Itiruye 21 - Kutsingken Ira Rimam ti Saen Kyag

Icwe na Itiyesu Apyi

¹ “Icwe ti afu u nda anyisu Isirela ta re.

² Kiye ti afu a jab upyi ti si Mbaibrane, awu u nde na fu wande asang itsongnjo. Uwae kusang ti itsongfaen, afu u ya wu ta, awu u ru u pae-wu iken iki be.

³ Asiti awu a si unde ti ripaen ti afu a jab, awu u ruye-wu ti unda be. Amaa asiti awu a mbe pu wu unda, awu u ruye ti uwa-wu.

⁴ Asiti unde ti kununn-wu a mbe unda na wu, ama unda wu a mbae na wu anyisu ti arom te ti anda, unda wu te anyisu-wu meme si ana unde ti kununn-wu. Upyi wu u ruye kum awu.

⁵ Amaa, asiti upyi wu a ri tso ti unju-wu baa, ‘Ame site ure te unde ti kununn-m ti uwa-m ti anyisu-m, ame u ka-m uwog iki be,’

⁶ unde ti kununn-wu ā pu wu ba kang uwog Rimam. Isim yi, unde ti kununn-wu awu ā pu wu ru yi ufu kusog ka mbog wu kutong. Awu u tsi kunn upyi unde ti kununn-wu se ti awu a cwu pu wu.

⁷ “Asiti unde a sa umbae-wu ti unda jabci upyi, itisaenta-wu u txi ra ti ana upyi ti urom.

⁸ Asiti wandab wu a nyang-wu uwae unde ti kununn-wu ti jab wu ba be, awu ā pu wu kafe na itse-wu ti atang u mbe aser-wu. Awu ā pu wu jabci na-wu unde ti rikyen be. Ikyaen ti, awu ye su-wu unju ti yer-ba be.

⁹ Asiti awu a jab mbe wandab wu ti wu na si uwabyib-wu, awu ā nde te wandab wu pangma umbae-wu ti unda.

¹⁰ Asiti unde ti kununn wu a mbe kyi unda iki fa ifaen, awu ā byang-wu unda ti kununn-wu wuci ko atupwa be, ko ti awu u shaen ama u nae te-wu awu be.

¹¹ Asiti unde wu a nde na-wu unda wu iken ita yine be, unda wu ā ruye, a u pae na-ba unde wu iken iki be.”

Icwe Risu Ripab Ikentitibi ti ti Pae

¹² “Unde ti a byinn wen unde, ni wen wu ama.

¹³ Amaa, asiti awu a wen-wu unde wu ti unghae be, ayi a si kujwo wande Rimam, unde wu ā ter ru yi uwog ti ame u sa tsi, ikyaen ti awu ā ter nwang iticwu.

¹⁴ Amaa, asiti unde a myae utob-wu, u wen unde ti unghae, ko awu a ter ka tam kuta-m, ni ka shir wu ruye atang ba wen wu.

¹⁵ Unde ti a byinn itse-wu ko iya-wu iken, ni wen wu.

¹⁶ Unde ti a yib unde, ko ti awu a sa unde wu jabcici, ko ani a tu wu ti unde wu, ni wen unde ti riyib wu.

¹⁷ Unde ti a txun itse-wu ko iya-wu asu, ni wen wu.

Icwe Risu Riraen ti Tsitsi

¹⁸ “Ande ifaen a ku fwan kubyag, ama kinjo a sa kutxom ko awu a fur kujwo kum unde ti ifaen-wu, awu a cwu-wu be, ama u nae kicaeb,

¹⁹ ama ba nwunn ku tub ukum ku kyang, unde ti kum wu iken nwangru pu wu. Iken ti awu u nde si ti, awu u pae na unde wu iken ikyaen kiye ti awu ndembeb uwae kicaeb yi, awu ama ā ter unde wu kicaeb se ti ijwe-wu a bom pu yi.

²⁰ “Kiye ti unde a sa ukum byinn upyi-wu ti urom ko ti unda, upyi wu a cwu, a kyeb na wu upae.

²¹ Amaa, upyi wu a cwu-wu be, u tu kujimshwur ijwe-wu isim usir kinjo ko ifaen, unde ti kununn-wu nwangru pu wu, ikyaen ti, awu jab upyi wu ti aser-wu.

²² “Kiye ti arom ifaen a ku kum kutxu, ama ka rug unda ti site rishwu, rishwu yi a wabsi, unda wu a mbog-wu ribang be, unde ti rug unda wu ā pae upae ti ubaen unda wu a kyeb na wu pang ti ti ande ti ku pwen rikwen cwe te yi.

²³ Asiti kicaeb iki a ba nwunn-yi ikyaen kutxu yi uwe ike, upae unyang u si sí unyang,

²⁴ riyib u si sí riyib, kunyi u si sí kunyi, kujwo u si sí kujwo, kufxen u si sí kufxen,

²⁵ ititwen u si sí ititwen, ribang u si sí ribang.

²⁶ “Kiye ti unde a byinn mbub riyib upyi-wu ti urom ko ti unda, awu ā ya upyi wu ta ti wu ā si-wu upyi cwucwo be ikyaen riyib-wu awu.

²⁷ Asiti awu a byinn kyeb kunyi upyi-wu ti urom ko ti unda, awu ā ya upyi wu ta ti wu ā si-wu upyi cwucwo be ikyaen kunyi-wu awu.

Icwe Risu Asinn

²⁸ “Indag a ter wen urom ko unda, ni jwunn wen indag wu ti atxom. Unde iki ā kub-wu ibye indag wu be. Ni ye-ni unde ti indag wu upae be ama.

²⁹ Amaa, asiti indag wu a ku ter kob ande ishin, ama a fa pu ba unde ti indag wu kusen, awu ye indag wu kya-wu be, indag wu a ba ter wen urom ko unda iki, ni jwunn wen indag wu kwer ti unde ti indag wu meme ti atxom.

³⁰ Asiti a kyeb na wu upae, awu ā pae upae yi ikyaen ti wu ā nwangru unyang-wu.

³¹ Asiti indag a wen umbae unde iki ti urom ko ti unda, ā sa sí icwe wune pwen unde ti indag wu rikwen atang.

³² Asiti indag a wen upyi unde iki ti urom ko ti unda, unde ti indag wu ā pae na unde ti kununn upyi wune azurfa rijweta, ama ani u jwunn wen indag wu ti atxom.

³³ “Asiti unde a ya unju kukwae ta rubwen, ama indag ko ikyinnsu unde iki a ba jwunnsi atang,

³⁴ unde ti kukwae wu ā pae na unde ti asinn wu upae ti a kyeb na wu, ama unde ti kukwae wu ā sa-wu rukom asinn wu tiri.

³⁵ “Kiye ti indag unde iki a wen indag unde iki, aba ā sa indag ti tsi user wu jabci, ti aba ā kan aser yi ti ibye wu ti cwucwu meme.

³⁶ Ko asiti a nung indag wune a ku ter kob ishin ti kucang, ama unde ti indag wu a kya-wu indag wu be, awu ā sa indag pae na unde wu ti indag-wu cwu ne. Unde ti pae upae ne u sa-wu rukom indag wu ti cwucwu ne tiri.