Itiruye 17 - Kutsingken Ira Rimam ti Saen Kyag

Ambyi Ruye Kutxú

¹ Meme ande Isirela nwunn kutur na Sin, u kyang ti kucwug kucwug pangma ti Yaweh ri te ba. Aba ba sang Refidim u sim afug ama nae atang, amaa a tu-ba ambyi atang ti a u ngwa be.

² Aba pu ira kunn tu Musa ti wu na nda ba ambyi ti a na u ngwa. Musa rang ba baa, “Ani nde rimang u pu ira kunn tu-ni ame? Ani nde rimang ku myae Yaweh kumyae?”

³ Amaa ande ba ku fxen ti unwáen timambe. Aba ku pwen unju risu Musa ama rang wu baa, “Imi ti nde nee afu pu ti, ti anyisu-ti, ti iken ti shi-ti meme ruye uwae Ejib ba cwu ku ji ti unwáen ambyi ike?”

⁴ Musa jwub ira tu Yaweh baa, “Ame u nde ande bane rimang? Aba ku sha ti a u jwunn m kutxom.”

⁵ Ama Yaweh ri te Musa baa, “Pu ariki uwae ande ndufu na Isirela fa ijwe-fu ti ni ru uwe-ba, ti fu sa ukum wu ti afu byinn ambyi ti Nel atang né ye su ru te wu.

⁶ Ame u tsi uwe-ni fer ti kutxú ana rikwen ti Horeb. Ama afu u sa ukum byinn kutxú wu. Ambyi u ten ruye atang ti ande ba ā ngwa.” Musa nde ti mbwe-yi uwe ande ndufu Isirela ba.

⁷ Musa kunn rinyi uwog wu baa, “Massa,” ti imbyi-wu si, Kumyae. Rinyi ti ifaen si “Meriba,” ti imbyi-wu ama si unju ti pwen. Ikyaen imi, anyisu Isirela pwen unju, u myae Yaweh kumyae, ku ri baa, “Yaweh ta se kutampwa-ti njwaa?”

Ande ti Amaleki Pu Rika Kunn Anyisu Isirela

⁸ Tiri ande ti Amaleki pu rika kunn anyisu Isirela yi Refidim.

⁹ Ama Musa ri te Jeshuwa baa, “Tsab arom arom uwae-ti ti a ka ta rika ti ande ti Amaleki. Ucwe, ame u tsitsa risu rikwèn, u ye su ukum na Rimam kujwo-m.”

¹⁰ Tiri Jeshuwa nde pangma ti Musa ri te wu, ama u ka ta rika ti ande ti Amaleki. Musa ti Aruna ti Hur ama tso ka tsitsa risu rikwen.

¹¹ Kiye ti Musa a sa kujwo-wu tso ritsen, anyisu Isirela ku ci rika. Amaa, kiye ti kujwo-wu a nam ku si, ande ti Amaleki ku ci rika.

¹² Ama, kiye ti kujwo Musa womshang, aba ye kutxom ta ti wu na somtsa atang. Aruna ti Hur tatub kujwo Musa tso ritsen pu usir sunn.

¹³ Ikyaen yine, Jeshuwa ti ande-wu ci akyirten na Amaleki rika ti kisum wen.

Musa Mbye Kuta u Kunn Rinyi Yaweh

¹⁴ Ama Yaweh ri te Musa baa, “Bae kuci rika yine si kutsingken na ititangsom, ama pwen yi si Jeshuwa kutong, ikyaen ti ame u twenji utso ande ti Amaleki, ama unde iki u tangsom-wu te ba uwae utense ike be.”

¹⁵ Ama Musa mbye kuta na Yaweh, u kunn wu baa, Yaweh Nisi,

¹⁶ ama ku ri baa, “Ni sa tuta na Yaweh tso ritsen! Yaweh u tsikunn ti ku ta Amaleki ti anyisu ti ku ba isim-ba rika ru fife yi uwe.”