Galatiya 5 - Kutsingken Ira Rimam ti Saen Kyag

Ati u Si-ti Apyi Cwucwo be

¹ Kristi saen ti ta uwae apyi ikyaen ti ti na som-ti pangma apyi cwucwo be. Ikyaen na yine, ame ku jwam ni, ni tsi ti kubenti. Ni cwe-ni ti a yir ni ti indub ira icwe cwucwo be!

² Nung! Ame Bulus ti ta ne, ame ku ri te ni baa, asiti ani a cwe baa, a na tsen na ni kutxin, ayi ku tso baa, wande ti Kristi nde ikyaen-ni si ti ukaen.

³ Ame u ri shem kyi ira yi. Unde titini ti a cwe baa, a na tsen wu kutxin, awu u putsa kang meme iken ti a bae uwae Kutsingken Icwe ti kinjo ti kinjo.

⁴ Ani ande ti ku kwab baa, ani na u tu risu tinyang uwe Rimam yi fengo na Icwe ti ye su, ani kata pu ni ti Kristi. Ani kafe isim ta ayibrisi na Rimam.

⁵ Ana-ti ande na Yesu, yi fengo na Kusung Rimam ati ru uwae kinjo. Ati som ku ji u sa uwae tsi baa, ati na u tu risu tinyang uwe Rimam.

⁶ Ikyaen ti, asiti unde a kyangte Yesu Kristi, ko awu a tsen kutxin ko awu a tsen-wu be, ayi si-yi ira iki be. Iken tiyang si ti ati u site uwae kinjo u tatso uwae kinjo wune uwae ure ti ati ku ye te ande.

⁷ Kute ani ku kwab timambe. Aye ti byang kyi ni u nda ni ani putsa-ni ira ti kubenti be?

⁸ Ayine si-yi wande na Rimam ti kunn ni kunn be.

⁹ Ande ndufu ku ri baa, “Umung yisiti pang amam ku ndub munn kiraen buredi.”

¹⁰ Ti ati ta te atso uwae fengo Itsekuru-ti Yesu ame sa uwae tsi baa, ani na u putsa-ni fengo iki txi ti ana-m be. Awu unde wu ti ku ye ni kyirunn kyirunn, ko awu a si aye ahoo, Rimam ti u pwen wu rikwen.

¹¹ Ameinja, a baa, ame na ku kwen baa, ande na tsen kang kutxin itawe aba na u tu itinwangru, ande ú nde-ba ame rikaen be, ikyaen ti, ira yine si-yi iken ti ku ndembeb ande utob be. Ira iticwu Yesu risu kutuku ti cice ú si-wu iken ti ande u kyi kufxen atang cwucwo be.

¹² Aba ande ti ku sa ufxaen si kutampwa-ni baa, ani na tsen kang kutxin, aba ā ru yi uwe, u fae ijwe-ba!

¹³ Ana-ni, ameinja, Rimam kunn ni ruye pu wu uwae apyi na itso icwe yine. A saen ni ta, amaa ame ku jwam ni, ni ri-ni baa, ti a saen ti ta pu ba ne, ati na u nde iken ti ijwe-ti ku sha. Iyee! Ni nde na atso wande apyi.

¹⁴ Ikyaen ti, meme ira ti ta uwae kutsingken na icwe si ira kinjo, “Ye ure te unde ice-fu pangma ti afu ku ye ure ti risu-fu.”

¹⁵ Asiti ani a ku sae atso ma ibye kutur u ku kub atso anyi ruwen u ku ter shiryae atso rimenn, ni nung afxen-ni riben nyinyang be, ani u twenji tag atso patag!

Fengo na Kusung Rimam

¹⁶ Imbyi ira-m yine ta re: Ni ya ta ti Kusung Rimam na pu ni ru yi uwog ti awu ku sha. Ayi si-yi iken ti ani ti risu-ni ku sha be.

¹⁷ Ikyaen ti, iken ti utob-ti ande ku sa uwae tsi atang txi ra ti iken ti Kusung Rimam ku sha. Iken ti Kusung Rimam ku sha txi ra ti iken ti utob-ti ande ku sa uwae tsi atang. Iken ifaen yine ku ta rika te atso uwae ijwe-ti. Né iken ti nde ani u nde tu-ni iken ti tinyang ti utob-ni ku sha be.

¹⁸ Asiti ayi a si Kusung Rimam ti pu ni kyang ikyin ku ru, Icwe Rimam ta-yi risu-ni cwucwo be.

¹⁹ Wande na ijwe nae ise paenine ta re. Iyag ti nae, kujwo ijib,

²⁰ apxin ti fen, ti kisi, ti rika, ti kutxu, ti kitsinn, ti rinae, ti ti afu u tso baa, afu na skebtitag, ti tsi txi, ti itikanta,

²¹ ti kitsinn, ti ti unde u ngwa ku shishaen, ti ufunn titibi, ti itso iken ti tsitsi ti pangma ayine. Ame ku fa ni kusen pangma ti ame ri te ni kucang baa, ande ti ku nde itso iken yine u ci-ba rifunn na Kujwokwe Rimam be.

²² Wande ti Kusung Rimam ku nda unde nde txi ra. Ayi si ure, ti utob ti tsen, ti utob ti nae riben, ti utob ti ye, ti itindeya atso, ti itinyang ti ti nde, ti usom ti som ti kubenti.

²³ Ande ti site Kusung Rimam ku nde iken namtur, ama ku ye su risu-ba nyinyang. Icwe iki ta-yi ti byang kyi ande ti ku nde itso iken yine be.

²⁴ Iken ti ande ku sa utob tsi atang ti iken ti ku taen ba ayib, asiti unde a si ana Yesu Kristi, awu sa iken yine tika pu wu. Awu sa utob-wu ana ijwe kwer pu wu risu kutuku ti cice.

²⁵ Ti Kusung Rimam nda ti som usom tishe ne, ame ku jwam baa, unde titini uwae-ti ā ya ta ti Kusung na pu wu kyang ikyi ama.

²⁶ Ti ndub-ti ijwe be, ti sha-ti isim be, ti tsinn-ti kitsinn be.