Itiruye 13 - Kutsingken Ira Rimam ti Saen Kyag

Itiyerkob na Umbae ti Tawe

¹ Yaweh ri te Musa baa,

² “Yerkob na m meme anyisu ti arom titawe. Umbae ti urom ti tawe mbubta rishwu iya-wu, ko unde ko asinn, si ana m.”

Ukwab Buredi ti A Sa Yisiti Si-ba Atang be

³ Musa ri te anyisu Isirela baa, “Ni tangsom ti usir wune, usir ti Yaweh yi kuko-wu pu ru ye ni uwae rikaen apyi yi Ejib. Ni ci-ni wuci iki ti a sa yisiti si atang be.

⁴ Usir wune, uwae ushaen na Abib ti ani ru ku ye uwae Ejib.

⁵ Ama kiye ti Yaweh a pu fu ka sang pu wu uwae riben ande ti Kanana ti Hiti ti Amor ti Hivi ti Jebusi, ti si riben ti Yaweh yer unju te abitse-fu baa, awu na u nda ni, riben ti ku pang furr te akang ibyaen ti kindob iwog, afu a sang pu fu atang né, tsikunn ti fu nde na m ukwab wune uwae ushaen wune.

⁶ Uwae usir itsongfaen, ci-fu buredi ti a sa yisiti si atang be. Usir ti itsongfaen wu, nde ukwab u fen Yaweh.

⁷ Ci buredi ti a pu yisiti si-ba atang be ka usir itsongfaen. Yisiti ā tsi fer-yi ani ko uwae kununn-ni be.

⁸ Usir ukwab wu, ri te umbae-fu baa, ‘Ukwab wune, ame ku nde wu ku tangsom ti iken ti Yaweh nde u sa ruye m uwae uten Ejib.’

⁹ Itinde na ukwab wune u si pangma iji ti a sa kya fa fu kujwo, ko awaen ti a taen kutxuwe-fu baa, icwe Yaweh na u tsikunn unju-fu, ikyaen ti, yi kuko-wu, awu sa ruye fu uwae Ejib.

¹⁰ Tsikunn ti nde ukwab wune uwae kiye ti a sa tsi ti kusang kusang.”

Umbae ti Tawe Si ana Rimam

¹¹ “Kiye ti Yaweh a pu fu ka sang pu wu riben ande ti Kanana pangma ti awu yer unju te fu ti abitse-fu ti awu na u nda ni,

¹² pu meme iken ti mbae tawe, na Yaweh. Meme asinn tishir ti a mbae yi tawe uwae asinn-fu ā si ana Yaweh.

¹³ Ayi a si ikyinnsu, ye imbae iwen fi unju meme imbae ti tawe-yi tishir. Asiti afu a nyaembe-fu awu be, byinn mber ukwae-wu. Nyaembe meme anyisu ti tawe-fu ti arom.

¹⁴ “Uwe ike umbae-fu a rang baa, ‘Iken yine ku tso imi?’ Ri te wu baa, ‘Yi kuko Yaweh, awu pu ti ruye uwae rikaen apyi yi Ejib.

¹⁵ Kiye ti Ukwe Ejib kpag risu u cwe-wu ti ti na ruye uwae uten Ejib be, Yaweh wen tag meme anyisu arom titawe-ba, fa ti ana asinn-ba meme. Ikyaen yine, ame pu meme umbae ti tawe-m ti urom, ti ana asinn-m ti tishir, na Yaweh. Amaa anyisu titawe-m ti arom, ame nyaembe ba uwog Yaweh.’

¹⁶ Ukwab wune u ba si pangma iji ti a sa yir fa ni kujwo, ko awaen ti a taen kutxuwe-ni ti ku tso baa, Yaweh ti na pu ni ruye uwae uten Ejib yi kuko-wu.”

Rimam Tae Ande-wu Uwae Kubyi ti Urwa

¹⁷ Ti Ukwe ti Ejib ya anyisu Isirela ta ti a na ruye, Rimam tae ba putsa wu fengo uten ti Filisti be ko ti fengo wu pyir timambe. Rimam ri baa, “Be ande bane u ba kab baa, a na u kafe-ba ti yi Ejib kiye ti a pu rika kunn ba.”

¹⁸ Ikyaen yine, Rimam tae ba kwerfe kwerfe uwae kutur ka rutsa uwe Uyinn Tibyaen. Ama anyisu Isirela ruye uwae Ejib ti isu rika-ba kujwo.

¹⁹ Musa wèn akub Yusufu ru te yi, ikyaen ti, Yusufu ben uben ti unju ti yer uwog anyisu Isirela baa, “Rimam u ba nwangru ni. Kiye wu a nde pu wu, ni wèn akub-m ru te yi.”

²⁰ Anyisu Isirela nwunn uten Sukoti u ka sim afug-ba yi Etam, fer ti unju kutur.

²¹ Usirtaen, Yaweh ku tae ba ti kubyi. Utitang, awu ku tae ba ti urwa ti ku nda uwog wurr, ikyaen ti a na kyang ikyin utitang ti usir meme.

²² Kubyi wu ku ta kunn uwe-ba usir taen, urwa ama ku ta kunn uwe-ba utitang.