Galatiya 4 - Kutsingken Ira Rimam ti Saen Kyag

¹ Ame u myae ira iki te ni. Umbae ti u ci rifunn itse-wu, asiti awu a ser ben-wu khika be, awu ti upyi kununn pang atso, ko ti uwe ike awu ti u si itsekuru na meme iken uwae kununn atang.

² Kiye ti awu si umbae tinying, ande iki ta atang ti ku shi wu u ku sae na wu ayib iken ti si ana-wu ru ba kwar kiye ti itse-wu sa tsi na wu ti wu u som usom ti ana-wu.

³ Ti mbwe-yi uwog-ti, kiye ti ati ben-ti ayib khika be, ati si apyi na iken ti site kuko risu utense ike.

⁴ Amaa, ti kiye kumunn, Rimam tom umbae-wu ba, unda mbae wu. A mbae wu uwae icwe Mbayawuda.

⁵ Rimam tom wu ba ti wu na jaebmbe ande ti tsitsi ti ta imbyi Icwe, ikyaen ti meme-ti na kafe anyisu-wu.

⁶ Iken ti u tso paenine baa, ati na si pu ti anyisu na Rimam ti kubenti si ti Rimam tom Kusung na Umbae-wu sang ti utob. Awu ku nda ti kunn wu Rimam baa, “Ite, Ite.”

⁷ Ikyaen yine ani si-ni apyi cwucwo be, ani si pu ni anyisu ti kununn. Asiti ani a si anyisu-wu ama, rifunn na anyisu Rimam si pu yi ana-ni ama.

Kujwo Wande Ande ti Galatiya ku Caeb Bulus Utob

⁸ Kute ani nung-ni Rimam be. Ani si apyi na apxin, ti si-yi iken ti pang ti ande na fen be.

⁹ Tine ani nungye pu ni Rimam. M m! I nyang skeb ti m ri baa, tine Rimam na nungye pu wu ani. Ani kyang rimang u ku sha ti ni kafe ru kaa putsa kyi iken ti site kuko risu utense ike ti ani ya yi ta pu ni? Ayi si iken ti ukaen u ru-yi risu be ko tikiyib!

¹⁰ Ani ku sa usir ti ishaen ti asang iki tsi u ku nde ukwab na yi, fa ti ishaen ufam ti usen meme.

¹¹ Ti ani ku nde iken yine, ame ku kyen ikyenricwu baa, wande-m ti ame nde kutampwa-ni si pu yi ti ukaen.

¹² Ameinja, ame ku jwam ni, ni som pangma ti ame som. Nung! Ame ti risu-m som pangma ti ani som kucang. Uwae usom ti som-ti tetso ani raen-ni ame ira iki be.

¹³ Ani nung pu ni baa, iken ti nde titawe ame tu riyae ti m na tsag te ni ira Rimam ti kucang si ikyaen na kicaeb ijwe-m.

¹⁴ Ko ti kicaeb-m ayi nda ni rikaen, ani sae ru-ni ame be, u txi-ni ame txi be. Ani kyangte me ti ajwo ifaen pangma ame na si atom Rimam ti si apupwen ba. Ani ye me pangma ame na si Yesu Kristi ti risu-wu.

¹⁵ Imi ti nde kyi cwucwo ti ani ku tsen-ni utob te m be? Kiye wu, ani tsen utob te m timambe. Ame tang baa, á baa, a na jwam ni ti ni na nwaen pu ayaen ayib-ni na na m, ani ú nde yi.

¹⁶ Ko ame kafe-m unde ti rika-ni tiri ikyaen ti ame ku ri te ni ira ti kubenti a.

¹⁷ Ande ba ti ame ri ira risu-ba ku kwab ti a na tu risu tinyang uwog-ni, amaa, ayi si-yi ikyaen iken iki ti tinyang be. Aba ku sha ti a na u kata ni te m ikyaen ti ani na putsa ba.

¹⁸ I nyang timambe ti unde ā sha risu tinyang uwog ande, asiti ayi a si ikyaen iken iki ti tinyang. Ayine si kubenti ko kiye titini. Ame ti risu-m ku sha ahan ama, ayi si-yi kiye ti ame te ni ta te atso amam be.

¹⁹ Anyisu-m ti riyaen utob-m, ijwe-m ku pupwe ikyaen-ni pangma unda ti ku pwe umbae, se kiye ti Kristi a som pu wu uwae utob-ni.

²⁰ A baa, ame na te ni ta te atso tine ayi ú nyang timambe, ikyaen ti, ame ú nde tu ti ame u ko si ira-m ti byag yine. Tine, kubenti, ame shanum iken ti ame u nde te ni.

Hajaratu ti Saratu

²¹ Ani ande ti ku sha ti ni putsa sí Icwe Rimam, ani nungye pu ni imbyi ira icwe yi a.

²² A bae atang baa, Ibrahim na site anyisu ti arom ifaen, kinjo si umbae upyi-wu ti unda; ti ifaen ama si umbae uwa-wu ti si-wu upyi be.

²³ Uyin-wu ti awu tu uwog upyi-wu ti unda, a mbae wu pangma ti a ku mbae anyisu ti tsitsi. Uyin-wu ti ifaen ti awu tu uwog unda wu ti si-wu upyi be, a mbae wu yi fengo na unju ti yer ti Rimam yer te wu.

²⁴ Ayine si ira ti ti myae. Anda ifaen bane si pangma itimyae ifaen ti Rimam tatso ande-wu. Unda kinjo ru Rikwen Sinai ba uwog ti Mbayawuda mbe icwe-ba. Unda wune si Hajaratu ti anyisu-wu si apyi.

²⁵ Uwae ira ti myae yine, Hajaratu si Rikwen Sinai ti ta uten ti Arabiya. Ama awu pangma uten Urushelima ti ati nung tine, ikyaen ti, uten wune ti meme ande ti ta uwae-wu si apyi.

²⁶ Amaa, Urushelima ti si ana apupwen ta-wu uwae apyi be. Awu ti si iya-ti Saratu.

²⁷ Pangma ti a bae uwae Kutsingken Rimam baa, “Tsen utob, afu unda ti mbae ji-fu umbae be! Afu unda ti fxen ji-fu kicaeb umbae ti pwe be, shwu ashwu! Nyae ira ti utob ti tsen, ikyaen ti, unda ti a ter ya wu ta u mbae anyisu skeb pu wu unda ti ubaen-wu som te wu.”

²⁸ Ameinja, ani si anyisu na Rimam yi fengo na unju ti yer-wu pangma ti Ishaku ama si umbae Ibrahim yi fengo na unju ti yer.

²⁹ Uwae kiye wu, umbae wu ti Hajaratu mbae yi fengo na utense sa rikaen na inja-wu ti a mbae wu yi fengo na Kusung Rimam. Ayi ku nde ti mbwe-yi tine.

³⁰ Ama cwucwo, isim yine a bae uwae Kutsingken Rimam baa, “Jae ru upyi wune ti umbae-wu! Umbae wu ā sa kujwo fa-wu rifunn na itse-ba be! Ayi si ana umbae unda wu ti si-wu upyi be.”

³¹ Ikyaen yine, ameinja, ati ande na Yesu si-ti anyisu unda ti si upyi be; ati si anyisu unda ti si-wu upyi be.