Itiruye 25 - Kutsingken Ira Rimam ti Saen Kyag

Kusog ti A ku Fen Rimam Atang

¹ Yaweh ri te Musa baa,

² “Ri te anyisu Isirela ti a na pu rinyangwae ba na m. Mbe na m rinyangwae kujwo ko aye ti a site utob rinda ti nda.

³ Itso rinyangwae ti afu u mbe kujwo-ba ta re: Zinariya ti azurfa ti bronzi,

⁴ ti itub ti rikaen-yi ru irum titisub, ti tibyaen, tí ti ru tibyaen, ti atupwa lilin, ti asing iwenten ti mbawentam ti a fufwá

⁵ ti apwa iwentam ti a fufwá, ti apwa ibye iki ti tutub, ti kutuku akasiya,

⁶ ti kindob ti a u sa si fitila, ti umung iken ti ku nung kuyang ti a u sa naafa kindob itiwaekob, ti ayi ti a ku twen iken ti ku nung kuyang atang te yi,

⁷ ti atxom onis ti atxom ti tinyang tinyang ti a pu kob baefa efod, ti jifu efod ti kukog.

⁸ Nda anyisu Isirela ti a kyae na m ukag ti sisaen ti m som si kutampwa-ba.

⁹ Ni kyae ukag-m wu ti isu uwae-wu pangma ti ame u tso fu.”

Fengo ti A Kyae Akpati Unju ti yer

¹⁰ Aba ā kyae akpati te ituku akasiya. Rikob akpati wu ā si afxen ita ti ripye, riyaen-wu ā si afxen ifaen ti ripye, rikob-wu ti tso ritsen ama ā si kutun kujwo ti ripye.

¹¹ Fxebkyi wu uwae ti ise meme te riyib zinariya. Fxeb sangkob ifuyen-wu meme te zinariya.

¹² Kwen kunyang zinariya inje, ti fu pu yi meme sang afxen akpati wu, ifaen iyen kyaeb ne, ifaen iyen kyaeb ne.

¹³ Pab ukum kutuku akasiya ifaen ti rikob, ti fu shi yi ti zinariya.

¹⁴ Ni pu ikum yi tur sang kunyang yi ti ta iyen akpati wu, ikyaen ti ā ku su wu atang.

¹⁵ Ni nwaen ruye-ni ikum yine ijwe akpati wu be. Ayi u fae kukunn ti ijwe akpati wu.

¹⁶ Isim ti ani a kyae tag pu ni akpati wu, afu u pu afxae atxom unju ti yer ti ame u pu na fu cwu si uwae atang.

¹⁷ Kyae kubur-wu te zinariya. Rikob-wu ā si afxen ita ti ripye, riyaen-wu ama ā si afxen ifaen ti ripye.

¹⁸ Kwén kerubi ifaen ti site asae pangma inung. Kyae yi te zinariya, ti fu pu yi tsitsa iyen iyen kubur wu.

¹⁹ Sa Kerub kinjo tsi ikyab kinjo, ti fu sa ti ifaen tsi ikyab ti ifaen ama. Ni nde yi ren fa kubur wu.

²⁰ Kerubi yine ā pu asae-yi tso yi apupwen ti ayi ā kukyi kubur wu, u kafe uwe-yi tag atso ku sae akpati wu.

²¹ Pu afxae atxom ifaen na unju ti yer ti ame u pu na fu, cwu si uwae akpati wu, ama u sa kubur wu burkyi.

²² Ame u tu fu risu akpati atang kutampwa kerubi ifaen yine, u nda fu meme icwe-m, ti fu nda anyisu Isirela.

Tebur Buredi ti ku Tatso Fxaefa

²³ Pu ituku akasiya ti fu kyae tebur ti rikob-wu ā si afxen ita, riyaen-wu ā si afxen kinjo ti ripye, rikob-wu ti tso ritsen ama ā si kutun kujwo ti ripye.

²⁴ Afu u shi wu ti zinariya. Pu zinariya kyae ukub ukub pakob risu-wu.

²⁵ Pab kutuku ti riyaen-wu ā pangma uskab kujwo, ti fu nde batin atang sangkob tabur wu, ama sa zinariya kyae indab-wu atang pakob.

²⁶ Kwén kunyang inje na zinariya ti fu pu yi yir fa afxen tebur wu meme inje yi.

²⁷ Yir kunyang yi fifer ti batin wu ti a u pu ikum faesang atang, u ye tebur wu te yi.

²⁸ Pab ikum ti kutuku akasiya, ti fu shi yi ti zinariya, ikyaen ti a ye tebur wu te yi.

²⁹ Pu zinariya ti fu mbye ikyig ti atutong ti kiten ti kitu, ikyaen ti a yaen rinyangwae iken ti ngwa si atang.

³⁰ Pu buredi ti ku tatso baa, ani na ta uwe-m, cwutsa risu tebur wu. Buredi yi ā ku cwutsa kukunn atang.

Fitila

³¹ “Kwén iken ti a u pu fitila tsitsa atang te ayib zinariya. Afu u kwén ren umbyi wu ti utsinn-wu te zinariya kinjo fa ti itu-yi ti ajwug-yi meme.

³² Ajwo-wu ayi ā si itsongnjo, ita iyen ne, ita iyen ne baefa utsinn-wu.

³³ Kitu ita ti a kyae yi pangma ajwug alimon ā ta ko kujwo titini uwae ajwo itsongnjo na fitila wu.

³⁴ Kitu inje ama a ta rimenn-wu ti tso kutampwa.

³⁵ Kyae ajwug ita ta rimenn fitila wu, uwog ti ajwo itsongnjo yine ren ifaen ifaen atang.

³⁶ Meme ajwug-yi ti ajwo yi u ren tag te rimenn wu ti a kwén te zinariya.

³⁷ Sa ukum zinariya kinjo ti kwen fitila itsongfaen tsitsa ajwo itsongfaen yine, ti ayi ā tso uwog ti saen-yi ru uwe-wu.

³⁸ Kyae iken ti ku jim fitila, ti tire-wu te zinariya.

³⁹ Myae zinariya ti rurob-yi ka kilo rijweta mbe itsong ti fu kyae meme iken yine te yi.

⁴⁰ Nung nyinyang ti fu kyae yi pangma ti a tso fu utaen rikwen.”