Itiruye 22 - Kutsingken Ira Rimam ti Saen Kyag

Icwe Risu Riyib ti Yib

¹ “Asiti unde iki a yib indag ko iwen ama u ye yerwen, ko awu a sa jabci, awu ā pae indag itsong ikyaen indag kinjo, iwen inje ama ikyaen iwen kinjo.

² “Asiti a ye unde ti riyib ti byinn mbub ufu kusog u ku yib riyib utitang, ama aba a kum wen wu, anying-wu tá risu unde ti wen wu be.

³ Amaa asiti a byinn wen unde ti riyib wu usirtaen, anying-wu ta risu unde ti wen wu. “Unde ti riyib ā pae kang iken ti awu yib, amaa awu a si-wu ti iken ti awu u pae be, ni sa wu jabci upyi ikyaen iken ti awu yib.

⁴ Asiti a ye wu ti asinn wu ti awu yib ti unyang kujwo-wu, ko awu a si indag ko ikyinnsu ko mbawen, unde ti riyib wu ā pae kang asinn yi ifaen ikyaen asinn kinjo ti awu yib.

⁵ “Asiti unde a pu asinn-wu kaa kub irum uwog iki ko uwae risaen ituku anam-wu, asiti awu a ya asinn yi ta ka sang uwae risaen unde iki u kub irum atang, awu ā tsab risaen-wu ko risaen ituku-wu ti nyang siskeb u sa pae upae yi atang.

⁶ “Asiti unde iki a ku ta apaen-wu, ama urwa a nde ram-ram ka sang uwae rukong unde ice-wu u twen mbub wuci ti a byir tsi ko ayi ti a bunn-ba khika be, awu ā pae meme iken ti twen mbub.

⁷ “Asiti unde iki a sa aser ko isu-wu iki na unde ice-wu ti wu na sa nae ka wu, ama riyib a ba yib ra-wu aser yi ko isu yi kununn unde wu, asiti a ye unde ti riyib wu, awu ā pae iken ifaen ikyaen iken kinjo ti awu yib.

⁸ Amaa, asiti a ye-ba unde ti riyib wu be, aba ā pu unde ti kununn wu ba uwe Rimam ti awu ā ba ben uben baa, ayi na si-yi awu ti na yib aser yi ko isu yi be.

⁹ “Asiti ande ifaen a ku txwa atso risu iken iki, ko ayi a si indag ko ikyinnsu ko iwen ko atupwa, ko ayi a si iken ti a yag byibyinn, aba ā pu ande ifaen ba ba uwe Rimam. Unde titini ti Rimam a ye wu te riraen, awu ā pae na unde ti ifaen-wu iken ifaen ikyaen iken kinjo ti kutxwa yi ta risu-wu.

¹⁰ “Asiti unde a sa indag ko ikyinnsu ko mbawen ko asinn-wu iki na unde ice-wu ti rishi, ama asinn wu a cwu-wu ko awu a tu kicaeb ko awu a ter ru-wu ti unde iki nung-wu uwog ti awu ta atang be,

¹¹ a u pu ande ba ba uwe Yaweh, ama unde wu ti mbe asinn wu ti rishi u ba ben uben baa, kubenti awu na nde-wu asinn wu unghae be. Unde ti asinn wu u cwe ama u kyeb upae na-wu unde ice-wu awu be.

¹² Amaa ayi a si riyib ti a yib asinn wu kujwo-wu, awu ā pae na kang unde ti asinn wu iken ti a kyeb na wu.

¹³ Asiti ayi a si ibye kutur ti a ye wu shir yer, awu ā sa rukom-wu ba tatso unde ti asinn wu. Awu u pae-wu iken iki ikyaen asinn ti ibye kutur wen be.

¹⁴ “Unde iki a mbe asinn ti rishi kujwo unde ice-wu, ama a ter wu iken ko awu a cwu-wu kiye ti unde ice wu a ta-wu atang be, unde ti mbe asinn wu ā pae meme iken ti a kyeb na wu.

¹⁵ Amaa, unde ti asinn wu a ta te asinn wu atang, unde ti mbe asinn wu u pae-wu iken iki be. Asiti awu a mbe asinn wu uwae aser, aser yi amam ti awu u pae.

Icwe Usom Ti som Te Ande

¹⁶ “Asiti unde a bwa wandab ti a ye-ba isam-wu khika be, ama u nung-wu urom khika be, u nae te wu, unde wu ā pae iken ti risu wandab wu, ama u pu wandab wu mbe.

¹⁷ Asiti itse wandab wu a pyir-wu, u pu wandab wu na-wu unde wu be, unde wu u pae kang iken ti risu wandab wu.

¹⁸ “Ni wen unda ti kisi wen.

¹⁹ “Unde titini ti a nae te ibye, ni wen wu wen.

²⁰ “Unde titini ti a twen ikentitwen na iken iki fa m ifaen, ni twenji wu.

²¹ “Nde-fu rikyen iyib be, ko ti fu sir wu sir be, ikyaen ti, ani ama si ji pu ni rikyen yi uten Ejib.

²² Nde-fu awa icwu ko anyisu ti shanum iya ti itse itibi be.

²³ Asiti ani a nde ba itibi, aba a jwub ira tu m, kubenti, ame u fxen ira ti jwub-ba.

²⁴ Rinae-m u si ba risu-ni. Ame u wen ni ti kisum wen ti awa-ni u kafe awa icwu, anyisu-ni ama u shanum te abitse.

²⁵ “Asiti afu a ci ripab aser na ande-m ti rikaen, afu a ba ku mbe yi, mbe-fu ayi ti atxwa risu-yi be.

²⁶ Asiti unde ice-fu a pu arunn-wu na fu lele, pu kafe na wu ti ti usir sunn-wu khika be.

²⁷ Ikyaen ti ayi si kutupwa wu ti awu ku bur rijwen te wu u ku si sí awu amam. Awu u nae rimang? Asiti awu a jwub ira tu m, ame u fxen ira ti jwub-wu, ikyaen ti ame site ayibrisi timambe.

²⁸ “Txun mbeb-fu Rimam, ko unde ti uwe ande-fu be.

²⁹ “Kiye ti afu a bunn pu fu wuci risaen ufang, ko afu a kam pu fu awaen ituku anam, ci-fu kiye ti fu pu isen-yi ba na m be. “Yerkob na m umbae ti urom titawe na anyisu-fu.

³⁰ Afu u nde ti mbwe-yi te indag ti mbawen-fu. Asinn ti a mbae imbae tishir, a ya wu ta te iya-wu ka usir itsongfaen. Usir ti itsongta, afu u yerkob wu na m.

³¹ “Ani ā si ande-m ti sisaen ti a yer kukob na m. Ikyaen yine, ni kub-ni ibye ti ibye kutur wen be. Ni pu yi tā ipxu.