Filipi 4 - Kutsingken Ira Rimam ti Saen Kyag

Bulus ku Fwa Ba Kusen

¹ Ameinja-m ti utob uwae-m ti utob-m tsi ti m sae ayib-ni. Ani ti ku nda m utob ti tsen u si kujwojang wande-m yi fengo Rimam. Ni tsi ting ting yi fengo Itsekuru, ande ti ure-m.

² Ame ku jwam ambakaya-m Ewodiya ti Suntuke baa, a na ya ishaen ti shaen-ba ayi na ta, ti aba na cwe tetso uwae fengo Itsekuru-ti.

³ Afu urwan wande-m ti kubenti, ame ku jwam fu, ndeya anda abane, ikyaen ti, aba te m kwab tetso uwae wande na ira tinyang na Yesu, fa ti Kilementi ti itaen ti tsitsi ti nde wande te m. Ame tang baa, rinyi-ba ta uwae kutsingken na rinyi ande ti tu unyang tishe.

⁴ Ni som usom-ni te Itsekuru-ti ti utob ti tsen. Ame ku shem kyi cwucwo baa, ni tsen utob!

⁵ Ni tso ande meme baa, ani na si ande ti tinyang. Itsekuru-ti kyang ku yaen pu wu ti ti ba.

⁶ Ni kab-ni ira risu rikaen-ni be. Uwae-yi meme, ni ri te Rimam iken ti ani ku sha. Ni jwam wu ti wu ndeya ni, ti ni nde na wu fxaefa.

⁷ Ama Rimam u nda ni kujimshwur-wu ti skeb tag itinungye meme uwae utense ne. Awu u nungkyi utob-ni, ti ira ti tang-ni uwae usom ti som-ni te Yesu Kristi.

⁸ Ti ricwunnkyi, ameinja, ni sa utob na iken ti si kubenti ti iken ti site rurob ti iken ti pang atang, ti iken ti sisaen, ti iken ti si ana ure, ti iken ti pang ti a nda yi kuko, ti iken meme ti si iken ti tinyang u pang ti ande u teb yi.

⁹ Ni nde wande ti iken ti ani kwen, u tu uwog-m. Iken ti ni fxen u sae uwog-m, ni putsa yi, Rimam na kujimshwur u te ni ta tetso.

Bulus ku Nde na Ba Fxaefa

¹⁰ Ame tsen utob timambe uwe Itsekuru, ikyaen ti, ani ku tangsom kyi te m. Kubenti, kucang, ani site utob ti ni u ndeya m, amaa riya ti ta-yi be.

¹¹ Ame ku ri-m ira yine ikyaen ti ame ku sha iken iki uwog-ni be. Iyee! Ana-m, ame nung pu m baa, iken ti ame site, ame ku rob utob te yi.

¹² Ame nung ti m u ye su ijwe-m uwae rikaen, ame nung ti m u ye su ijwe-m uwae rifunn ama. A mbubta na m ira ti cwucwe ne. Ayi a si rikyaen, ame ku ci ku kyaen. Ayi a si rimenn, ame nung iken ti ame ku nde te yi. Ko ame a ta uwae rifunn, ko uwae rikaen, ame kab-m uwae be.

¹³ Ame ku nde tu iken meme uwae kpakang ti Yesu Kristi ku nda m.

¹⁴ Ko ti ayi si ahan, ayi nyang timambe ti ani cwe u ndeya m uwae rikaen-m.

¹⁵ Ani ande ti Filipi ti risu-ni nung pu ni baa, sa ti kiye ti ame nwunn Makedoniya u bag ira ti tinyang ti ti ri uwog-ni, kumbub ande na Rimam iki ndeya-ba ame be, ani amam ti ren risu te m uwae ititindeya atso.

¹⁶ Ayi si ahan ama kiye ti ame ta Tesalonika, ani tom iken ti ame shanum ru ba na m skeb kipaen kinjo.

¹⁷ Ayi si-yi rinyangwae-ni yine ti ame sa utob-m tsi atang be. Ame ku myae baa, ani ti risu-ni u tu itinyang uwog Rimam ikyaen rinyangwae ti ani sa ba uwog-m.

¹⁸ Ame mbe tag pu m iken ti ani pae na m meme. Ayi ko pu yi ame. Ti ti ame tu rinyangwae-ni uwog Eparfoditu, ame shanum-m iken iki be. Itindeya ti ani nda m si pangma iken ti twen ti ani twen na Rimam nee kuyang-yi nyang timambe. Ayi si itso iken ti Rimam u paembe yi ti utob ti tsen.

¹⁹ Rimam-m ti u sha na ni iken ti ani sha num ruye uwae rifunn ti ana-wu ti ko nyatsitsa, yi fengo na wande na Yesu Kristi.

²⁰ Kuko ā si ana Itsekuru-ti Rimam tsikunn ike ru fife yi uwe. Ayi ā si ahan.

²¹ Kunnji na m meme ande Rimam ti ku putsa Yesu Kristi ti utob kinjo. Ameinja ti ta te m ike ama ku kunnji ni ira.

²² Meme ande Rimam ti ike, fa ti itaen ti ta kununn Ukwe Kaisar ku kunnji ni ira.

²³ Rinyangwae na Itsekuru-ti Yesu Kristi ā te ni meme som tetso.