Itiruye 15 - Kutsingken Ira Rimam ti Saen Kyag

Anyisu Isirela Teb Yaweh

¹ Tiri Musa ti anyisu Isirela yang akyang ku teb Yaweh baa, “Ame u teb rinyi Yaweh, awu ci pu wu rika uwae kuko-wu. Awu tur pu kakum ti ande ti ku tso yi meme si uwae uyinn.

² Yaweh ti si kpakang-m, awu ti ame ku yang akyang-m risu-wu. Awu si Rimam-m. Awu ti nwangru m. Ame u teb rinyi Rimam na itse-m. Ame u yetso rinyi-wu.

³ Yaweh si Ukwe rika. Yaweh ti si rinyi-wu.

⁴ “Awu tur pu akyirten ukwe Ejib ti kuskus ti kya fa kakum-ba, si uwae uyinn tibyaen. Ama ande ti uwe-ba ti Ukwe tsitsab ngwa cwu uwae uyinn wu.

⁵ Ambyi ba tum munnkyi ba. Aba si fife yi rita uyinn pangma kutxom.

⁶ “Ti kpakang kujwo rici-fu Yaweh, afu ye ande rika-fu shiryae.

⁷ Yi uwae kuko-fu ti ko timambe, afu ci rika risu ande ande ti tsi ukub te fu. Afu tso rinae te ba, u twenji ba pangma irum.

⁸ Unyang ti ruye ruwen-fu, nda ambyi pu funn atso. Ambyi ti ku pupang yertsen, u munn tso kur pangma kupwe. Ambyi ti ritá uyinn ama kwenkyi ma kutxom kutampwa uyinn.

⁹ Unde rika-ti ri baa, ‘Ame u rwaetsa kaa ye ba. Ame u rwae mbe rifunn-ba, u ka yi na ande-m. Ame u shirmbe patag iken ti ame ku sha. Ame u nwaen kisum wen-m u wenji ba.’

¹⁰ Afu nda ufunn kae, uyinn wu munnkyi ba. Aba ngwa byinn uwae ambyi atang, u si fife yi ritá ma akyab kiser.

¹¹ “Yaweh, aye ti si pangma afu uwae apxin meme? Aye ti te fu pang atso uwae riyinn na itisaenkyag-fu? Uwae kuko-fu, afu ku nde iken ti ku fur ayib.

¹² Afu ndabta kujwo rici-fu, riben taenta u ye pu ande rika-ti mennsi.

¹³ “Uwae ure-fu ti tsi kukunn, afu tae ande-fu, aba ti afu nwangruye ti kpakang-fu, afu tae ba ku ru yi uwog ti saen kyag-fu.

¹⁴ Ande mbukwen ba iki fxen, ama ijwe-ba fwer ndembeb. Ikyenricwu ye ande ti Filisiti.

¹⁵ Abikwe na uten Edom, ikyenricwu ye ba, ijwe-ba ku fufwer. Aba ande ti uwe na Mowab, ijwe-ba fwer ndembeb pu yi. Meme ande ti Kanana yagsur uwae ikyenricwu.

¹⁶ Ikyenricwu ye ba, ijwe-ba ku fufwer. Kiye ti aba nung kuko-fu, aba tsi skirr ma kutxom. Yaweh, se kiye ti ande-fu ti afu nwangru ye yafe tag pu ba.

¹⁷ Afu u pu ba sang ba somkyi rikwen-fu, uwog ti afu Yaweh kyae ku som atang, uwog itifen ti afu mam ti ajwo-fu.

¹⁸ Yaweh u nae Ukwe ru fife yi uwe.”

Akyang na Mberimu

¹⁹ Kiye ti kakum Ukwe ti ande ti ku tso kuskus ti kya fa kakum yi ngwa cwu uwae uyinn, Yaweh nda ambyi uyinn kafe ba munnkyi ba. Amaa anyisu Isirela kyang yen uyinn wu yi riben ti wom.

²⁰ Ama Miriyam, unda ti ku ya iski ira Yaweh, mbiya Aruna, sa cicag fa kujwo-wu. Ama meme anda putsa wu ku byinn cicag ku se ise.

²¹ Ama Miriyam ri te ba baa, “Ni yang akyang na Yaweh. Awu ci pu wu rika uwae kuko-wu. Kakum ti ande ti ku tso yi, awu tur pu ba si pu wu uwae uyinn.”

Ambyi ti Mara Nungag

²² Tiri Musa pu Isirela nwunn unju uyinn tibyaen ka sang uwae kutur na Shur. Aba kyang ikyin usir ita u tu-ba ambyi be.

²³ Ti aba ka sang Mara, aba tu ambyi. Amaa aba ngwa tu-ba ambyi wu be, ikyaen ti, awu nungag. Nee iken ti nde a ku kunn uwog wu baa, Mara.

²⁴ Ama ande ba pwen unju risu Musa, baa “Imi ti ati u ngwa.”

²⁵ Musa jwub ira tu Yaweh, ama Yaweh tso wu kutuku iki. Musa kyeb wu, u sa jwunnsi uwae ambyi wu. Ama ambyi wu kafe u nyang ti ngwa. Yi Mara atang, Yaweh nda ba icwe, u tso ba fengo ti a putsa. Atang, awu myae kubenti-ba,

²⁶ ama ri baa, “Asiti ani a nae risu riben na m Yaweh, Rimam-ni, u nde iken ti pang atang, ama u putsa iken ti kwen ti icwe-m, ame u yaen itso acaeb iki ti ame yaensi ande ti Ejib si-m ani be. Ikyaen ti, ame si Yaweh ti ku nwangru ni.”

²⁷ Aba nwunn ka sang Elim, uwog ti ambyi ti ku kyeb tso riben rijwe asu ifaen ta atang, ti itsinn itu mae ita mbe rijwe tsi atang. Ama aba sim afug u nae atang fer unju ambyi wu.