Itiruye 11 - Kutsingken Ira Rimam ti Saen Kyag

Iticwu ana Anyisu ti Tawe Uwae Ejib

¹ Yaweh ri te Musa baa, “Kujwūnn kinjo tsitsi ti ame u tom ba uwog Ukwe ti ande ti Ejib. Isim-yi, awu u ya ni ta ti ni ru ye. Kiye ti awu a cwe baa, ani na ru ye, awu u rwae patag-ni ru ye ti kufe.

² Ri te anyisu Isirela baa, ko urom ko unda titini na rang unde ice-wu iken ti a kyae yi ti azurfa ti zinariya.”

³ Ama Yaweh nda anyisu Isirela tu kutxuwe ti tinyang uwog ande ti Ejib. Musa ti risu-wu site rurob timambe uwog afaen ukwe tí ande ti Ejib meme.

⁴ Ama Musa ri baa, “Ayine ti si ira ti Yaweh ri. Uwae kukatitang, ame u kyang kutampwa ande ti Ejib.

⁵ Meme umbae ti tawe ti ta uten Ejib u cwu, bag ti umbae ti tawe na Ukwe ti somtsa kutxomkwe ba kwer ti umbae ti tawe na upyi ti unda ti ku pwa awum. Imbae ti tawe na asinn meme u cwu.

⁶ Ukunn ricwu ti pù ji-yi uwae Ejib be u pù uwae Ejib. Isim ayine, ayi u pù kyi-yi cwucwo be.

⁷ Amaa, anyisu Isirela, ko mbapxu iki u ca-wu ica kutampwa-ba be, ama ani u nung baa, Yaweh na sa ice si kutampwa ande ti Ejib na ti anyisu Isirela.

⁸ Meme afaen-fu bane u ba ku riben u jwam m baa, ‘Pu ande-fu ti ni ruye uwae uten ike.’ Ama isim ayine, ame u ru.” Tiri Musa ruye uwe Ukwe ti rinae.

⁹ Yaweh ri te Musa baa, “Ukwe u fxen-wu afu be ikyaen ti ame u nde iken ti ku fur ayib ko ku fufa uwae uten Ejib.”

¹⁰ Musa ti Aruna nde meme iken ti ku fur ayib yine uwe Ukwe. Amaa, Yaweh yirkyi utob Ukwe. Ukwe ama cwe-wu ti anyisu Isirela na ruye uwae uten-wu be.