Galatiya 2 - Kutsingken Ira Rimam ti Saen Kyag

Bulus ti Atom ti Tsitsi

¹ Tiri, isim asang rijwe asu inje ame nwunn cwucwo u tso yi Urushelima. Ame ti Barnaba putsa atso. Ati pu Titus ye su.

² Ame ru ka atang ikyaen ti, Rimam tsag te m baa, ame na ru yi atang. Ame tu ande ti uwe atang u ri ira te ba uwae kitam. Ame tsag te ba itso ira tinyang ti ame kyang ku ri te ande ti si-ba Mbayawuda be, ikyaen ti, ame ku sha-m ti wande-m ti kucang ti wande-m ti ame ku nde ajwo kiye wu na si ti ukaen be.

³ Ko ti Titus ti te m ta tetso si urae Helene, a ye-ba wu ti ribom baa, awu na tsen kang kutxin pangma ti Mbayawuda ku nde be.

⁴ Amaa, ira nwunn ikyaen ti, ande iki ti ku putsa Rimam-ti ti unju amam tam sang fa kutampwa-ti atang a na jwin ti ujwin u nung itso usom ti som ti ati ku som isim ti Yesu Kristi saen ti ta uwae rikaen upyi na icwe Mbayawuda. Aba ku pwen ti aba u shir ti kafe sang kyi uwae-yi cwucwo.

⁵ Ati cwe-ti ira-ba yi be ko tikiyib, ikyaen ti, ati ku sha ti Ira Tinyang na Yesu na u tsi ji ni ti kubenti-yi.

⁶ Uwog wune, ande ba ti ku sae ijwe-ba baa, aba na si ande ti rurob siskeb, aba shem-ba ira iki risu ira ti ame ku ri be. (Ana-ba, ko aba a si ande ti rurob, ko a si-ba be, ayi si-yi ira iki uwog-m be. Rimam ku nung ande baa, a na pang atso).

⁷ Amaa aba nungye baa, Rimam na sa ira-wu fae si m kujwo ikyaen ti m na tsag te ande ti si-ba Mbayawuda be, pangma ti awu nda Bitrus ku tsag te Mbayawuda. Ama meme-ba cwe ira-m.

⁸ Awu Rimam ti nda Bitrus nde wande ti kuko uwog Mbayawuda, ayi si sí awu ti ku nde wande ti kuko te m ama ikyaen ti m na ri ira-wu te ande ti si-ba Mbayawuda be.

⁹ Ama cwucwo, Yakubu ti Bitrus ti Yohana, ti si ande ti kpakang uwae kumbub ande na Rimam ti uten ti Urushelima, kiye ti aba nungye ayibrisi Rimam ti si ba risu-m, aba ru ba uwog-m ti Barnaba u ba ye ti bur utob uwae ure. Aba cwe baa, ati na ru ka tsag Ira Yesu te ande ti si-ba Mbayawuda be, aba ama na u ru yi uwog Mbayawuda.

¹⁰ Iken kinjo ti aba jwam ti si ti ati na tangsom te ande ti rikaen ti ta uwog-ba. Ti kucang-yi ma ayine si iken ti ame sa utob-m tsi risu-yi ti ame na u nde.

Bulus Tu Bitrus te Riraen

¹¹ Amaa, kiye ti Bitrus ru ba Antiyok, ame ri yae wu paenine riraen-wu ti shwong nae ti ise.

¹² Awu ku ci wuci te ameinja-ti ti si-ba Mbayawuda be, sa sa sa ru ba kwar kiye ti ande iki ru uwog Yakubu ba. Amaa, kiye ti aba ru ba, awu Bitrus faen fe ti isim u fxae wuci ti ti ci te ameinja-ti ti si-ba Mbayawuda be. Awu nde ayine ikyaen ti, awu ku kyen ikyenricwu ande ti ku sha ti a na u tsen kang ande ti si-ba Mbayawuda be kutxin.

¹³ Mbayawuda ti tsitsi nde ti mbwe-yi ama u sang uwae ira ti ti kong yi. Barnaba ama, a shir wu sang uwae ira yi, a nda wu nde iken ti pang-yi atang be pangma ti aba ku nde.

¹⁴ Kiye ti ame nung baa, aba na ku kyang-ba ikyin ti kubenti yi uwae fengo Yesu be, ame rang Bitrus ira uwe ande meme ti funn atang baa, “Afu si urae Mbayawuda, amaa, afu ku putsa-fu fengo Mbayawuda be. Afu ku som usom-fu pangma ande ti si-ba Mbayawuda be, afu u nde rimang u tsikunn ti ku ri te ande ti si-ba Mbayawuda be baa, aba na putsa kang icwe Mbayawuda?”

A Nwangru Ande Meme yi Fengo Kinjo

¹⁵ Ati ti risu-ti si Mbayawuda. A mbae ti uwae rishi Mbayawuda. Ati si-ti ande ti ajib ti ku nyatsa Icwe Rimam be.

¹⁶ Ko ti ayi si ahan, ati nung pu ti ama baa, unde iki na u tu-wu risu ti tinyang uwe Rimam ikyaen ti awu ku putsa Icwe Rimam be. Unde u tu risu ti tinyang uwe Rimam asiti awu a ru kubenti uwog Yesu Kristi. Ati ama ru uwae kinjo uwog Yesu Kristi. Ayi si-yi ikyaen ti ati u tu risu ti tinyang uwe Rimam yi fengo na icwe ti putsa be. Ayi si ikyaen ti ti tu risu tinyang yi fengo na uwae kinjo uwog Kristi. Unde u tu-wu risu ti tinyang yi fengo na Icwe ti putsa be.

¹⁷ Tine ati ku sha risu ti tinyang uwe Rimam yi fengo na itiren-ti te Kristi. A baa, yi fengo wune a tu ti ati si ande ti nyatsa Icwe Rimam, ayi ú tatso baa imi? Ko Yesu Kristi na nda ti nde ikentitibi a. Iyee! Ayi si-yi ahan be, ko tikiyib!

¹⁸ Asiti ame a pyir Icwe Rimam ama tiri u kafe ba sa uwae tsi risu-yi baa, ame na u nwangru atang, ayi tatso baa, ame na nyatsa ice.

¹⁹ Yi fengo Icwe Rimam ame ru ba kafe isim ta yi. Ayi ta-yi te kuko risu-m cwucwo be. Amaa, ayine nde ikyaen ti m ser user yi uwog Rimam.

²⁰ Kiye ti a kwer wen Kristi risu kutuku ti cice, ame te wu ta tetso. Unyang ti ame ta te wu tine si-yi ana-m be, ayi si unyang na Yesu Kristi ti ta utob-m. Usom ti som ti ame som uwae ijwe-m ne, si ikyaen ti ame ru uwae kinjo uwog Kristi, Umbae Rimam, awu ti ye ure te me u cwu ricwu ikyaen-m.

²¹ Ana-m, ame u sae ru-m rinyangwae na Rimam be. A baa, unde na u tu risu ti tinyang uwe Rimam uwae Icwe ti putsa, iticwu Kristi ú si ti ukaen amam.