Itiruye 1 - Kutsingken Ira Rimam ti Saen Kyag

Isirela Ngwa Rikaen Uwae Uten ti Ejib

¹ Rinyi anyisu Isirela ti te Yakubu si yi Ejib tetso, unde titini te ishikununn-wu ta re:

² Roben ti Simeyon ti Lawi ti Yawuda,

³ Isakar ti Zebulun ti Benjamin,

⁴ Dan ti Nafitali ti Gad ti Asher.

⁵ Meme anyisu Yakubu ka mae ita mbe rijwe fa ti Yusufu ti ta mam pu wu uwae uten Ejib.

⁶ Ba kiye iki, Yusufu ti ameinja-wu ti ande ti kiye wu meme cwu tag.

⁷ Amaa, anyisu Isirela mbae jwunn timambe. Aba mbae yag yag u bom ku fufa, ama u shag kyife uwae uten atang.

Bagtsi na Rikaen Anyisu Isirela

⁸ Kiye wu, a nae ukwe tishe yi Ejib ti nung-wu Yusufu be.

⁹ Awu ri te ande-wu baa, “Nung, anyisu Isirela jwúnn, u kpag ku skeb pu ba ati.

¹⁰ Ni ba ti ti nde kang fengo ti ti kosi ujwunn-ba, be, asiti rika a nwunn, aba u ren risu ti ande rika-ti, u ta ti rika, ama u ter nwunn uten ike.”

¹¹ Ikyaen yine, ande ti Ejib pu anyisu Isirela kafe apyi-ba. Aba pu ande ti uwe ta risu-ba ti ku taen ba ti a na nde wande ti kpag skeb ba. Aba mbye pakob Pitom ti Ramesi, uwog ti a ku pu wuci ukwe tsi atang.

¹² Amaa ko ti ande ti Ejib ku nde anyisu Isirela rikaen, anyisu Isirela mbae jwunn ku fufa, u shag kyife uten atang. Ama ikyenricwu anyisu Isirela ye ande ti Ejib.

¹³ Ikyaen yine, aba nda anyisu Isirela nde wande ti kpag timambe,

¹⁴ u nda usom ti som-ba nunngag. A nde ba rikaen beb timambe u nda ba ti a na pxag ariben u byinn biriki, ti itso wande ti rimang meme. Yi uwae wande anyisu Isirela meme, ande ti Ejib nde ba rikaen ti skeb risu.

¹⁵ Ukwe ti Ejib ri te Shifira ti Puwa, anda ifaen ti ku mbe umbae awa Mbaibrane baa,

¹⁶ “Kiye ti ani a ku mbe umbae awa Mbaibrane, asiti umbae wu a si umbae ti urom, ni wen wu, amaa asiti awu a si unda, ni wen-ni awu be.”

¹⁷ Amaa, anda ba kyen ikyenricwu Rimam, u nde-ba pangma ti ukwe Ejib ri te ba be. A ya anyisu ti arom ba ta ti unyang.

¹⁸ Ikyaen yine, ukwe ti Ejib kunn anda ba ti ku mbe umbae bane ru ba, u rang ba baa, “Ayine si imi ti ani nde ti ani ya anyisu ti arom ba ta ti unyang?”

¹⁹ Anda ba ri te Ukwe baa, “Awa Mbaibrane ku ci-ba kiye yi umbae ti pwe-ba be. Aba kpag timambe ku mbae ra umbae-ba titawe anda ti ku mbe umbae ku ba uwog-ba.”

²⁰ Ikyaen yine Rimam nde anda ifaen bane itinyang. Anyisu Isirela ama mbae jwunn u kpag ku fufa.

²¹ Ti anda ti ku mbe umbae bane kyen ikyenricwu Rimam né, Rimam nda ba, aba mbae anyisu ama.

²² Ukwe ri te meme ande-wu baa, “Meme anyisu ti arom ti a mbae na Mbaibrane, ni ye ba jwunnsi uwae uyinn Nel. Amaa, awu a si unda, ani ya wu ta ti unyang.”