Galatiya 1 - Kutsingken Ira Rimam ti Saen Kyag

¹ Kutsingken wune ru uwog-m Bulus, unde ti atom. Ame si-m atom na unde iki be. Ayi si-yi unde iki ti tsab me ikyaen wande yine be. Ayi si Yesu Kristi ti nde yi, ti Itse-ti Rimam, awu ti kunn nwunn Yesu uwae iticwu.

² Ame ti meme ameinja ti ta te m ike ku kunnji ni ira, ani ambub ande na Rimam ti ta uwae ikyaeb uten ti Galatiya.

³ Ayibrisi ti kujimshwur ā ru uwog Itse-ti Rimam ti Itsekuru-ti Yesu Kristi ba uwog-ni.

⁴ Ayi si awu Yesu Kristi ti cwu ricwu ikyaen ikentitibi-ti ikyaen ti wu nwangru ti uwae usom ti som na apyi ti ati som uwae utense titibi wune, pangma ti Itse-ti Rimam myae tsi ti kucang.

⁵ Kuko ā si ana-wu Rimam tsi kunn ike ru fe yi uwe. Ayi ā si ahan.

Kusen ti Fwa Risu Iken ti Kwen Tikong

⁶ Iken-ni ti ani ku nde ku fur me ayib! Fengo rwen-yi rwen be, ani ku kafe isim ta Rimam, awu ti tso ayibrisi-wu ba uwog-ni uwae Yesu Kristi u kunn ni ba uwog-wu. Ani ya wu ta u ter ru ka putsa-ni ira Rimam iki txi.

⁷ Amaa, ayi si-yi ira Rimam be, ko tikiyib. Ariki ta atang ti ku ye ni kyirunn u ku kwab ti a u kafe ira tinyang na Kristi ru yi fengo iki.

⁸ Ame ku ri te ni baa, asiti unde iki a ru ba ri ira iki txi ti ira ti ati tsag te ni kute, ko yi a si ati ti risu-ti ko atom na Rimam ti apupwen, Rimam ā pwen wu rikwen iticwu!

⁹ Pangma ti ati ri te ni ti kucang, ame ku shemkyi tine baa, asiti unde iki a ku tsag te ni ira risu Kristi ti si-yi ira ti ani fxen uwog-m ti kucang be, kufaen Rimam ā ye wu!

¹⁰ Uwae ira ti ame ri ne, ani ku tang baa, ame ku sha ti ame na tu risu tinyang uwog ande a? Ame ku sha risu ti tinyang uwog Rimam amam, si-yi ana ande be. A baa, ame na tsikunn ti ku nde wande-m ikyaen ti m tu risu ti tinyang uwog ande, ame u si-m upyi Yesu Kristi cwucwo be.

¹¹ Ameinja-m, ame ku sha ti ni na nung baa, ira tinyang na Yesu ti ame ku tsag te ande na ru-yi uwog ande ba be.

¹² Ame mbe-m ayi uwog unde be. I si-yi unde iki ti kwen na me ira yi be. I si Yesu Kristi ti risu-wu ti tatso me ira yine.

¹³ Ani fxen pu ni ira risu usom ti som-m ti ame som kiye ti ame ku putsa fengo Rimam na Mbayawuda. Kiye wu ame nda kumbub ande na Yesu rikaen u nung-m risi-ba be. Ame kwab ti ame twenji ira Yesu ti aba ku putsa.

¹⁴ Ame kwen ye ira Rimam-ti ti ati Mbayawuda ku putsa, skeb pu me araen cwu-m ti tsitsi yang akwen. Ame sa uwae tsi risu iken ti kwen na fengo abitse-ti ti kute skeb pu me meme-ba.

¹⁵ Amaa Rimam tsab ra m tsi iyenkyab ti ti a mbae-ba ame khika be, u kunn me uwae ayibrisi-wu.

¹⁶ Awu cwe u tso me Umbae-wu ikyaen ti ame na sa Ira Tinyang-wu ka tsag te ande ti ise. Kiye wu, ame nwunn ka-m uwog unde iki ti ame u ka sha kumyae be.

¹⁷ Ame ru ka-m Urushelima uwog ande ti sang wande na ande ti atom uwe-m be. Ame ru-m yi uten Arabiya u ka som atang itawe ame nwunn atang u kafe ba Damasiku.

¹⁸ Isim asang ita ame nwunn ru yi Urushelima u ka nung Bitrus. Ame som te wu atang ka atsab ifaen.

¹⁹ Kiye ti ame ta te wu atang ame nung-m ande ti atom iki be, kum Yakubu inja Itsekuru-ti amam ti ame tu.

²⁰ (Ira ti ame ku bae ne si ira ti kubenti. I si-yi rifen ti ame ku wor be. Ame ku ben uben uwe Rimam!)

²¹ Isim ayine ame nwunn u ru yi uten ti Siriya ti Kilikiya.

²² Uwae kiye wu, ande na Yesu ti ta uten ti Yawudiya nung-ba ame ti ayib khika be.

²³ Aba ku fxen nyáng ira ti ariki ku ri baa, “Unde wu ti ku nda kob ti rikaen kucang, tine, awu ku tsag te ande ira risu Yesu ti nee kute awu kwab ti wu twenji yi.”

²⁴ Ikyaen yine, aba nda Rimam kuko ikyaen iken ti tu me ne.