Galatiya 3 - Kutsingken Ira Rimam ti Saen Kyag

Icwe Ree, Re Uwae kinjo?

¹ Ani ande ti Galatiya, ani ku nde kuskwab a. Aye ti tatso ni kisi? Ti kucang a ri ira ayib te ayib te ni risu fengo ti a sa Yesu, Unde ti Rimam Tsab Tsi, kwer risu kutuku ti cice.

² Ame site ira kinjo ti ame u rang ni. Kusung Rimam ti ani kyangte, ani kyangte wu ikyaen ti ani putsa tag Icwe Rimam ree, re ikyaen ti ani fxen Ira Tinyang na Yesu u ru uwae kinjo atang?

³ Ani nde rimang ku tang itso ira ti kuskwab ahan? Ani bag fengo Rimam ti Kusung na Rimam, ama tine ani ku sha ti ni u mam tag itikwab-ni ti ira rimenn ijwe.

⁴ Meme rikaen ti tu ni uwae fengo Rimam, ayi si ti ukaen a? Ame kab-m ahan be.

⁵ Ti Rimam ku nda ni Kusung wu u ku nde wande ti ku fur ayib kutampwa-ni, awu ku nde iken yine ikyaen ti ani putsa icwe ree, re ikyaen ti ani fxen ira Yesu u ru kubenti atang?

⁶ A bae ira Risu Ibrahim baa, awu na ru kubenti uwog Rimam, ama Rimam pwen uwae kinjo-wu ne baa, awu na site unde ti tinyang.

⁷ Ikyaen yine ni nung nyinyang baa, ayi si ande ti ru uwae kinjo uwog Rimam ti si rishi Ibrahim ti kubenti.

⁸ Ti kucang Rimam pwen mam yi mam uwae kutsingken-wu baa, uwe ike awu na u kyangte ande ti si-ba Mbayawuda be ama, asiti aba a ru kubenti uwog-wu. Né iken ti nde awu ri te Ibrahim baa, “Ayi u si ikyaen-fu Ibrahim ti meme ande ti utense u tu itinyang.”

⁹ Ibrahim ru kubenti u tu itinyang na Rimam. Ayi si ahan ama ande meme ti ru kubenti u tu tinyang Rimam ama.

¹⁰ Ande ti sa ijwe-ba konje uwog icwe ti putsa, rinae Rimam ta risu-ba, ikyaen ti, a bae uwae Kutsingken Rimam baa, “Rinae na Rimam ta risu unde titini ti putsa-wu meme iken ti a bae uwae icwe be.”

¹¹ Ati nung baa, unde u tu-wu risu ti tinyang uwe Rimam ikyaen icwe ti ti putsa be, ikyaen ti, a bae baa, “Unde u nwangru-wu be se awu a ru uwae kinjo u tu risu tinyang uwe na Rimam.”

¹² Fengo Icwe txi ra te fengo na uwae kinjo. Ikyaen ti, a bae baa, “Unde titini ti a putsa icwe yine, awu u tu unyang.” Ira risu uwae kinjo fa atang be.

¹³ Kristi jaeb mbe unyang-ti u nwangru ti uwae rikaen ti a ri baa, ayi na u ba risu ande ti nyatsa Icwe na Rimam. Awu sa ijwe-wu sang fa uwae rinae na Rimam kutunn unju-ti. Awu kafe iken ti a rimbeb wu, pangma ti a bae baa, “Itibi ā tu unde titini ti a kwer wu risu kutuku.”

¹⁴ Awu nde iken yine ikyaen ti, itinyang ti Rimam ri risu Ibrahim na si ba risu ande ti si-ba Mbayawuda be ama, yi fengo na Yesu Kristi. Ayine u nde ikyaen ti meme-ti na u tu Kusung Rimam ti Yesu yer unju baa, awu na u tom ba na ti yi fengo na uwae kinjo.

Icwe ti Unju ti Yer na Rimam

¹⁵ Ameinja-m, ame u tso ni imbyi ira yine ru ye uwae usom ti som-ti uwae utense wune. Kiye ti unde a yer unju te unde iki u ben uben risu-yi, unde iki ko-wu ti wu sae ru yi be. A u myae tu-ba ira iki fa atang be ama.

¹⁶ Ayi si ahan ama ti unju ti yer ti Rimam yer te Ibrahim. A bae baa, Rimam na yer unju te Ibrahim fa ti unde ti u ba isim-wu. A ri-ba baa, “Ande ti u ba isim-wu” be, a ri baa, “Unde ti u ba isim-wu.” Ayi si unde kinjo, si-yi ande ti ujwunn be. “Unde ti u ba isim-wu” ti aba ri atang ama, si Kristi.

¹⁷ Imbyi ira-m ta re. Rimam tawe yer unju te Ibrahim u ben uben risu-yi. Asang ukob inje ka mbe rijwe ita wur ru titawe a ru ba bae Icwe Rimam. Iken ti a bae isim ne nde tu-wu ti wu fen mbeb ira ti Rimam ri ti kucang be. Unju ti yer na Rimam tsi yer pu yi. A u saen tu-ba yi be.

¹⁸ Á baa, ati na u tu rinyangwae na Rimam ikyaen ti ati na ku putsa Icwe, ayi ú si-yi ikyaen unju ti yer cwucwo be. Amaa, ati nung pu ti baa, ayi si ikyaen na unju ti yer na Rimam ti Ibrahim tu rinyangwae uwog Rimam.

¹⁹ Asiti ayi a si ahan, imi ti nde a sa icwe Rimam ba? A sa Icwe sang fa atang isim ikyaen ti yi na tatso ande riraen-ba tsi ku ji awu rishi Ibrahim, awu unde wu nee Rimam yer unju risu-wu. Atom Rimam ti apupwen nda ti icwe-wu yi fengo na unde ti tsi kutampwa-ti te Rimam.

²⁰ Unju ti yer ti Rimam yer te Ibrahim bom skeb icwe ti Rimam nda ti yi fengo na Musa ikyaen ti kutúnn iki tsi-wu kutampwa-ba be. Rimam kinjo-wu ti nde yi te ajwo-wu.

Itinyang na Icwe Rimam

²¹ Ko ira ti ta uwae Icwe Rimam tsi ukub te unju ti yer na Rimam a? Iyee, ayi si-yi ahan be ko tikiyib. Á baa, icwe iki na ta atang ti site kuko ti u nda unde unyang, ande ú tu risu ti tinyang uwe Rimam uwae icwe ti putsa.

²² Amaa, a bae uwae Kutsingken Rimam paenine baa, meme ande ti utense na ta uwae pursuna na ikentitibi ti ti nde. Ayine si ikyaen ti uwae kinjo na u si fengo ti Rimam na u nda ande rinyangwae ti awu yer unju te ba. Ande ti u tu yi si ande ti ru uwae kinjo uwog na Yesu, Unde ti Rimam Tsab Tsi.

²³ Kute ti fengo ta-yi ti ande u ru uwae kinjo uwog Yesu khika be, ati ande si pangma ande ti ta uwae pursuna ikyaen ira Icwe Rimam ti ati nyatsa. Icwe yi yirkyi ti, som ku ji kiye ti Rimam u tatso ti fengo na uwae kinjo uwog Yesu.

²⁴ Ikyaen yine, icwe yi si pangma unde ti ku nungkyi ti ru ba kwar kiye ti Kristi u ru ba, ikyaen ti ti na tu risu ti tinyang uwe na Rimam yi fengo na uwae kinjo ti ati ru uwog Kristi.

²⁵ Tine ti kiye na uwae kinjo ru ba pu yi, ati ku sha-ti unde ti u nungkyi ti cwucwo be. Wande na icwe mam pu yi.

²⁶ Meme-ni si pu ni anyisu na Rimam tiri yi fengo na uwae kinjo ti ani ru uwog na Yesu Kristi.

²⁷ Ikyaen ti, a pu meme-ni ren te Kristi uwae batisma ti a nde na ni. Tine Kristi bur kyi ni pangma atupwa ti ani pu si ijwe-ni.

²⁸ Ama yi fengo na itiren te Kristi, ko unde a si urae Mbayawuda ko awu a si urae Helene, ayi si-yi ira iki cwucwo be. Itikata ta-yi be, ko kutampwa apyi ti ande ti som usom ti risu-ba, ko kutampwa arom ti anda. Ikyaen ti, uwae itiren-ni ti Yesu Kristi, meme-ni si itso unde kinjo.

²⁹ Ama asiti ani a si ana Kristi, ani si pu ni rishi na Ibrahim. Rifunn Ibrahim ama si pu yi ana-ni, yi fengo na unju ti yer ti Rimam yer te wu.