa pomegranas yi.

³⁴ Aba ā kob yi skogfa atso skogfa atso pakob kutong atupwa wu.

³⁵ Aruna ā ku si kutupwa wune kiye ti awu a ku nde wande. Ande ā fxen abubwong ti ku kyi kiye ti awu a ku sisang ko awu a ku ru yiye uwae uwog ti sisaen uwe Yaweh, be awu u cwu.

³⁶ Kwen zinariya ti yaen pwata, ti fu bae ru atang baa, “A PU NA YAWEH.”

³⁷ Afu u sa wu yir uwe ukāen ti risu ti itub ti rikaen-yi ru irum titisub.

³⁸ Awu ā ku ta kutxuwe Aruna, ikyaen ti Aruna ā ku su riraen ti Isirela ku raen kiye ti a ku pu rinyangwae-ba ti sisaen na Yaweh. Iken ti a bae ijwe kutupwa ti ku cwenkob risu wu u tsikunn kutxuwe, ikyaen ti yaweh ā paembe rinyangwae-ba. Kutupwa ti kupyir ti a ndxob ama kukwen ku sa si fa kutupwa-wu

³⁹ Ndxob kutupwa ti kupyir ti kukwen ku sa si fa kutupwa-wu ne, te itub lilin. Kob ukāen ti risu wu te itub lilin. Ndxob kutupwa ti yir sang apye-wu ama te kutupwa lilin.

Atupwa na Anyisu Aruna

⁴⁰ Ana anyisu Aruna, ndxob na ba kutupwa ti kupyir ti kukwen ku sa si fa kutupwa-wu, ti atupwa ti yir apye, ti kubur, ikyaen ti ayi ā nda ba yīyīnn ama u site rurob.

⁴¹ Pu atupwa yine si Aruna ti anyisu-wu ti arom, ti fu sa kindob itiyerkob yaen si ba, ti fu waekob ba. Aba ā jwo ijwe-ba ti aba ā nde na m wande na kukwen.

⁴² Kob na ba benti ti aba ā pu tsokyi imbyi-ba.

⁴³ Aruna ti anyisu-wu ti arom ā ku tso benti yine ko kiye titini ti aba a sang ba kufug itifen Yaweh, ko ti aba a ba ku fer kuta ti a nde na m wande uwae uwog ti sisaen, be aba u raen ira ama u tu iticwu. Icwe yine u tsi kukunn ikyaen Aruna ti anyisu-wu ti ku ba isim.