Esita 8 - Kutsingken Ira Rimam ti Saen Kyag

Ukwe Bae Iken Itindeya ana Mbayawuda

¹ Ti usir wu, ukwe Ahasuweru pu meme iken ti Haman, unde ti rika Mbayawuda site, na Esita, uwa ukwe. Ama Mordekai sang ba uwe ukwe ikyaen ti, Esita ri te pu wu ukwe baa, Mordekai na si rishi-wu.

² Tiri ukwe nwaen ra kunyang-wu ti a ku kyag rinyi ukwe ru atang nee awu nda Haman kucang, u sa fwa Mordekai kujwo, ama Esita pu ra wu ka tsokyi kununn Haman.

³ Tiri Esita ku riben uwe ukwe cwucwo u jwam wu te ira ti jwub baa, awu na yerwen kumyae titibi Haman, urae Agagi, risu Mbayawuda.

⁴ Ama ukwe sa ukum zinariya-wu tso Esita. Esita fwa sunwunn u tsi uwe ukwe.

⁵ Awu ri baa, “Asiti ayi a nyang uwae-fu ukwe, ama ame a tu kutxuwe tinyang uwe-fu, asiti ira yi a pang atang uwe-fu ukwe, ame a nyang uwae-fu, nda ti a bae kutsingken icwe ti yerwen ira ti Haman, unde ti Agagi, umbae Hamedata, bae ti a na wenji Mbayawuda meme uwae uten uten ti afu nae ukwe risu-yi.

⁶ Ikyaen imi ame u nde rimang u sae ira titibi ti u tu ande-m? Ame u nde rimang u sae ti ti twenji na rishi-m?”

⁷ Ama awu ukwe Ahasuweru cwe Esita, uwa ukwe, unju, u ri te wu ti Mordekai, Mbayawuda baa, “Fxen, ame sa kusog Haman na pu m Esita. A ye wu kyensi pu ba kutuku ikyaen ira titibi ti awu myae risu Mbayawuda.

⁸ Tine, ni bae kyi kutsingken icwe iki ti ani sae baa, ayi na nyang uwae-ni, ti rinyi ukwe, ti ni sa kunyang ti a kyag rinyi ukwe ru atang kwa kutsingken wu, ikyaen imi kutsingken icwe ti a bae yi rinyi ukwe u sa kunyang ukwe kwa pu ba atang, a u kafe-ba awu fe be.”

⁹ Ikyaen yine, ti uwae kiye wu, a kunn byir ande ti ku bae iken ukwe. Uwae ushaen ti ita, ti si ushaen na Sivan, uwae usir ti rikom mbe ita, a bae iken ti Mordekai nda ba unju risu-yi ikyaen Mbayawuda, u ka yi na ande ti uwe ti uwe, ti Gomna ti ta risu uten uten, ti ande ti ta risu unju uten unju uten, bag ti Indiya ka sang Etiyopiya uten uten ukob kinjo ti rikom asu itsongfaen. A bae atsingken yine yi unju uten unde titini, u ka yi na uten uten titini, ama sa ana Mbayawuda na ba.

¹⁰ A bae atsingken yine yi rinyi ukwe Ahasuweru, ama sa kunyang ukwe kwa atang, u pu yi na atom ti ku tso kakum ti ku ka kutsingken ukwe. Abane, ama pu ru ye kakum ti bir nyae ti ter ti a ku nde wande te yi uwae kakum ukwe, na ba ti a na ka atsingken yi ti kufe.

¹¹ Uwae kutsingken wu, ukwe nda Mbayawuda ti ta ko aka ti a na kunnbyir atso, ti a na ta nwang risu-ba uwog ande ti u pu isu rika ba kunn ba, ti a na yerwen, wenji, ama na twenji ba, ti anyisu-ba, ti awa-ba, ama na su pu rifunn-ba ru.

¹² Iken yine u nde ko aka uwae uten uten ti Ahasuweru nae ukwe risu-yi, yi usir wu ti si usir ti rijwe asu ita na ushaen ti rijwe asu ifaen ti si ushaen na Adar.

¹³ Atsingken yi ti a bae ne ā si icwe ko aka uwae uten uten, ama ti a ya iski na meme ande. Mbayawuda ā som ti ujwin ikyaen ti, kiye ti ande a pu rika kunn ba, a u kafe tag ba ama.

¹⁴ Ande ba ti ku ka atsingken ukwe ba, tso kakum yi ti ku bir nyae ti ter, ti a ku nde wande ukwe te yi ne, nwunn ti kufe, u ka atsingken icwe yi. A ya iski icwe yi uwae Susa ama, uten tiyang wu, pangma ti ukwe nda unju.

¹⁵ Tiri, Mordekai ru ye uwe ukwe. A pu arun ti tsen, ti ti rikàen-yi ru irum titisub sī wu, u sa kubur ukwe na zinariya bur wu, ama pu atupwa ti a ndxob yi te itub ti tsen ti tinyang ti itub ti ru itibyaen, u pu bur wu. Ama ande ti ta uwae uten ti Susa ku kam ashwu.

¹⁶ Uwog Mbayawuda, unyang tso ba ruwen. Aba shwu ushwu, u tsen utob, ama site rurob.

¹⁷ Ko aka uwae uten uten ti kutsa ukwe ti kutsingken icwe-wu a ka atang, Mbayawuda ku shwu ushwu, u tsen utob, ama pu unyang uwae wande ti ti nde. Ande yang-ba uwae uten atang cwe ti utob-ba u kafe Mbayawuda ikyaen ti a kyen ikyenricwu Mbayawuda.