Itiruye 2 - Kutsingken Ira Rimam ti Saen Kyag

Itimbae Musa

¹ Uwae kiye wu, urae Lawi iki mbe unda ti si sí rishi na Lawi.

² Ama unda wu kyaen rishwu u mbae umbae ti urom. Ti unda wu nung baa, umbae wu na saen urom timambe, awu tam umbae wu ka ishaen ita.

³ Ti awu nung baa, awu na u tam tu-wu umbae wu cwucwo be, awu ndxob kutyika, u fxeb kyi wu te kindob koltai ti itur, u ye umbae wu nae si atang, ama u ye wu ka tam uwae itxwa unju uyinn Nel.

⁴ Mbiya umbae wu ama tsi ti fengo ti rwen ti wu nung iken ti u tu umbae wu.

⁵ Ama umbae Ukwe ti Ejib ti unda si ti awu kaa jwo ijwe uwae uyinn atang. Apyi-wu ti anda ama ku kyang putsa unju uyinn wu. Umbae ukwe wu sae kutyika wu uwae irum, u tom upyi-wu ti unda iki ru ti wu na ka ye wu ba.

⁶ Ti awu mbub kutyika wu ta, u sae umbae wu, mbae wu ku jwub ira. Risi umbae wu nde wu, awu ri baa, “Umbae wune si kang kinjo uwae anyisu Mbaibrane.”

⁷ Ama mbiya umbae wu ba rang umbae Ukwe wu baa, “Ame kaa kunn na fu uwa Mbaibrane iki, ti awu ā nyam ser na fu umbae wu a.”

⁸ Umbae ukwe wu cwe, ama wandab wu ru, u ka kunn sí sí iya umbae wu ba.

⁹ Ama umbae Ukwe wu ri te unda wu baa, “Ye umbae wune ti fu ka nyam ser wu na m, ame u pae fu pae.” Ikyaen ayine, iya umbae wu ye umbae wu u nyam ser wu.

¹⁰ Ti umbae wu ser ben, iya-wu pu wu ka na umbae Ukwe wu, ama awu kafe umbae-wu. Awu fwa rinyi umbae wu baa, Musa, ikyaen imi awu ri baa, “Ame wab wu tsoye uwae ambyi.”

Musa Ter Nwunn Uten Ejib Ru yi Uten Midiyan

¹¹ Usir iki, kiye ti Musa ser ben pu wu, awu kyang ruye ti awu kaa nung ande-wu Isirela ti ta uwae rikaen wande-ba. Awu nung urae Ejib iki ku kum kinjo uwae ande-wu Mbaibrane kutxu.

¹² Musa sae ayib pakob, u nung-wu unde iki atang be, ama kum wen urae Ejib wu, u sa rukom-wu tam uwae isa tsen atang.

¹³ Ucwe fam-yi, awu kyang ruye kyi u ka tu Mbaibrane ifaen ku kum atso kutxu. Awu rang unde wu ti site riraen baa, “Imi ti nde afu ku byinn inja-fu?”

¹⁴ Unde wu rang wu baa, “Aye ti sa fu tsi ti fu na pwen rikwen risu-ti? Afu ku sha ti fu wen m pangma ti afu wen urae Ejib né a.” Ama ikyenricwu ye Musa, awu kab baa, “Kubenti, a nungye pu ba iken ti ame nde.”

¹⁵ Ti Ukwe fxen ira yine, awu kwab ti wu wen Musa, amaa, Musa ter nwunn uwe ukwe u ru yi uten Midiyan. Awu ka som unju ribung.

¹⁶ Ama Rewel kukwen na Midiyan, site anyisu ti anda itsongfaen. Aba ba ku txi ambyi si kitsaen tiyang, ti asinn itse-ba na ngwa.

¹⁷ Ande ba iki ti ku shi asinn ama ba rwae shag ba, amaa, Musa sunwunn u ndeya ba, ama u txi ambyi si asinn-ba.

¹⁸ Kiye ti anyisu Rewel kafe ru kununn, itse-ba rang ba baa, “Ani nde rimang u kafe ba fifae yaka ne?”

¹⁹ Aba ri baa, “Urae Ejib iki ti nwangru-ti ajwo ande ti ku shi asinn ba iki ama u txi ambyi si ti ti asinn-ti meme.”

²⁰ Awu rang ba baa, “Unde wu ama ta-wu aka. Ani nde rimang u ya wu ta. Ni ka kunn wu ba ti ti ci wuci.”

²¹ Ama Musa cwe ti wu na u som te Rewel wu ti rinyi-wu iki si Jetro. Ama Jetro pu unda-wu Zipora baen Musa.

²² Zipora mbae umbae ti urom, ama Musa fwa rinyi-wu baa, Gershom, ikyaen ti awu ku ri baa, “Ame si rikyen yi uten ti si-yi ana-m be.”

²³ Isim asang yang-yi, Ukwe ti Ejib sa cwu. Anyisu Isirela ku ngwa rikaen uwae usom upyi. Aba ku jwub ira ku sha itindeya uwae usom ti som-ba. Ira ti jwub-ba yi ka uwog Rimam.

²⁴ Rimam fxen ira ti jwub-ba u tangsom ti unju ti yer-wu te Ibrahim, ti Ishaku, ti Yakubu.

²⁵ Awu nung rikaen ti anyisu Isirela ku ngwa uwae usom upyi, ayi caeb wu uwae.