Esita 4 - Kutsingken Ira Rimam ti Saen Kyag

Mordekai Jwam Itindeya Uwog Esita

¹ Kiye ti Mordekai nungye meme ira ti a myae tsi pu ba ti a u nde, awu ndembeb utob timambe, u pu atupwa tibyir si, u pu itong mbub risu ama sang uwae uten ti ira ti jwub ti utob ti beb.

² Awu ru yiyaen ka tsi uwe ufu ti ku sang yi fenkyi ukwe, ikyaen ti, a cwe-ba ti unde ti si atupwa tibyir ku byir utob na sang fenkyi ukwe be.

³ Ko aka ti kutsingken icwe wune a ka atang, Mbayawuda ku pu ukunn ricwu. Aba cwe unju, ti ira ti jwub ti utob tibyir. Ande yang-yi uwae-ba pu atupwa tibyir si, ama somsi uwae atong.

⁴ Kiye ti anyisu wandab ti ku ndeya Esita, ti ande ti ku nde na wu wande, ba ri te wu iken ti Mordekai nde, ijwe-wu fwer ndembeb. Awu pu atupwa tom ka na Mordekai ti wu na tunn atupwa tibyir-wu yine na tso, ti wu na pu atupwa yi na si. Amaa, Mordekai pyir-wu iken-wu.

⁵ Tiri Esita kunn Hataki, kinjo uwae ande ti ku nde na ukwe wande, ti a tsab ti wu na nde wande te awu Esita, ama tom wu ti wu na ka rang Mordekai iken ti nde wu, ti iken ti nde nee awu ku nde itso iken yine.

⁶ Hataki nwunn u ru ka tu Mordekai yi rishin ti ta uwe ufu ti ku sang yi fenkyi ukwe.

⁷ Mordekai ri te Hataki ira ti tu wu, ti ira aser ti Haman yer unju ti awu na u pu na ukwe ikyaen ti a na wenji Mbayawuda.

⁸ Mordekai nda wu kwer ti kutsingken icwe yi ti a bae shag kyife Susa ikyaen itiwenji Mbayawuda ti wu na sa ka tatso Esita, ama ti wu na nda Esita unju baa, awu na ka uwog ukwe, ti wu na ka jwam ayibrisi risu ande-wu.

⁹ Hataki ka tsag te Esita ira yi ti Mordekai ri.

¹⁰ Ama, Esita tom Hataki ti wu na ka ri te Mordekai baa,

¹¹ “Meme apyi ukwe ti ande ti ta uten uten ti ukwe nae ukwe risu-yi nung pu ba baa, ayi na si icwe ti urom ko unda iki ti a sang-wu sang amam yi ushi uwae uwog ukwe, asiti ukwe a kunn-wu awu ira be, a na u wen wu. Ayi si nyang unde ti ukwe a sa ukum ukwe-wu na zinariya tso wu amam ti a u wen-ba awu be. Ame nde pu m usir rijweta tine, ukwe kunn-wu ame ira be.”

¹² Ama a ri te Mordekai ira ti Esita ri.

¹³ Mordekai tom shemkyi ba ti a na ka ri te Esita baa, “Kab-fu baa, ti afu na si uwa ukwe ne, afu amam ti na u nwangru uwae Mbayawuda be.

¹⁴ Asiti afu a bwetag-fu uwae kiye wune, itinwangru ti itindeya Mbayawuda u ru uwog iki ba, amaa, afu ti ishikununn itse-fu meme u twenji tag. Aye ti nung ko ikibe afu si uwa ukwe uwae kiye wune ikyaen ira yine?”

¹⁵ Tiri Esita ri te ba ti a na ka ri te Mordekai baa,

¹⁶ “Ka kunnbyir Mbayawuda ti ta uwae uten Susa, ti ni cwe unju ikyaen m usir ita. Ni ci-ni be, ti ni ngwa-ni be, utitang ti usirtaen. Ame ti apyi-m ti anda ama u cwe unju. Isim ayine, ame u nyatsa icwe u sang uwog ukwe. Asiti a u wen m, ā wen-ba ame.”

¹⁷ Tiri Mordekai ru ka nde meme iken yi ti Esita nda wu unju ti awu na nde.