Esita 5 - Kutsingken Ira Rimam ti Saen Kyag

Ukwab Esita

¹ Usir ti ita na unju ti cwe yi, Esita pu atupwa uwa ukwe-wu sī, u sang ka tsi ukag ti uwae fer uwog ti ukwe ku som atang. Kiye wu, ukwe somtsa kutxomkwe-wu ti ta rukwer ufu ti ku sang ushiwae ukwe.

² Kiye ti ukwe sae Esita tsi ukag ti uwae atang, Esita tu risu ti tinyang uwe ukwe, ukwe sa ukum-wu na zinariya tso Esita, tiri Esita ko sang ba, u sa kujwo tekunn risu ukum wu.

³ Ama ukwe rang baa, “Uwa-m Esita, imi ti nde? Imi ti afu ku sha? Iken ti afu a ku sha, a u nda fu, ko asiti a u kata kujwokwe-m na fu, ame cwe pu m.”

⁴ Esita ri baa, “Asiti ayi a nyang uwae ukwe, ukwe ā te Haman ba ci wuci ti ame u nde tsika ukwe yaka ne.”

⁵ Tiri ukwe ri baa, “Ni pu Haman ba ti kufe, ti ti nde iken ti Esita ku sha.” Ama ukwe ti Haman ru uwog ukwab ti Esita nde tsi.

⁶ Kiye ti a som ku ngwa ambyi anam, ukwe rang Esita baa, “Imi ti afu ku jwam? A u nda fu. Imi ti afu ku sha? Ame u nde yi na fu, ko asiti ame a u kata kujwokwe-m, ame u nde yi.”

⁷ Ama Esita cwe baa, “Itijwam-m ti iken ti ame ku sha ta re.

⁸ Asiti ame a tu risu tinyang uwe ukwe, ayi a nyang uwae ukwe ti wu u nde iken ti m ku sha ti ayi u kumunn unju ti yer-wu uwog-m, ukwe ti Haman ā ba ukwab ti ame u nde tsi ba ucwe. Atang, ame u ri te ukwe iken ti ame ku sha.”

Haman Myae ti Wu Wen Mordekai

⁹ Tiri Haman ruye atang ti ipam ti pam ti utob ti tsen. Amaa, kiye ti awu sae Mordekai yi ufu ti ku sang fenkyi ukwe, ti Mordekai kyen-wu awu be, Haman ndembeb utob timambe, u tso rinae te Mordekai.

¹⁰ Ko ti ayi si ahan, Haman ye utob u ru-wu yi kununn. Awu kunn byir arwan-wu fa ti uwa-wu Zereshi,

¹¹ ama pwen te ba itso rifunn ti awu site, ti anyisu ti arom ti awu mbae, ti rurob na meme itikotso ti ukwe nda wu ti awu na ta risu ande ti uwe ti uwe ti ta uten wu.

¹² Cwucwo, Haman ri baa, “Esita, uwa ukwe ti risu-wu nde ukwab u yae nyang ame amam ka ci ukwab yi te ukwe. Awu yae kyi m ti ukwe ucwe cwucwo kaa ci ukwab kununn-wu.

¹³ Amaa, meme iken yine ndeya-yi ame be, kiye ti ame a ku sae Mordekai urae Yawuda wune som ufu ti ku sang yi fenkyi ukwe.”

¹⁴ Tiri Zereshi uwa Haman, ti arwan-wu, nda Haman kumyae baa, “Sha ituku ti rikob-yi ka kutun kujwo mae ifaen mbe rijwe. Ucwe ti kiskinn, ri te ukwe ti a ye Mordekai kyensi atang, ti utob-fu ā nae riben, ama afu u ti ukwe ka ci-ni ukwab yi tiri.” Kumyae yine nyang uwae Haman timambe. Awu sha ituku yi tsi.