Itiruye 23 - Kutsingken Ira Rimam ti Saen Kyag

Kubenti ti ti Nde

¹ “Ri-fu ira tikong be. Jwunn-fu imbyi te ande titibi ti fu cwé ucwé tikong be.

² Putsa-fu ujwunn ande ti fu nde iken titibi pangma ti aba ku nde be. Ren-fu risu te ujwunn ande ti fu cwe tikong kusog rikwen be.

³ Uwae kusog rikwen, ri ya-fu unde ti rikaen ikyaen ti awu na si unde ti rikaen be.

⁴ “Asiti afu a tu indag ko ikyinnsu unde ti rika-fu ti ku jwujwe, tae ba na wu.

⁵ Afu a nung ikyinnsu unde kuka-fu jwunn ipu ikyaen isu ti ku rob wu, ya wu ta-fu riben atang be. Ndeya wu ti ni ye ikyinnsu wu nwunn ritsen.

⁶ “Cebkyi-fu rikwén unde ti rikaen kiye ti awu a ba kusog rikwén be.

⁷ Tsi rurwen ti ira ti tikong. Wen-fu unde ti nung-wu ira iki ko unde ti kubenti be. Ikyaen ti, ame u yata na-m unde titibi be.

⁸ Mbe-fu iken ti a sa cwunn fu unju be, ikyaen ti, ayi ku mbub ayib ande ti uwe, u ku nda ba fungkyi ira ti kubenti.

⁹ “Sir-fu ande ti rikyen sir be. Ni nung pu ni itso rikaen ti ande ti rikyen ta uwae-yi, ikyaen ti, ani ti risu-ni som ji pu ni rikyen yi uten Ejib.

¹⁰ “Uwae asang itsongnjo, tom ritom-fu ti fu byir wuci yi.

¹¹ Amaa, kusang ti itsongfaen, afu u ya riben wu ta ti awu ā nae rukwēn. Afu u tom-fu awu be ikyaen ti ande ti rikaen ā cag agbug-yi. Iken ti a yata, ibye kutur ā ci. Nde ahan te risaen ituku anam ti ana olifi meme.

¹² “Nde wande-fu uwae usir itsongnjo. Usir ti itsongfaen, pu unyang atang, ikyaen ti ayi u nda indag-fu ti ikyinnsu-fu u pu unyang ama. Ayi u nda apyi-fu ti ande ti rikyen ti ta ishikununn-fu u pu unyang ama.

¹³ “Ni nung nyinyang ti ni nde meme iken ti ame ri te ni. Ni kunn-ni rinyi apxin iki be, ko ti a u fxen rinyi-yi tso unju-ni.

Ukwab Tiyang Ita na Kusang Kusang

¹⁴ “Ni nde ukwab atsepu ita uwae kusang, ikyaen ti ni u nda m kuko.

¹⁵ Ni nde ukwab na buredi ti a pu yisiti si-ba atang be. Pangma ti ame ri te ni, uwae usir itsongfaen ana ishaen Abib, ani u ci buredi ti si-yi te yisiti be. Ni nde ukwab wune kiye ti ame sa tsi na ni uwae ishaen Abib, ikyaen ti ayi ā tatso itiruye-ni uwae uten Ejib. Unde iki ā ba-wu uwog-m ti ajwo ukaen be.

¹⁶ “Ni nde ukwab kiye ti ani a bunn wuci ti tawe uwae risaen-ni. “Ni nde ukwab iki ama kiye ti ani a bunn, u byir tag pu ni wuci-ni ti tsitsi.

¹⁷ “Atsepu ita uwae kusang, meme arom-ni ā ba fen Itsekuru-ni Yaweh.

¹⁸ “Kiye ti ani a yerwen ibye na m, ni twen anying-yi fa-ni ti wuci ti a pu yisiti si atang be. Ashab ibye ukwab iken ti twen-m ā tsi fam-yi ucwe be.

¹⁹ “Ko kusang titini, tsab isen wuci-ni ti ben tawe ba yi kusog Yaweh, Rimam-ni. “Afu a yerwen imbae iwenten, to-fu awu te akang ibyaen iya-wu be.

Unju ti yer Yaweh

²⁰ “Nung, ame tom atom ku ru uwe-fu. Awu u kyir fu fengo, u pu fu ka sang uwog ti ame kyae tsi fu.

²¹ Fxen wu. Nae risu riben ti ira-wu. Kpag-fu risu te wu be, ikyaen ti awu u yata na-wu afu risu ti kpag-fu be. Ikyaen ti, kuko rinyi-m te wu ta tetso.

²² Amaa, asiti afu a na kutong u fxen ira-wu, u nae risu riben ti meme ira ti ame ri, ame u si unde rika ande rika-fu, u tsi ukub ti ande ti tsi ukub te fu.

²³ Kiye ti atom-m a ru uwe-ni, ama u pu ni ka sang uten ande ti Amor ti Hiti ti Perizi ti Kanana ti Hivi ti Jebusi, ame ama a twenji pu m aba,

²⁴ ni ku riben na-ni apxin-ba ko ti ani u fen yi be. Ni nde-ni itso iken ti aba ku nde be. Ni wenji ba, ti ni byinn mbub tag afwá atxom ti ku cwucwe-ba si riben.

²⁵ Ni fen nyáng ame, Yaweh Rimam-ni. Ame ama u nda wuci-ni ti ambyi-ni u nyang, ama u nwaen ru kicaeb kutampwa-ni.

²⁶ Unda u kunn-wu kutsob ko u wab umbae uwae uten-ni be. Ame u nda ni, ani u ci mae ukum.

²⁷ “Ame u tom ikyenricwu-m ru ka sa kukyikab sang meme ande ti ani ka tu ba. Ame u nda ba u ter shag u kafe isim ta ni.

²⁸ Ti ani a ku ru, ame u tom nyirika tā jae ande ti Hivi ti ande ti Kanana ti ande ti Hiti, ti aba u ter ru.

²⁹ Ame u rwae tag-m aba uwae kusang kinjo be, be uten wu u ku ukaen ama ibye kutur u ba jwunn skeb ni skeb.

³⁰ Ame u rwae ruye ba pang pang pang uwe-ni, se kiye ti ani a mbae jwunn, u sikyi pu ni riben wu.

³¹ Ame u sa ice riben-ni bag ti Uyinn Tibyaen ka sang Uyinn na Filisti, nwunn kutur ru ka sang Uyinn ti Yufiretis. Ame u pu ande ba ti ta riben atang na ni kujwo ti ani u rwae ba nwunn uwe-ni.

³² Ni yer-ni unju te ande ba ko apxin-ba be.

³³ Ni cwe-ni ti aba ā nae uwae uten-ni be, be ayi u si kutxae ti u nda ni, ani u raen m ira, u fen apxin-ba.”