Filipi 1 - Kutsingken Ira Rimam ti Saen Kyag

¹ Bulus, ti Timoti, apyi Yesu Kristi, bae kutsingken wune ba ku na ni ande ti ta uten ti Filipi, meme-ni ande ti saen kyag ti putsa Yesu Kristi. Ati bae ku na ni fa ti ande ti uwe-ni, ti ande ti ani tsab ti a na ndeya ba.

² Itse-ti Rimam ti Itsekuru-ti Yesu Kristi ā nda ni rinyangwae ti kujimshwur.

Fxaefa Bulus ti Itijwam

³ Kiye titini ti ame a tangsom te ni, ame ku fxaefa te Rimam-m.

⁴ Ame ku tsen utob kiye titini ti ame ku jwam Rimam risu-ni meme,

⁵ ikyaen ti nee, ani te m ku tsag Ira tinyang Yesu tetso te ande, sa ti usir ti ame ka uwog-ni ru ba kwar tine.

⁶ Ame ku ru kubenti baa, awu Rimam ti bag wande ti tinyang riyaen utob-ni, awu na u sa yi ru fife ka tsikunn ti usir ti Yesu Kristi u kafe ru ba.

⁷ Ayi si iken ti pang atang ti ame ku tang itso ira yine risu-ni, ikyaen ti, ame u munnji-m te ni be. Ati ku tu rinyangwae Rimam tetso tine ti ame ta uwae pursuna, ti kiye ti ame ta ise ku tsag te ande ira ti tinyang.

⁸ Rimam nung itso ure ti ame site ikyaen ni. I si itso ure ti Yesu Kristi ti risu-wu ku ye te ni.

⁹ Ame ku jwam Rimam baa, ure yi ti ani site na ā ko fufa ru yi uwe, ti ani na u site ben-ayib ti itinungye ko fufa.

¹⁰ Ame ku sha ti ni na nungye iken ti nyang siskeb ti ani u putsa atang. Ama usir ti Yesu Kristi a ru ba, awu u tu ni, ani som usom ti saen kyag u si-ni te riraen be,

¹¹ u ku waen awaen ti tinyang, ti si wande-ni ti tinyang ti ani ku nde uwae kuko na Yesu Kristi ti ta utob-ni. Ayine u sa rurob ti riyinn na rinyi Rimam tiyang akwen.

Rikaen Bulus Kafe Iken ti Tinyang

¹² Ameinja, ame ku sha ti ni nung baa, ira titibi ti tu m ike ne ndeya ira Rimam timambe. Ayi nda yi ku ru ru yi uwe uwe skeb ti kucang.

¹³ Ricwunnkyi-yi, ayi nda akyirten ti meme ande ti ku nungkyi m uwae pursuna ike nungye paenine baa, ayi na si ikyaen ira Kristi nee a cwunn kyi m.

¹⁴ Ama ameinja yang-ba akwen tsi ting ting fengo Itsekuru-ti Yesu skeb ti kucang, kiye ti aba nung baa, a na ye m cwunnkyi. Aba tsi ti kpakang u ku ya iskin ira Rimam, ikyenricwu ta-yi cwucwo be.

¹⁵ Ariki ta atang ti ku ri ira Yesu Kristi uwae kitsinn, ti risu ti myae te ariki. Ariki ama ku nde yi ti utob kinjo.

¹⁶ Aba ti ku nde ti utob-ba kinjo ku nde yi ikyaen ti a site ure te m. Aba nung pu ba baa, a ye m cwunnkyi ike ikyaen ti m na ri te ande baa, ira Rimam na si kubenti.

¹⁷ Aba ande ti kitsinn ba ne ku ya-ba iskin ira Kristi ti utob kinjo be. Aba ku sha ti a na skeb me ti a na tu rinyi. Aba ku tang baa, aba na u nde caeb m pursuna ike.

¹⁸ Ira iki ta-yi be. Uwog-m, iken kinjo ti ame ku sha, si ti a ku ri ira Yesu Kristi, ko asiti aba a ku nde yi ti uwae kinjo ko ti uwae ifaen. Ame ku tsen utob uwae-yi meme.

¹⁹ Ame nung pu m baa, ti ani ku jwam itijwam ikyaen-m ne, Kusung na Yesu Kristi u ndeya m, u nda ande ti uwe ti a saen m ta.

²⁰ Ame sa utob tsi u nung uwae utob-m baa, ame u wae-m rukwae be, ko tikiyib. Ame u tsi ti ribom utob tine pangma ti ame ku nde kob, ikyaen ti, ko ame a cwu, ko ame a ser, Yesu Kristi u tu kuko uwog-m.

²¹ Ikyaen ti, uwog ti ana-m, ame a som ti unyang, ayi si ana Yesu Kristi. Asiti ame a cwu ama, ayi si kujwojang ti tinyang.

²² Asiti ame a som ti unyang uwae utense, ame u nde wande ti u ndeya ande. Iken ifaen ne nda me, ame nung-m titini ti ame u tsab sa uwae-yi be.

²³ Ayi nda m tsi fa kutampwa. Iken ti ame ku sha si ti ame ú cwu u ka som-m te Kristi.

²⁴ Ama ame ku nungkyi cwucwo baa, ayi na u nyang skeb uwog-ni ti m na ta ti uwae utense ike.

²⁵ Ame kab-m uwae risu iken yine be. Ame nung pu m baa, ame na u cwu-m be. Ame u tsi ti unyang te ni u ndeya ni ti ni ru yi uwe te utob titsen yi uwae kinjo-ni,

²⁶ ikyaen ti, asiti ame a kafe ba tu ni, ayi u nda ni kam ashwu uwae fengo Yesu Kristi ko fufa ru yi uwe, ikyaen ti ame ruye uwae pursuna ba tu ni.

²⁷ Ni som itso usom ti pang atang uwog ande ti putsa ira tinyang na Kristi. Asiti ame a kafe ba tu ni, ko ame a kafe ba-m cwucwo be, ame ku sha ti m fxen ira ti tinyang risu-ni baa, ani na ku tsi ting ting ti utob kinjo u ku ren risu ti uwog kinjo ikyaen iken ti ati ru uwae kinjo atang, ti si Ira Tinyang na Kristi.

²⁸ Ni kyen-ni ikyenricwu ande ti rika-ni be, ko tikiyib. Ayine u tso ba paenine baa, aba u jwunnsi, ani u ci rika. Rimam ti u nwangru ni.

²⁹ Ikyaen ti, pangma ti Rimam cwe na ni baa, ani na ru uwae kinjo uwog Yesu Kristi, awu ama cwe na ni baa, ani na u ngwa rikaen ikyaen-wu ama.

³⁰ Ame te ni ta tetso uwae rika yi. Ayi si rika ti ani nung ame ku ta ti kucang, si sí rika yi ti ame ku ta ba kwer tine, pangma ti ani fxen.