Esita 9 - Kutsingken Ira Rimam ti Saen Kyag

Rika ti Mbayawuda Ci Risu Ande ti Rika-ba

¹ Uwae ushaen ti rijwe asu ifaen ti si ushaen Adar, uwae usir ti rijwe asu ita na ushaen wu, kiye nde pu yi ti a u nde wande te kutsa ukwe ti kutsingken icwe yi, usir wu ti ande rika Mbayawuda sa uwae-ba tsi ti a na u ta risu Mbayawuda, ama ayi ba kafe-yi Mbayawuda ti ba ta risu-ba.

² Mbayawuda kunnbyir atso ko aka ti aba ta atang uwae uten uten ti Ahasuweru nae ukwe risu-yi, u som ti ujwin ku sae unde ti u ba tekunn ba. Unde iki ta-wu ti tsi tu te ba be ikyaen ti meme ande ba kyen ikyenricwu Mbayawuda.

³ Meme ande ti ta risu unju uten unju uten, ti ande ti uwe ti uwe, ti Gomna Gomna, ti ande ti ku nde wande te ukwe, ikyaen ti a ku kyen ikyenricwu Mordekai.

⁴ Ikyaen ti, awu Mordekai site rurob uwae kununn ukwe, rinyi-wu pu iten kyife uwae uten uten meme. Mordekai kpag pu ku fufa ku fufa.

⁵ Tiri, Mbayawuda pu isu ande rika-ba ti kisum wen, ama yerwen ba u twenji ba ku ru. Aba nde iken ti nyangwae-ba te ande ti rika-ba.

⁶ Uwae Susa, uten tiyang ti risu-wu, Mbayawuda wen arom ka ukob itsong.

⁷ Cwucwo, a wen kwer ti Parshandata, ti Dalfon, ti Asipata

⁸ ti Porata ti Adaliya ti Aridata,

⁹ ti Parmashita ti Arisayi ti Aridayi ti Vayizata,

¹⁰ ti si anyisu ti arom rijwe na Haman umbae Hamedata, unde ti rika Mbayawuda, amaa, a tekunn-ba isu iki be.

¹¹ Ti usir wu, aba ri te ukwe ujwunn ande ti a wen uwae Susa, uten tiyang.

¹² Ukwe ri te Esita, uwa ukwe baa, “Uwae Susa uten tiyang wu amam, Mbayawuda wen arom ukob itsong fa ti anyisu Haman ti arom rijwe. A ri-ba iken ti a nde uwae uten uten ukwe ti tsitsi be. Tine, imi ti afu ku jwam kyi? A u nda fu. Imi ti afu ku sha cwucwo, ame u nde yi na fu.”

¹³ Ama Esita ri baa, “Asiti ayi a nyang uwae ukwe, a cwe na Mbayawuda ti ta uwae Susa ti a nde kyi iken ti a nde yaka ne pangma ti icwe ukwe ri, ucwe, a ye rikom anyisu Haman ti arom rijwe bane kyensi kutuku.”

¹⁴ Tiri ukwe cwe, a ya iski uwae Susa u ye rikom anyisu Haman ti arom rijwe ba ka kyensi kutuku

¹⁵ Mbayawuda ti ta Susa byir kyi atso cwucwo uwae usir ti rijwe asu inje na ushaen Adar, ama wen arom ukob ita, amaa, a tekunn-ba isu-ba iki be.

¹⁶ Kiye wu, Mbayawuda ti tsitsi ti ta uwae uten uten ti ukwe ta risu-yi byir atso ti a u nwangru risu-ba uwog ande rika-ba. Aba wen ande kumbub mae ita mbe rijwe asu itsong, ama unyang tso ba ruwen, amaa, a tekunn-ba isu ande rika-ba iki be.

¹⁷ Iken yine nde uwae usir ti rijwe asu ita na ushaen Adar. Usir ti rijwe asu inje, a pu unyang atang, u sa usir wu tsi ti a naa ku nde ukwab fa ti ushwu ti shwu.

Ukwab na Purim

¹⁸ Ama Mbayawuda ti ta uwae Susa byir atso uwae usir ti rijwe asu ita, ti usir ti rijwe asu inje, ama pu unyang usir ti rijwe asu itsong, u sa usir wu tsi ti a naa ku nde ukwab, ti ushwu ti shwu.

¹⁹ Ikyaen yine Mbayawuda ti som umbae uten uten sa usir ti rijwe asu inje na ushaen Adar tsi ti awu u si usir ukwab ti nde, ti ushwu ti shwu, ti unyang ti pu, ama u ka wuci na atso.

²⁰ Tiri Mordekai bae iken yine tsi, u bae kutsingken na Mbayawuda ti ta uten uten ti Ahasuweru nae ukwe risu-yi, uten ti ta fifer, ti uten ti ta rurwen,

²¹ ti a na ye su usir ti rijwe asu inje ti usir ti rijwe asu itsong uwae kusang kusang,

²² ikyaen ti ayi si usir ti unyang tso Mbayawuda ruwen uwog ande rika-ba, awu si ushaen ti utob tibyir-ba kafe ushwu ti shwu, ricwu ti kwo-ba, kafe usir unyang ti pu, aba na pu usir yine na tsi ti a naa ku nde ukwab ti ushwu ti shwu, ama na u ka wuci na atso, ama ka rinyangwae na ande ti rikaen.

²³ Tiri Mbayawuda cwe ti a na ku nde iken ti a bag ku nde kucang pangma ti Mordekai bae na ba.

²⁴ Ikyaen ti Haman unde ti Agagi, umbae Hamedata, unde rika Mbayawuda, myae ira titibi ti awu u twenji ba. A nde pur ti si fengo ititsab yi icwe-ba ikyaen ti a u wenji u twenji Mbayawuda.

²⁵ Kiye ti Esita ba uwog ukwe, ukwe nda ba, a bae kutsingken icwe ruye ti kumyae titibi Haman risu Mbayawuda na kafe tso ti risu-wu, ti a na ye wu ti anyisu-wu ti arom kyensi ituku.

²⁶ Ikyaen yine, a ku kunn usir yi baa, Purim, ikyaen ti a tu rinyi purim ru ye pur. Ikyaen iken yi ti a bae uwae kutsingken wune, ti iken ti a sae, ti ira ti tu ba,

²⁷ ama Mbayawuda sa yi kafe icwe na ijwe-ba ti rishi-ba ti meme ande ti sangfa ba baa, a na ye su usir ifaen yine yi kiye ti a sa tsi uwae kusang ti ana u be-ba yi be be pangma ti a bae,

²⁸ baa, aba na ti utso-ba naa ku ye su, ku tangsom te usir yi uwae ishikununn titini, ti ukwe ta risu-wu, ti a na be-ba itinde ukwab purim uwae usom ti som Mbayawuda, ko ti rishi-ba u munnji usir yine be.

²⁹ Tiri Esita, uwa ukwe, unda Abihayil, ti Mordekai urae Mbayawuda bae kyi kutsingken ti ribom nae riben ti a yirbom ira risu itinde na purim.

³⁰ A ka atsingken yine na meme Mbayawuda ti ta uwae uten uten ukob kinjo ti rikom asu itsongfaen ti Ahasuweru ta risu-yi, ama a tu atsingken yi uwae kujimshwur ti kubenti,

³¹ baa, a na u ye su usir ifaen na purim yine yi kiye kiye yi ti a sa tsi pangma ti Mordekai, urae Mbayawuda, ti Esita, uwa ukwe nda Mbayawuda unju ti a na nde, ama Mbayawuda sa yi kafe icwe na ijwe-ba, ti rishi-ba ti a naa ku cwe unju u ku byir utob.

³² Ira ti Esita ri risu purim, a sa yi kafe icwe ti aba ku tsikunn ti ti nde yi. A bae yi bae.